Għall-Ġublew 2025, il-Papa Franġisku għażel il-motto Pellegrini tat-Tama. U, ngħiduha kif inhi, biex tiskomoda ruħek ħalli tagħmel pellegrinaġġ ifisser li xi forma ta’ tama għandek. F’pellegrinaġġ, interrqu tul rotot jew toroq li jwasslu għal imkejjen qaddisa jew ta’ importanza sinifikanti—post li fih tinsab it-tama tiegħi. U dan għaliex il-pellegrinaġġ tat-tama jdaħħalna fi ġrajja ikbar li tagħti sens u toffri orizzont ta’ tifsir lill-ħajjiet individwali tagħna u lill-ħajja tagħna flimkien: l-istorja tas-salvazzjoni, l-istorja tal-imħabba ħanina ta’ Alla għalina.

Imma attent! It-tama ma tfissirx ottimiżmu! L-ottimiżmu jimxi t-triq izappap għax jiffoka biss fuq il-parti pożittiva tar-realtà, mentri t-tama tmur lil hinn billi tpoġġilna saqajna t-tnejn mal-art, tiftħilna għajnejna biex inħarsu lejn ir-realtà sħiħa kif inhi, bis-sabiħ u l-ikrah tagħha, u nagħżlu li ma naqtgħux qalbha imma nafdaw. Kif osserva l-Papa Franġisku fl-udjenza ġenerali tas-7 ta’ Diċembru 2016:

L-ottimiżmu jqarraq bina, it-tama le! Għandna bżonnha ħafna, f’dawn iż-żminijiet li jidhru mudlama, meta xi drabi nħossuna mitlufin quddiem il-ħażen u l-vjolenza li jdawruna, quddiem it-tbatija ta’ tant minn ħutna. Hemm bżonn tat-tama! Inħossuna mitlufa u anki xi ftit qalbna maqtugħa, għax insibuna ma nistgħu nagħmlu xejn u donnu dan id-dlam mhu ħa jispiċċa qatt.
Imma ma rridux inħallu t-tama titlaqna, għax Alla bi mħabbtu jimxi magħna. “Jien nittama, għax Alla jinsab miegħi”: dan kollha nistgħu ngħiduh. Kull wieħed u waħda minna jista’ jgħid: “Jien nittama, għandi t-tama, għax Alla jimxi miegħi.” Jimxi u jżommli idi. Alla ma jitlaqniex waħidna. Il-Mulej Ġesù għeleb il-ħażen u fetħilna t-triq tal-ħajja.

Franġisku, Udjenza Ġenerali, 7 ta’ Diċembru 2016

It-tama Nisranija hi dinamika u ddawwal il-pellegrinaġġ tal-ħajja, waqt li tikxef il-wiċċ ta’ dawk l-aħwa li huma sieħba tagħna fil-vjaġġ. It-tama toħroġna mill-iżolament tal-“jien” tagħna u ddaħħalna fil-mixja tal-“aħna” tal-Poplu ta’ Alla. It-tama teħlisna miċ-ċertezza minna nfusna sabiex insibu ċ-ċentru tagħna fi Kristu ħalli minn hemm inkunu nistgħu noħorġu lejn dawk li jinsabu fil-periferija. Inkunu tassew Knisja li timxi ma’ min hu għajjien, Knisja li taf tistenna, Knisja li ttawwal idejha biex tfarraġ u tfejjaq … f’kelma waħda Knisja pellegrina li timxi mal-bniedem. Hekk il-pellegrinaġġ ikun tassew esperjenza spiritwali tal-preżenza ta’ Kristu Rxoxt li jiġborna flimkien f’merħla waħda taħt ragħaj wieħed.