Min jibqa’ fija u jiena fih, dan jagħmel ħafna frott

Il-Ħames Ħadd tal-Għid

Qalilhom kif Sawl ra lill-Mulej fit-triq.
Atti 9, 26-31

Qari mill-Ktieb tal-Atti tal-Appostli

F’dak iż-żmien, meta Sawl wasal Ġerusalemm beda jfittex li jissieħeb mad-dixxipli. Imma lkoll kienu jib!għu minnu, għax ma kinux emmnu li tassew ikkonverta. Imbagħad Barnaba qabdu u ħadu miegħu għand l-appostli. Hu qalilhom kif Sawl kien ra lill-Mulej fit-triq u semgħu jkellmu, u kif f’Damasku kien tkellem b’wiċċu minn quddiem fl-isem ta’ Ġesù.

Għalhekk Sawl baqa’ magħhom, dieħel u ħiereġ Ġerusalemm, u kien jitkellem bil-miftuħ f’isem il-Mulej. Kien jitħaddet mal-Lhud Griegi u jiddiskuti magħhom; iżda huma kienu jfittxu li joqtluh.

Meta l-aħwa saru jafu b’dan, niżżluh lejn Ċesarija u bagħtuh Tarsu. Il-Knisja kienet fis-sliem fil-Lhudija u l-Galilija u s-Samarija kollha; kienet dejjem tikber u timxi ’l quddiem bil-biża’ tal-Mulej, u tiżdied fl-għadd bl-għajnuna tal-Ispirtu s-Santu.

Il-Kelma tal-Mulej.
R/. Irroddu ħajr lil Alla

Salm 21 (22), 26b-27.28.30.31-32

R/. 26 (a): Mulej, nagħtik it-tifħir tiegħi f’ġemgħa kbira

jew

R/. Hallelujah, Hallelujah, Hallelujah

Irrodd il-wegħdiet tiegħi
quddiem dawk li jibżgħu minnu.
Jieklu l-fqajrin u jixbgħu;
ifaħħru l-Mulej dawk li jfittxuh.
Ħa tgħix qalbhom għal dejjem! R/.

Jiftakru t-truf kollha tal-art,
u jerġgħu lura lejn il-Mulej;
u quddiemu jinxteħtu r-razez kollha tal-ġnus.
Lilu jqimu l-bnedmin, li jmutu;
quddiemu jmil kull min nieżel ġot-trab.
U għalih tgħix ruħi. R/.

Lilu jaqdi n-nisel tiegħi.
Ixandru ’l Sidi lin-nisel li għad jiġi,
ixandru l-ġustizzja tiegħu
lill-poplu li għad jitwieled:
“Dan għamlu l-Mulej!” R/.

Dan hu l-kmandament tiegħu, li nemmnu u nħobbu.
1 Ġw 3, 18-24

Qari mill-Ewwel Ittra ta’ San Ġwann Appostlu

Uliedi, ma nħobbux bil-kliem u t-tpaċpiċ, imma bl-għemil u bis-sewwa. Minn dan naslu li nagħrfu li aħna fil-verità, u quddiem Alla nserrħu l-kuxjenza tagħna, jekk il-kuxjenza ċċanfarna, għax Alla hu aqwa mill-kuxjenza tagħna, u hu jaf kollox.

Għeżież, jekk il-kuxjenza tagħna ma ċċanfarniex, aħna qalbna qawwija quddiem Alla, u kull ma nitolbu naqilgħuh mingħandu, għax qegħdin inżommu l-kmandamenti tiegħu u nagħmlu dak li jogħġob lilu.

Dan hu l-kmandament tiegħu: li nemmnu fl-isem ta’ Ibnu Ġesù Kristu, u nħobbu ’l xulxin, kif wissiena hu. Min iżomm il-kmandamenti tiegħu jgħammar f’Alla u Alla fih. B’hekk nagħrfu li hu jgħammar fina: bl-Ispirtu li hu tana.

Il-Kelma tal-Mulej
R/. Irroddu ħajr lil Alla

AKKLAMAZZJONI QABEL L-EVANĠELJU
ara Ġw 15, 4a.5b

Hallelujah. R/. Hallelujah.
Ibqgħu fija, u jiena nibqa’ fikom, jgħid il-Mulej;
min jibqa’ fija u jiena fih, dan jagħmel ħafna frott.
R/. Hallelujah.

Min jibqa’ fija u jiena fih, dan jagħmel ħafna frott.
Ġw 15, 1-8

Qari mill-Evanġelju skont San Ġwann

F’dak iż-żmien, Ġesù qal lid-dixxipli tiegħu: “Jiena d-dielja vera u Missieri l-bidwi. Kull fergħa fija li ma tagħmilx frott jaqtagħha; u kull waħda li tagħmel il-frott jiżborha u jnaddafha, biex tagħmel frott aktar. Intom ġa ndaf minħabba l-kelma li għedtilkom.

Ibqgħu fija, u jiena nibqa’ fikom. Kif il-fergħa ma tistax tagħmel frott minnha nfisha jekk ma tibqax fid-dielja, hekk anqas intom jekk ma tibqgħux fija. Jiena d-dielja, intom il-friegħi. Min jibqa’ fija u jiena fih, dan jagħmel ħafna frott; għax mingħajri ma tistgħu tagħmlu xejn. Jekk wieħed ma jibqax fija, jintrema barra bħal fergħa, u jinxef; imbagħad, friegħi bħal dawn jiġbruhom u jixħtuhom fin-nar u jinħarqu.

Jekk tibqgħu fija u kliemi jibqa’ fikom, itolbu kull ma tridu, u jingħatalkom. Din hi l-glorja ta’ Missieri, li intom tagħmlu ħafna frott u tkunu dixxipli tiegħi”.

Il-Kelma tal-Mulej.
R/. Tifħir lilek, Kristu.

Riflessjoni

Fl-Evanġelju skont San Ġwann ma niltaqgħux ma’ Ġesù jgħallem bil-parabboli. Imma minflok niltaqgħu miegħu jgħallem permezz ta’ tixbihat allegoriċi (dik li bil-Lhudi tissejjaħ mashal). Ir-rakkont tal-lum huwa eżempju sabiħ ta’ dan.
– Ġesù jidentifika lilu nnifsu mad-dielja vera
– ixebbah lil Missieru ma’ bidwi;
– iqabbel lilna mal-friegħi.

Dan id-diskors jambjenta ruħu waqt l-aħħar ċena. Ġesù ġa ħasel riġlejn id-dixxipli. Ġa wera lid-dixxipli xi tfisser tħobb/taqdi. Ġa tahom il-kmandament il-ġdid u wriehom kif jintagħrfu li huma dixxipli veri. Ġa kellimhom fuqu nnifsu bħala t-triq li twassal għal għand il-Missier.

Issa Ġesù bħal donnu jerġa’ jtennilhom dan kollu permezz tad-dielja, tal-bidwi u tal-friegħi li jagħtu frott kemm-il darba jibqgħu mwaħħlin maz-zokk. Hemm relazzjoni intima bejniethom it-tlieta. Iz-zokk tad-dielja huwa Dak li minnu ġejja l-ħajja. Il-bidwi huwa Dak li b’tant imħabba jiżbor u jnaddaf sabiex aħna, il-friegħi, inkunu nistgħu nagħmlu l-frott. Imma, biex iseħħ dan kollu, hemm bżonn li l-fergħa tibqa’ maz-zokk. 

Il-fergħa u z-zokk huma ħaġa waħda. Iz-zokk jagħti l-ħajja lill-fergħa u, b’konsegwenza, il-fergħa tagħti l-frott (jiġifieri li tkun dixxiplu u li permezz t’hekk tagħti glorja lill-Missier). Il-frott ma jiġix mill-fergħa, imma mill-ħajja taz-zokk (Ġesù) u miż-żabra tal-bidwi (il-Missier). Tant hu hekk li, jekk il-fergħa titqaċċat minn maz-zokk li hu l-ħajja, tinxef u tmut. Jekk aħna ma nibqgħux ħaġa waħda mad-dielja, immutu … nitilfu l-istess skop tagħna … u frott ma nagħtux. 

X’jiswielha l-fergħa li tinxef u tinħaraq fin-nar? 

X’jiswielna aħna li ma nibqgħux imwaħħlin mad-dielja? 

X’jiswielna aħna jekk ma nħallux il-ħajja vera tgħix ġo fina u permezz tal-istess frott nagħtu glorja lill-Missier? 

Xi ħlas isbaħ hemm milli wieħed iġarrab il-ħajja tad-dielja fih u jipparteċipa mal-istess dielja sabiex jigglorifika lill-Missier? 

Talba

Mulej, jiena waħda mill-friegħi. 

Għini nagħraf li m’iniex iz-zokk u m’iniex il-bidwi. 

Għini nagħraf li l-frott li nagħti mhux ġej mingħandi, imma huwa biss konsegwenza tar-rabta intima miegħek u tal-umiltà li nħalli l-bidwi jiżborni kull meta jkun hemm bżonn. 

Għini ħa nibqa’ fik u kliemek fija … sabiex tassew nilħaq l-iskop li Inti ħlaqtni għalih u l-Missier jigglorifika lilu nnifsu permezz tiegħi, dixxiplu tiegħek. 

Ammen.

 

Ara l-Qari tal-Ħdud li għaddew