Solennità tat-Twelid tal-Imqaddsa Verġni Marija

Kolletta

Agħti lilna, qaddejja tiegħek, Mulej, id-don tal-grazzja tas-sema u kattar is-sliem tiegħek fuqna, miġburin għall-Festa tat-Twelid tal-Verġni mqaddsa Marija, li ġiebet lil Ibnek fid-dinja bħala bniedem, u hekk infetħet għalina t-triq tas-salvazzjoni. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen. 

Lectio Divina

Il-Knisja ilha tiċċelebra it-twelid ta’ Imqaddsa Vergni Marija Omma Alla sa mis-sitt seklu. Fl-Iskrittura ma nsibux rakkont tat-twelid ta’ Marija. Madanakollu, dan il-vojt jimtela mill- Proto-Evanġelju ta’ Ġakbu. Skond dan ir-rakkont, Anna u Ġwakkin ma setgħux ikollhom tfal u kienu jitolbu biex jaraw il-frott ta’ mħabbithom. Huma rċevew il-wegħda li se jkollhom tarbija li se tgħin fil-pjan tas-salvazzjoni ta’ Alla. Bħal koppji oħra simili li nsibu fl-Iskrittura dan jagħmel enfasi fuq il-preżenza ta’ Alla fil-ħajja ta’ Marija sa mill-bidu ta’ ħajjitha.  \

Santu Wistin jara rabta bejn it-twelid ta’ Marija u l-ħidma tas-salvazzjoni ta’ binha Ġesù. Hu jgħid li d-dinja biex tifraħ bid-dawl jiddi tat-twelid ta’ Marija. Hi l-fjura minn dik l-għalqa li minnha ħareġ il-Ġilju prezzjuż: Ġesù Kristu. Permezz tat-twelid tagħha, in-natura dgħajfa li writna mill-ewwel ġenituri tagħna nbidlet.  

It-talba tal-ftuħ tal-Quddiesa—il-Kolletta li tidher iktar ’il fuq—titkellem dwar it-twelid ta’ Bin Marija bħala s-sebħ tas-salvazzjoni u titlob biex ikun hawn aktar paċi. F’kull twelid uman aħna nistgħu naraw sejħa għal tama ġdida fid-dinja. L-imħabba bejn żewġ persuni umani saret haġa #waħda mal-ħidma kreattiva ta’ Alla. 

Il-ġenituri li jġibu fid-dinja ħolqien ġdid juru t-tama f’dinja kollha inkwiet. Il-wild il-ġdid għandu potenzjal biex ikun kanal tal-imħabba u l-paċi ta’ Alla għad-dinja. Dan kollu seħħ f’Marija.  

Jekk Ġesù hu l-espressjoni perfetta tal-imħabba ta’ Alla, Marija hi il-prekursur ta’ din l-imħabba. Jekk Ġesù ġab il-milja tas-salvazzjoni, Marija hi ż-żerniq ta’ din l-istess salvazzjoni. Iċ-ċelebrazzjonijiet tat-twelid iġibu l-ferħ kemm lil min ikun għalaq sninu kif ukoll lill-familja tiegħu u lil sħabu. 

Wara it-twelid ta’ Ġesù, it-twelid ta’ Marija joffri ferħ kbir lid-dinja. Kull darba li niċċelebraw it-twelid tagħha, inkunu qed nittamaw f’aktar paċi fi qlubna u fid-dinja kollha.  

Talba

F’dinja li, kif jgħid Papa Franġisku, qed tgħix it-tielet gwerra dinjija frammentata, nitolbu l-interċessjoni tiegħek, Marija Bambina, biex tidhol għalina u taqlgħalna r-rigal tal-paci. Idħol għal dawk il-ġenituri li qed jitolbu għal wild fil-familja tagħhom. Ħares lill-ommijiet li qed jistennew biex iwelldu it-tarbija tagħhom. O Marija Bambina, idhol għalina u għad-dinja kollha quddiem it-Trinità Qaddisa. Ammen.