Fil-messaġġ tiegħu għar-Randan ta’ din is-sena 2025, huwa u jitkellem dwar dan iż-żmien liturġiku bħala mixja flimkien fit-tama, il-Papa Franġisku jħeġġiġna u jgħidilna hekk:

Ejjew dil-mixja nagħmluha flimkien bit-tama ta’ wegħda. “It-tama li ma tqarraqx” (Rum 5, 5), il-messaġġ ċentrali tal-Ġublew, għandu jkun għalina x-xefaq tal-mixja tar-Randan lejn ir-rebħa tal-Għid. Kif għallimna fl-Enċiklika Spe Salvi l-Papa Benedittu XVI: “Il-bniedem jeħtieġ l-imħabba bla kundizzjonijiet. Jeħtieġ dik iċ-ċertezza li ġġagħlu jgħid: ‘La l-mewt u la l-ħajja, la l-anġli u la l-qawwiet, la ż-żmien t’issa u la ta’ li ġej, la setgħat, la l-għoli u lanqas il-fond, u ebda ħliqa oħra ma jistgħu qatt jifirduna mill-imħabba ta’ Alla li dehret fi Kristu Ġesù Sidna’ (Rum 8: 38- 39)” (par. 26). Ġesù, l-imħabba tagħna u t-tama tagħna, qam mill-mewt u jgħix u jsaltan glorjuż. Il-mewt inbidlet f’rebħa u hawn tinsab il-fidi u t-tama kbira tal-Insara: fil-qawmien mill-mewt ta’ Kristu!

Issa li qbiżna nofs ir-Randan u qed toqrob iċ-ċelebrazzjoni tal-Fidwa tagħna fit-Tlitt Ijiem Imqaddsa tal-Għid, ninsabu f’dak il-punt fejn, permezz tat-taħriġ tar-Randan imqaddes, il-konverżjoni ma tissarrafx biss fit-taqbida mal-ħażin hekk li naslu li nagħtuh daharna, imma l-konverżjoni ssir iktar id-dawrin tal-eżistenza kollha tagħna lejn Kristu.

Fil-messaġġ tiegħu, il-Papa jitkellem dwar is-sejħa “għall-konverżjoni tat-tama, tal-fiduċja f’Alla u fil-wegħda kbira tiegħu, il-ħajja ta’ dejjem.” Is-sejħa għall-konverżjoni tat-tama tfisser li naslu biex tassew nemmnu fil-fedeltà tal-Mulej li dejjem iżomm kelmtu magħna, tant li ħa ġisem bħal tagħna biex miegħu nkunu nistgħu ngħaddu mill-mewt għall-ħajja, sabiex hekk aħna wkoll naslu li nintelqu f’idejh u nafdawh b’ħajjitna.

Bil-kliem biss, tista’ tidher ħaġa sempliċi meta nħarsu lejha minn din il-perspettiva. Imma anke Kristu bħala bniedem, f’laħamna kellu wkoll iġġarrab it-taqbida sabiex jasal għall-abbandun totali fi ħdan il-Missier, saħansitra fil-mument tal-ikbar prova, sew fil-Ġnien taż-Żebbuġ u sew fl-għajta minn fuq salibek li ċċarrat is-smewwiet u theżheż l-art.

Il-Papa jagħlaq il-messaġġ tiegħu għar-Randan ta’ din is-Sena Mqaddsa b’din il-eżortazzjoni:

Ħuti, grazzi għall-imħabba ta’ Alla f’Ġesù Kristu, aħna ħarriesa tat-tama li ma tqarraqx (ara Rum 5, 5). It-tama hi “bħal ankra tar-ruħ, sħiħa u qawwija” (Lhud 6, 19). Bit-tama l-Knisja titlob sabiex “il-bnedmin kollha jsalvaw” (1 Tim 2, 4) u tistenna li tkun fil-glorja tas-sema magħquda ma’ Kristu, l-għarus tagħha. Hekk kienet tesprimi ruħha Santa Tereża ta’ Ġesù: “Ittama ruħ tiegħi, ittama. Int ma tafx il-jum u s-siegħa. Ishar bil-ħrara, kollox jgħaddi bħal żiffa riħ, minkejja li n-nuqqas ta’ paċenzja tiegħek jista’ jagħmel inċert dak li hu ċert, u jtawwal żmien li hu ferm qasir” (Stqarrijiet tar-ruħ lil Alla, 15.3).

Jalla f’dawn il-ġimgħat li fadal, bħala membri individwali u flimkien bħala komunitajiet, mhux biss inkompli bit-taħriġ tar-Randan imma, bħala l-Knisja, nitolbu lil “Kristu Ġesù t-tama tagħna” (ara 1 Tim 1, 1) biex iseħibna fis-sahra tiegħu u hekk dan iż-żmien ta’ grazzja jkun togħma tal-hena aħħarija tagħna: l-għaqda sħiħa miegħu.