Talb ta’ nofs il-jum, illum it-Tlieta 21 ta’ Marzu 2023.
Salm 118 (119):137-144
XVIII (Sade)
Ġust int, Mulej; * u sewwa d-digrieti tiegħek. Bil-ġustizzja għamilt il-preċetti tiegħek, * u b’fedeltà mill-akbar.
Tifnini l-ħeġġa tiegħi, * għax insew kelmtek l-għedewwa tiegħi. Il-wegħda tiegħek jien ippruvajtha; * għalhekk iħobbha l-qaddej tiegħek.
Għalkemm jien żgħir u mżeblaħ, * ma ninsiex il-preċetti tiegħek. Ġustizzja ta’ dejjem hi l-ġustizzja tiegħek, * u sewwa l-liġi tiegħek.
Għalkemm id-diqa u n-niket waqgħu fuqi, * il-kmandamenti tiegħek baqgħu l-għaxqa tiegħi. Ġustizzja ta’ dejjem il-preċetti tiegħek; * agħtini d-dehen biex ikolli l-ħajja.
Glorja.
Kompli itlob billi żżur is-Salmi tal-ġurnata fuq https://brevjar.knisja.mt/
