Il-Ħames Ħadd tal-Għid

Kolletta

O Alla, inti tajtna l-fidwa u għamiltna wlied adottivi tiegħek; ħares bit-tjieba lejn l-ulied għeżież tiegħek, biex dawk kollha li jemmnu fi Kristu jkunu ħielsa tassew u jiksbu l-wirt ta’ dejjem. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen.

Riflessjoni

Illum u l-Ħadd li ġej se nkunu qegħdin naqraw minn wieħed mid-diskorsi ta’ Ġesù waqt l-aħħar ċena, speċifikament il-kapitlu 14 ta’ San Ġwann. Għalkemm kulma għandna ppreżentati lilna huma tnax-il vers, però lanqas tkun taf minn fejn se tibda biex forsi tifhem. Għaldaqstant se niffoka fuq l-istqarrija ewlenija li minnha jfur il-kumplament tad-diskors. Għall-mistoqsija ta’ Tumas, “Mulej, aħna ma nafux fejn inti sejjer. Kif nistgħu nafu t-triq?” Ġesù jwieġeb: “Jiena hu t-Triq, il-Verità u l-Ħajja.” Tumas huwa figura pjuttost prominenti fost id-dixxipli fl-Evanġelju skont San Ġwann, bix-xena ewlenija tkun dik ta’ meta jiltaqa’ ma’ Ġesù u, waqt li jpoġġi idu fuq il-pjagi ta’ Kristu, jistqarr: “Mulej tiegħi u Alla tiegħi!” U forsi għalhekk kien daqshekk stinata li ried jara l-pjagi biex jemmen u eventwalment jasal għal din l-istqarrija: proprju għax kien iffukat fuq dak li kien tassew neċessarju hekk li prattikament, waqt l-aħħar ċena, jistaqsi lil Ġesù: ‘Fejn sejjer? Fejn se twassalna?’ U forsi hu għalhekk li Tumas jitgerfex u jsib ruħu jħuf barra ċ-ċenaklu wara l-mewt ta’ Ġesù: ħassu mifxul għax tilef it-triq u min jitlef it-triq ma jibqax wieqaf jistenna l-bajtra taqa’ f’ħalqu, imma jipprova jfittex biex isib it-triq.  

U din ma kinetx triq kwalunkwe hekk li kieku Tumas kien jgħix fi żmienna malajr kien isolvi l-problema b’Google Maps, imma kienet it-Triq bit-t kapitali: Ġesù nnifsu. Ġesù nnifsu hu t-Triq li fiha rridu nimxu biex nagħrfu l-Verità u niksbu l-Ħajja. U hawn ukoll ‘Verità’ hi bil-v kapitali u ‘Ħajja’ bil-ħ kapitali. Għax, kif josserva San Tumas t’Aquino fil-Kummentarju tiegħu dwar l-Evanġelju skont San Ġwann (Cap. 14, lect. 2): Kristu hu t-Triq għaliex permezz tiegħu għandha d-dħul għal għand il-Missier (ara Ef 2, 18), u din jgħidha bħala bniedem għax meta sar wieħed minna reġa’ waqqaf il-pont bejna u bejn Alla li nkiser bid-dnub. Imma permezz tal-umanità ta’ Ġesù tinfetaħ it-Triq li twassal għal dak li ġej mid-divinità ta’ Ġesù għax bħala Alla huwa l-Verità nnifisha—u hu għalhekk li ma’ Pilatu ma jasalx wisq u nibqgħu mdendlin bil-mistoqsija, “U l-verità x’inhi?” għax il-Verità mhijiex xi ħaġa li tasal għaliha b’mod filosofiku, imma hi laqgħa mal-persuna ta’ Kristu, il-Kelma ta’ Alla nnifisha, il-Verità ta’ Alla li titħabbar lilna l-bnedmin—u bħala Alla huwa l-Ħajja nnifisha għax, kif naqraw fl-ewwel vrus tal-istess Evanġelju skont San Ġwann, “Kollox bih sar, u xejn ma sar mingħajru; kulma sar kellu l-ħajja fih, u l-ħajja kienet id-dawl tal-bnedmin” (Ġw 1, 3-4). F’kelma waħda, Ġesù hu s-sors tal-ħajja tagħna li għalih naslu billi nimxu t-triq tal-ħajja tagħna b’idna f’idu u nħallu l-passi tagħna jiddawlu mill-verità tal-Kelma tiegħu. 

Talba

Mulej, jiena waħda min-nagħaġ tiegħek.  

Mulej, naħseb li dan il-kliem tas-silta mill-Evanġelju tal-lum gerfixni xi ftit għax fih ħafna xi tixtarr fih. Imma ħaġa waħda hija tassew neċessarja: li nwieġbu għall-kmand tiegħek: “Emmnuni!” għax għalija personali inti tassew it-Triq, il-Verità u l-Ħajja. Il-bqija jaqa’ kollox f’postu waħdu għax pass pass int tkompli ddaħħalna fil-qalba tal-misteru ta’ mħabba bejnek u bejn il-Missier hekk li aħna wkoll insibu lilna nfusna għax nagħrfuna maħbuba u maħluqin bi skop u mhux bl-addoċċ.