8 ta’ Diċembru
Solennità tat-Tnissil bla Tebgħa tal-Verġni Mqaddsa Marija

Kolletta

O Alla, bit-tnissil bla tebgħa tal-Verġni Mqaddsa Marija int ħejjejt għamara xierqa għal Ibnek; kif int qist minn qabel il-merti tal-istess Ibnek biex ħarist lil Ommu minn kull tebgħa ta’ dnub, agħmel li aħna, bit-talb tagħha, naslu safja għandek. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen.

Lectio Divina

Għalkemm dan il-Ħadd huwa t-Tieni Ħadd tal-Avvent, il-Knisja f’Malta u Għawdex xorta waħda tiċċelebra s-Solennità tat-Tnissil bla Tebgħa ta’ Marija proprju minħabba fid-devozzjoni partikulari li l-poplu tagħna għandu għal din il-qima lil Omm Alla. U din is-Solennità tinkwadra tant tajjeb fil-kuntest tal-istennija għall-miġja tal-Mulej ta’ Żmien l-Avvent għax fiha nfakkru kif Marija ġiet meħlusa minn kull dnub u minn kull influwenza tal-ħażin sa mill-mument tat-tnissil tagħha permezz ta’ ġenituri—Anna u Ġwakkin—li baqgħu bla wild sa fi xjuħithom, kif insibu fil-Proto-Evanġelju ta’ San Ġakbu, li huwa ġabra ta’ rakkonti marbutin mat-twelid ta’ Marija u ta’ Ġesù u li jmur lura għat-tieni seklu wara Kristu, jiġifieri mhux wisq ’il bogħod minn meta seħħew dawn il-ġrajjiet.

Minkejja li dan it-tagħlim dwar il-konċepiment ta’ Marija mingħajr it-tebgħa tad-dnub tan-nisel ġie ddikjarat bħala domma tal-fidi—jiġifieri bħala parti integrali ta’ dak li tgħallem il-Knisja u nemmnu bħala Nsara—fl-1854, madankollu jidher li din il-konvinzjoni kienet diġà preżenti fl-ewwel sekli fil-kitbiet ta’ Missirijiet il-Knisja u fil-liturġija. Nafu fiċ-ċert li ċ-ċelebrazzjoni tat-tnissil ta’ Marija tmur lura tal-anqas sas-seba’ seklu. Dawn l-ewwel passi wittew it-triq għall-iżvilupp tat-teoloġija f’dan ir-rigward li wassal għad-dikjarazzjoni solenni tad-domma tal-Immakulata. Dan id-don li ġie mogħti lil Marija bi grazzja speċjali huwa mogħti proprju minħabba l-missjoni tagħha li tkun Omm il-Feddej, l-Iben ta’ Alla li sar laħam ġewwa ġufha mal-“iva” tagħha, liema “iva” reġgħet lura l-“le” tal-ewwel bnedmin, kif naqraw fl-Ewwel Qari meħud mill-Ktieb tal-Ġenesi.

Imma din l-istqarrija tal-fidi hija msaħħa minn dak li nsibu fil-Kelma ta’ Alla dwarha. U hawn tidħol fix-xena t-tislima tal-Anġlu Gabrijel hekk kif mar biex iħabbrilha din il-missjoni speċjali li biha ġiet fdata, u qagħad jistenna t-tweġiba magħha. Il-kelma bil-Grieg κεχαριτωμένη—“mimlija bil-grazzja”—li juża l-Arkanġlu Gabrijel għal Marija mhijiex biss tislima ta’ ġieħ imma hija titlu teoloġiku: Marija hija l-mimlija bil-grazzja; Marija hija dik li Anġlu, li normalment huwa superjuri għall-bnedmin, isellmilha bħala dik li sabet grazzja quddiem Alla mhux għax għamlet xi ħaġa speċjali min-naħa tagħha imma proprju għax ġiet maħluqa mimlija bil-grazzja biex tkun tista’ jum wieħed tilqa’ lil Ġesù Kristu fi ħdanha; tilqa’ lill-Grazzja ta’ Alla nnifisha li tinżel bħan-nida li ssaqqi l-art sabiex minnha tinbet is-salvazzjoni.

Sa mit-tnissil tagħha hija ġiet maħluqa għal kollox libera hekk li setgħet timtela bil-grazzja għal kollox għax il-wisa’ fil-qalb tagħha huwa kollu għat-Tajjeb, għas-Sabiħ, u għall-Veru—għal Alla—hekk li, dak li fiha kien diġà milja tal-grazzja bis-saħħa tal-fidwa tas-Salib li kienet għadha trid isseħħ, xorta waħda seta’ jimtela b’Milja ikbar—Kristu—li tfur minn ħdanha fuq l-umanità kollha. Imma kollox jibda minn dan it-tnissil moħbi u mhux mistenni fil-ġuf ta’ Sant’Anna.

Dan il-jum irid ifakkarna li l-grazzji kollha li nirċievu—meta aħna wkoll insibu grazzja quddiem Alla, meta niġu mżejna b’aspett partikulari tal-qdusija u l-kobor ta’ Alla li x-xbieha tiegħi hi minquxa fil-qalba ta’ ruħna—dawn qatt mhuma biss għalina personali. Bħal fil-kas ta’ Marija—u hawn jidher il-kobor veru tagħha—dawn il-grazzji huma dejjem ukoll għall-ġid tal-oħrajn, tal-Knisja, tas-soċjetà in ġenerali li tant teħtieġ din il-grazzja ta’ Alla li ġġib magħha paċi, sliem, imħabba, rispett. U din il-grazzja tista’ tasal għand il-komunità, il-Knisja, is-soċjetà in ġenerali, biss jekk ikun hemm min ipoġġi lilu nnifsu disponibbli għal Alla bl-istess disponibbiltà sħiħa ta’ Marija li tagħmel lilha nnifisha qaddejja ta’ Alla għas-salvazzjoni tal-bnedmin.

Talba

Mulej Ġesù, f’din il-mixja tal-Avvent, wessa’ l-qalb tagħna sabiex fiha tkun tassew tista’ tilqa’ lilek li mkien u xejn ma jesgħek, kif twessgħet qalb Marija Ommok sa mill-bidu biex fiha, dar l-indafa, tgħammar inti, is-Sid tagħha. Ammen.