L-Ewwel Ħadd tal-Avvent Sena Ċ

O Alla li tista’ kollox, qanqal fil-fidili tiegħek ir-rieda li, bis-saħħa ta’ għemejjel tajba, joħorġu jiltaqgħu ma’ Kristu Ibnek li ġej, biex jissieħbu miegħu fil-leminija tiegħu u jistħoqqilhom jiksbu s-saltna tas-sema. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen. 

Lectio Divina

L-Evanġelju tal-lum, l-ewwel wieħed ta’ sena liturġika ġdida u taż-żmien qaddis tal-Avvent, ifakkarna mill-bidu nett li dan mhux biss żmien li jwassalna għaċ-ċelebrazzjoni tal-ewwel miġja tal-Iben ta’ Alla fostna. Ifakkarna li bħala komunità nisranija kontinwament aħna msejħa biex inħejju ruħna għat-tieni miġja tiegħu, miġja glorjuża, li fiha għad ‘jagħmel ħaqq mill-ħajjin u mil-mejtin, u s saltna tiegħu ma jkollix tmiem’.

Ta’ bnedmin li aħna, f’kull żmien tal-ħajja tagħna fuq din l-art naraw madwarna ħwejjeġ li jimlewlna l-qlub tagħna b’ħafna inkwiet u biżgħat: mard, problemi fuq ix-xogħol, problemi fil-familji, u tant diffikultajiet oħra. Żgur li fil-ħajja tagħna mhux l-ewwel darba li smajna lil xi ħadd jgħid li mument ta’ kriżi jista’ jħalli żewġ effetti opposti: li jkissirna, jew li jibnina. Fid-dawl ta’ dan, l-Evanġelju tal-lum hu sejħa biex bħala Nsara ma nsirux skjavi tal-biżgħat, l-inkwiet u l-ansjetà li kontinwament jippruvaw jaħkmu lil ħajjitna. Ifakkarna li aħna għandna ngħixu dejjem fl-istennija tal-Mulej, li għad jiġi fil-glorja fl-aħħar taż-żmien, iżda li wkoll kontinwament jixtieq jiġi f’kull rokna tal-ħajja tagħna biex jixħet id-dawl tiegħu u jqaddes anke l-aktar imkejjen mudlama.

Madanakollu, bħan-nar li jrid jibqa’ jiġi mkebbes biex il-fjamma ma tintefiex, hemm bżonn li din it-tama nżommuha dejjem ħajja, anke fl-aktar żminijiet iebsa li joffrulna provi diffiċli. Fl-Evanġelju tal-lum Ġesù stess jagħtina l-għodda biex nagħmlu dan: it-talb. It-talb hu meħtieġ biex ma nidħlux fit-tiġrib iżda anke biex, meta nidħlu fih, inkunu nifilħu ngħaddu “minn kulma għandu jiġri u tieqfu quddiem Bin il-bniedem.” Dan iż-żmien qaddis tal-Avvent hu għalhekk żmien ta’ tħejjija permezz tat-talb—talb mibni fuq il-Kelma tant sabiħa u abbundanti li toffrilna l-liturġija f’kull ġurnata tiegħu. Biex takkumpanjana f’dan il-vjaġġ għandna wkoll figura li hi ċentrali fih: Marija, li, anke fi żminijiet diffiċli u ta’ prova, baqgħet dejjem qaddejja tal-Mulej; Marija li tgħożż f’qalbha il-ħwejjeġ kollha li kienu jiġru madwarha, soda fit-tfittxija u fit-twettiq tar-rieda t’Alla fil-ħajja tagħha

Talba
Mulej Ġesù, ta’ bnedmin li aħna, aħna u nħarsu
madwarna u ġo fina, faċli ħafna li nimtlew b’ħafna
biżgħat u inkwiet. Mhux dejjem inħossu li għandna
s-saħħa nikkumbattu l-ħafna taħbit li l-ħajja
kontinwament iġġibilna quddiemna.
Fid-dawl tal-Kelma tiegħek illum, għallimna nitolbu
biex nerfgħu ħarsitna u nqawwu qlubna ħalli
nibqgħu qawwija fit-tama li inti qrib tagħna
u li dejjem iżżomm il-wegħdiet tiegħek. Maranathà!
Ejja, Mulej Ġesù!