Fi tlitt ijiem nerġa’ ntellgħu

Festa tad-Dedikazzjoni tal-Bażilka tal-Lateran

Kolletta

O Alla, int tħejji għalik għamara għal dejjem, mibnija b’ġebel ħaj u magħżul; kattar fil-Knisja d-doni tal-grazzja tiegħek, biex il-poplu fidil jibqa’ jikber dejjem għall-bini ta’ Ġerusalemm tas-sema. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen.

Rajt l-ilma ħiereġ mit-tempju.
Eżek 47: 1-2. 8-9. 12

Qari mill-Ktieb tal-Profeta Eżekjel

Imbagħad, l-Anġlu ħadni lura ħdejn il-bieb tas-santwarju; u ara, kien hemm l-ilma ħiereġ minn taħt l-għatba tas-santwarju lejn il-lvant – għax is-santwarju kien iħares lejn il-lvant. U l-ilma kien ħiereġ min-naħa tal-lemin tal-għatba, in-naħa tan-nofsinhar tal-altar. Imbagħad ħariġni mill-bieb tat-tramuntana u mexxieni madwar, minn barra, sal-bieb ta’ barra li jħares lejn il-lvant; u l-ilma kien inixxi min-naħa tal-lemin tal-għatba.

U qalli: «Dan l-ilma ħiereġ lejn in-naħa tal-lvant u nieżel lejn l-Għaraba; u meta jasal fil-Baħar il-Mejjet b’dak l-ilma mielaħ, l-ilma jsir ilma ħelu. U jiġri li, kull fejn tgħaddi dik ix-xmara, kull ħaġa ħajja li tiċċaqlaq tgħix; u jkun hemm kotra kbira ta’ ħut, għax, minn kull fejn jgħaddi dak l-ilma, l-ilma jitjieb u jkun hemm il-ħajja minn kull fejn tgħaddi x-xmara. Fuq iż-żewġt ixtut tax-xmara jikbru siġar ta’ kull ġens ta’ frott; il-weraq tagħhom ma jidbielx, il-frott tagħhom ma jonqosx. Kull xahar jagħmlu frott ġdid, għax l-ilma tagħhom ħiereġ mit-tempju, u l-frott tagħhom ikun ikel, u l-weraq duwa.

Il-Kelma tal-Mulej.
R/. Irroddu ħajr lil Alla.

Salm 45: 2-3. 5-6. 8-9

R/. Tifraħ il-belt ta’ Alla!

Kenn u qawwa hu Alla għalina,
għajnuna kbira sibnieh fid-dwejjaq.
Għalhekk ma nibżgħux jekk l-art titriegħed,
jew jiġġarrfu l-muntanji f’nofs ta’ baħar. R/.

Hemm xmara li s-swieqi tagħha
iferrħu l-belt ta’ Alla,
l-għamara qaddisa tal-Għoli.
Hemm Alla f’nofsha, ma titħarrikx;
jgħinha Alla mat-tbexbix tas-sebħ. R/.

Il-Mulej tal-eżerċti magħna,
fortizza għalina Alla ta’ Ġakobb!
Ejjew, araw x’għamel il-Mulej,
għemejjel tal-għaġeb fuq l-art. R/.

Intom it-tempju ta’ Alla.
1 Kor 3: 9b-11.16-17

Qari mill-Ewwel Ittra ta’ San Pawl Appostlu lill-Korintin

Intom il-bini ta’ Alla. Skont il-grazzja li tani Alla, bħala bennej għaqli, jiena qegħedt il-pedament. Ħaddieħor jibni fuqu; imma jqis kull wieħed kif jibni fuqu. Pedament ieħor ħadd ma jista’ jqiegħed ħlief dak li ġa tqiegħed; u dan hu Ġesù Kristu.

Ma tafux li intom tempju ta’ Alla, u li l-Ispirtu ta’ Alla jgħammar fikom? Jekk xi ħadd jeqred it-tempju ta’ Alla, Alla jeqred lilu. Għax qaddis hu t-tempju ta’ Alla, li huwa intom.

Il-Kelma tal-Mulej.
R/. Irroddu ħajr lil Alla.

Akklamazzjoni qabel l-Evanġelju
ara 2 Kronaki 7:16

Hallelujah. R/. Hallelujah.
Għażilt u qaddist din id-dar,
jgħid il-Mulej,
biex ismi jkun fiha għal dejjem.
R. Hallelujah.

Ġesù tkellem fuq it-tempju tal-ġisem tiegħu.
Ġw 2:13-23

Qari mill-Evanġelju skont San Ġwann

Kien qorob l-Għid tal-Lhud, u Ġesù tela’ Ġerusalemm. Fit-tempju sab min qiegħed ibigħ barrin, nagħaġ u ħamiem, u min kien bilqiegħda jsarraf il-flus. Għamel sawt mill-ħbula, u keċċiehom ilkoll ’il barra mit-tempju, bin-nagħaġ u l-barrin tagħhom; xerred il-flus ta’ dawk li kienu jsarrfu, u qalbilhom l-imwejjed u lill-bejjiegħa tal-ħamiem qalilhom:
«Warrbu dawn minn hawn, u dar Missieri tagħmluhiex dar tan-negozju!» Id-dixxipli ftakru f’dak li kien hemm miktub fl-Iskrittura, “Il-ħeġġa għal darek fnietni.”

Imbagħad il-Lhud qabdu u qalulu: «X’sinjal se turina li inti tista’ tagħmel dan?»
Ġesù weġibhom: «Ħottu dan it-tempju, u fi tlitt ijiem nerġa’ ntellgħu.» Għalhekk il-Lhud qalulu: «Dan it-tempju ħa sitta u erbgħin sena biex inbena, u int se ttellgħu fi tlitt ijiem?» Iżda hu tkellem fuq it-tempju tal-ġisem tiegħu. Meta mbagħad qam mill-imwiet, id-dixxipli tiegħu ftakru f’dan li kien qal, u emmnu fl-Iskrittura u fil-kliem li kien qal Ġesù.

Waqt li kien Ġerusalemm għall-festa tal-Għid, kien hemm ħafna li emmnu f’ismu billi raw is-sinjali li kien jagħmel.

Il-Kelma tal-Mulej
R/. Tifħir lilek Kristu.

Riflessjoni
Illum il-Knisja tiċċelebra l-Konsagrazzjoni tal-Bażilika ta’ San Ġwann Lateran, f’Ruma. Din il-Bażilika hija l-katedra tal-Papa bħala isqof ta’ Ruma. Meqjusa bħala ‘omm il-knejjes kollha,’ din il-Bażilika hija sinjal ta’ komunjoni fil-Knisja Kattolika. Għal dan il-Ħadd, il-liturġija tistidinna nirriflettu fuq ‘it-tempju,’ il-post sagru fejn jgħammar Alla. Is-silta magħżula għalina, meħudha mill-Evanġelju skont San Ġwann, tlaqqagħna ma’ Ġesù fit-tempju proprju fil-bidu talħajja pubblika tiegħu u mhux lejn l-aħħar bħalma nsibu fis-Sinottiċi. X’inhu allura l-messaġġ li jrid iwasslilna l-Mulej Ġesù llum? F’liema tempju nistgħu niltaqgħu tassew mal-Mulej, fit-tempju tal-ġebel, jew fil-Ġisem ta’ Kristu li huwa l-Knisja? Tabilħaqq, Ġesù huwa t-tempju l-ġdid. Kien għalhekk li lill-Lhud qalilhom, “Ħottu dan it-tempju, u fi tlitt ijiem jien nerġa’ ntellgħu” (v. 19).

Ġesù kien qed jitkellem fuqu nnifsu, li kellu jiġi maqtul iżda fi tlitt ijiem kellu jerġa’ jieħu l-ħajja. Iżda l-Lhud ma fehmuhx. Ġesù nnifsu huwa t-tempju fejn jgħammar Alla. Alla ma jinsabx fit-tempju tal-ġebel iżda fil-preżenza ħajja ta’ Ġesù Kristu fil-Knisja tiegħu. Ġesù ried ikeċċi ’l barra mit-tempju dak kollu li mhuwiex ta’ Alla. Aħna wkoll, permezz tal-Magħmudija sirna membri tal-Ġisem ta’ Kristu, il-Knisja, u tempji tal-Ispirtu s-Santu. Aħna konxji ta’ dan? Ġesù jixtieq ineħħi minna dak kollu li jxekkilna, u jwassalna biex nagħmlu mill-Knisja tiegħu suq għall-interessi tagħna. X’inhuma dawk l-idoli u d-distrazzjonijiet li jbegħduna minnu? X’inhuma dawk id-drawwiet ħżiena li jtebbgħulna qalbna u ma jagħmlux ġieh lit-tempju ta’ Alla? Nitolbu lill-Ispirtu Qaddis isaffi lill-Knisja sabiex tkun tassew preżenza ħajja ta’ Kristu fid-dinja.

Talba

Kemm hi għażiża d-dar tiegħek, Mulej tal-eżerċti! Tixxennaq u tinfena ruħi għat-tempju tal-Mulej; ngħanni ferħan b’ruħi u ġismi lil Alla l-ħaj. Henjin dawk li jgħammru f’darek; huma jfaħħruk għal dejjem. Mulej tal-eżerċti, hieni l-bniedem li jittama fik! (Salm 84, 1-3, 5, 13)

 

Ara l-Qari tal-Ħdud li għaddew