Nhar Ħamis ix-Xirka filgħaxija, il-Knisja tfakkar u tiftakar fit-twaqqif tal-Ewkaristija u tas-Saċerdozju Ministerjali. Permezz ta’ din is-silta mill-Evanġelju skont San Ġwanni (13, 3-17), Kristu juri x’għandha tkun il-forma ta’ kif dawn iż-żewġ sagramenti għandhom jingħexu.

Lectio (Qari)

Aqra l-passaġġ bil-mod u b’attenzjoni. Hawn hu t-test:

3Ġesù kien jaf li l-Missier tah kollox f’idejh, u li hu kien ġie mingħand Alla u kien sejjer għand Alla. 4Qam minn fuq il-mejda, neħħa l-mantar minn fuqu, ħa fardal u rabtu ma’ qaddu. 5Imbagħad ferragħ l-ilma fil-lenbija, u beda jaħsel saqajn id-dixxipli u jixxuttahomlhom bil-fardal li kellu ma’ qaddu. 6Mela wasal fuq Xmun Pietru, u dan qallu: “Int, Mulej, taħsilli saqajja?” 7Ġesù wieġbu: “Int għalissa ma tafx x’qiegħed nagħmel jien; tifhmu aktar ’il quddiem.” 8Qallu Pietru: “Ma jkun qatt li inti taħsilli saqajja!” Wieġbu Ġesù: “Jekk ma naħsillekx saqajk, ma jkollokx x’taqsam miegħi.” 9Qallu Xmun Pietru: “Mulej, mhux saqajja biss, imma idejja u rasi wkoll.” 10Qallu Ġesù: “Min hu maħsul, ma għandux għalfejn jinħasel kollu, ħlief saqajh, għax hu kollu kemm hu nadif, u intom indaf, imma mhux ilkoll.” 11Għax hu kien jaf min kien sejjer jittradih; għalhekk qal, ‘M’intomx ilkoll indaf.’
12Wara li ħaslilhom saqajhom, libes il-mantar u raġa’ qagħad fuq il-mejda; u qalilhom: “Tafu x’għamiltilkom? 13Intom issejħuli ‘l-Imgħallem’ u ‘il-Mulej’, u tgħidu sewwa, għax hekk jien. 14Mela jekk jien, li jien il-Mulej u l-Imgħallem, ħsiltilkom saqajkom, hekk intom għandkom taħslu saqajn xulxin. 15Għax jien tajtkom eżempju, biex kif għamilt jien magħkom, hekk tagħmlu intom ukoll. 16Tassew tassew ngħidilkom, l-ilsir mhuwiex aqwa minn sidu, anqas il-messaġġier ma hu aqwa minn min jibagħtu. 17Jekk dawn il-ħwejjeġ tafuhom, henjin intom jekk tagħmluhom.

Meditatio (Meditazzjoni)

Irrifletti fuq il-passaġġ. Ikkunsidra dawn il-mistoqsijiet:

  • X’nitgħallem minn Ġesù li, minkejja li hu Alla, jagħżel li jinxteħet għarkupptejh quddiem l-oħrajn b’sens ta’ servizz?
  • Fejn fil-ħajja tiegħi għandi bżonn inħalli lil Ġesù “jaħsilli saqajja,” jiġifieri jnaddafni, iservini, jilqagħni?
  • Bħal Pietru, għandi xi reżistenzi fija għall-imħabba umli u bla kundizzjoni ta’ Ġesù?

Ħu ftit ħin biex taħseb dwar dawn il-mistoqsijiet u ħalli l-Ispirtu s-Santu jiggwidak fil-ħsibijiet tiegħek. Forsi tħoss li għandek tikteb ir-riflessjonijiet tiegħek jew tiddiskutihom ma’ gwida spiritwali.

Oratio (Talb)

Irrispondi għall-passaġġ fit-talb. Tista’ titlob:

  • Mulej, inti taħsilli saqajja b’idejk ħelwin u umli: għinni nħalli lilek taħdem fija.
  • Mulej, nixtieq nirringrazzjak mhux bil-kliem biss, imma billi niftaħ qalbi għalik.
  • Inti l-Imgħallem u l-Mulej, imma inti wkoll dak li taqdi: għinni nqatta’ ħajti nixbah lilek f’din il-ħlewwa.

Contemplatio (Kontemplazzjoni)

Strieħ fil-preżenza ta’ Alla. Ħalli l-kliem tal-passaġġ jinżel fil-fond ta’ qalbek. Oqgħod fil-kwiet u agħraf li inti magħqud ma’ Kristu kemm fil-mewt kif ukoll fil-qawmien tiegħu.

Actio (Azzjoni)

Ikkunsidra kif tista’ tapplika l-għarfien miksub minn dan il-passaġġ fil-ħajja ta’ kuljum. Forsi tista’:

  • din il-ġimgħa tħares lejn dawk li huma qrib tiegħek mhux bħala dawk li jriduni naqdihom, imma bħala dawk li ser inservi bi mħabba;
  • tagħżel ġest ċkejken imma konkret ta’ servizz li forsi qatt ma stennejt li tagħmel, bħalma Ġesù ħasel saqajn min kien se jittradih;
  • kull darba li tħossok “iktar minn ħaddieħor,” ftakar fil-fardal ta’ Ġesù, u għidlu: “Mulej, għallimni nħobb bħalek.”