Nistgħu ngħidu li l-pellegrinaġġ huwa antik daqskemm hu antik il-bniedem. F’kull kultura u twemmin reliġjuż insibu xi forma jew oħra ta’ pellegrinaġġ lejn post qaddis. Għax, jekk fl-Għeden il-bniedem mexa ’l bogħod minn Alla, fil-bniedem xorta waħda baqgħet ix-xewqa li jimxi lejn Alla, l-għajn li minnha ħareġ. Il-kotba tat-Testment il-Qadim huma mimlija b’din l-esperjenza tal-bniedem li jfittex lil Alla. Biżżejjed insemmu l-pellegrinaġġi ta’ Abraham, ta’ Iżakk, ta’ Ġakobb lejn Sikem, Betel u Mamre, fejn kull darba Alla wera ruħu u wiegħed l-Art Imqaddsa (Ġenesi 12, 6-7; 13, 18; 18, 1-15; 28, 10-23; 33, 18-20; 35, 1-15).
Jekk inkomplu nqallbu l-paġni tal-Bibbja ftit ieħor, għandna mbagħad l-akbar pellegrinaġġ tal-Poplu Lhudi mmexxi minn Mosè: il-pellegrinaġġ tal-ħelsien mill-jasar tal-Eġittu lejn il-muntanja tal-Mulej, is-Sinaj (ara Eż 19-20). Hawn il-poplu jirċievi l-Kmandamenti ta’ Alla u jwiegħed fil-preżenza ta’ Mosè li se jimxi skont din il-liġi. Imbagħad il-poplu Lhudi jkompli bil-mixja tiegħu lejn l-Art Imwiegħda bl-Arka tal-Patt li timxi fuq quddiem, u dan kollu kien ifisser għalih li tul dan il-pellegrinaġġ Alla qed jimxi dejjem miegħu.

Meta stabbilixxew ruħhom fl-art li Alla tahom, il-Lhud bdew jagħmlu diversi pellegrinaġġi partikularment lejn il-belt ta’ Ġerusalemm għaliex fiha kien hemm it-Tempju ta’ Alla l-Ħaj. Kull sena kienu jsiru tliet pellegrinaġġi lejn Ġerusalemm: dak għall-Festa tal-Ażżmi (l-Għid), dak għall-Festa tal-Ġimgħat (Pentekoste), u l-aħħar wieħed għall-Festa tat-Tined. Kull familja Lhudija kienet bi ħġarha tagħmel xi wieħed minn dawn il-pellegrinaġġi. Hekk is-Salmista jkanta: “Kemm hi għażiża d-dar tiegħek, Mulej tal-eżerċiti! Tixxennaq u tinfena ruħi għat-tempju tal-Mulej. Ngħanni ferħan b’ruħi u ġismi lil Alla l-ħaj” (Salm 84, 2-3).

L-Evanġelista Luqa (2, 41-52) jirrakkonta l-ġrajja ta’ meta Marija u Ġużeppi tilfu lil Ġesù waqt wieħed minn dawn il-pellegrinaġġi u wara sabuh fit-Tempju. Hija esperjenza li nġarrbuha ta’ spiss, kull meta fil-ħajja tagħna lil Ġesù nitilfuh. Iżda Luqa jfakkarna li nistgħu niltaqgħu miegħu mill-ġdid fit-Tempju. L-Evanġelji jirrakkuntawlna wkoll kif Kristu jiġi arrestat u maqtul f’Ġerusalemm meta Ġerusalemm kienet mimlija bil-pellegrini miġbura hemm biex jiċċelebra l-Għid. Anki l-ewwel diskors ta’ Pietru li fih huwa jipprietka li Kristu huwa ħaj, isir nhar Pentekoste, meta Ġerusalemm hija mimlija bil-pellegrini. Ġwanni l-Evanġelista saħansitra jurina li Ġesù nnifsu huwa t-Tempju ħaj ta’ Alla.

Kitba ta’ Dun Gerard Buhagiar