Jekk tixtieq li twassal sat-tmiem, ma tistax ma taħsibx għall-ilma. Jekk tinsa jew jispiċċalek, tista’ tgħaddi tixtri minn xi ħanut. Imma kun af li t-triq ma tgħaddikx dejjem mill-ibliet jew l-irħula, u fil-kampanja mhux se ssib faċilment għejun ta’ ilma.

Fl-imgħoddi, il-pellegrini kienu jużaw tip ta’ qargħa msejħa “tal-pellegrin” (gourd) li għandha d-dehra ta’ lanġasa. Il-pjanta tinżera’ f’April u l-frotta tinħasad fil-ħarifa qabel tibda l-kesħa. Imbagħad titħalla tinxef sakemm issir iebsa daqs l-injam u ssir ta’ lewn kannella ċar. Meta tkun nixfet, tinqata’ l-parti ta’ fuq sabiex tiġi mbattla għal kollox miż-żerriegħa u l-fdalijiet tal-qalba tal-frotta. Dan il-proċess iħalli reċipjent b’saħħtu imma fl-istess ħin ħafif, ideali għall-pellegrin biex fih iġorr l-ilma u jorbtu mal-ħatar.

L-għatx u l-ħtieġa għax-xrob huma karatteristiċi tal-pellegrin, anzi tal-bniedem b’mod ġenerali. Il-bniedem huwa dejjem bil-għatx, dejjem mixtieq, minkejja li forsi ma jafx għal xiex hu għatxan. U kontinwament ifittex li jaqta’ dan l-għatx, ukoll jekk idur għal għejun imdardra li jispiċċaw imarrduh.
Il-pellegrinaġġ huwa l-mument tiegħek biex fl-esperjenza tal-għatx fiżiku tagħraf dak li qalbek hija bil-għatx għalih. U inti u tfittex minn fejn se tikseb l-ilma taħt il-qilla tax-xemx ta’ nofs il-jum, jista’ jkun li tiltaqa’ ma’ Alla li hu bil-għatx għalik. Iva, sewwa qed taqra: Alla bil-għatx għalik! Hekk ġralha l-mara Samaritana li marret biex itella’ l-ilma mill-bir u hemmhekk tiltaqa’ ma’ Ġesù pellegrin f’art barranija li jitlob l-ilma filwaqt li jwiegħed l-ilma tal-ħajja ta’ dejjem (ara Ġw 4, 1-42).

San Girgor Nazjanzenu jfisser dan il-paradoss bi frażi konċiża u fl-istess ħin diffiċli biex taqlibha għall-Malti: Sitit sitiri, Alla bil-għatx li nkunu bil-għatx għalih (Oratio XL, In Sanctum Baptisma, par. 27, PG 36.397). Mhux ta’ b’xejn li Mother Theresa tagħha riedet li jkun hemm Kurċifiss imdaqqas fil-kappelli tad-djar tas-sorijiet u ħdejh ikun hemm il-kelmiet, “I thirst,” bħala eku tal-istqarrija tal-imħabba tiegħu għalina li għamel Ġesù fuq is-Salib (Ġw 19, 29).

U, meta l-pellegrinaġġ jasal fi tmiemu, meta l-għatx tal-bniedem pellegrin jiltaqa’ mal-għatx ta’ Alla li ma jehdiex ifittex lill-bniedem, hemm imbagħad anke hu jsir għajn tnixxi l-ilma sabiex dak li ġarrab fit-triq ma jkunx biss għalih imma jsir ukoll frott matur li bih jista’ jitma’ lil dawk li jiltaqa’ magħhom meta jerġa’ lura. “Min jieħdu l-għatx, jiġi għandi u jixrob. Kif tgħid l-Iskrittura, min jemmen fija, minnu joħorġu xmajjar ta’ ilma ħaj” (Ġw 7, 37-38).

Salm 63: Ruħi bil-għatx għalik
²Alla, Alla tiegħi int; lilek ħerqan infittex.
Ruħi bil-għatx għalik,
għalik imxennaq jiena,
bħal art niexfa, maħruqa, bla ilma.
³Għalhekk ġejt narak fit-tempju mqaddes tiegħek,
biex nitgħaxxaq bis-setgħa u l-glorja tiegħek.
⁴Għax it-tjieba tiegħek aħjar mill-ħajja,
xufftejja jxandru t-tifħir tiegħek.
⁵Għalhekk inbierkek tul ħajti kollha;
ngħolli idejja u nsejjaħ ismek.
⁶Bħal b’ikel mill-aħjar li jsemmen nimtela,
u jgħannilek fommi b’xufftejn ferrieħa,
⁷meta, mimdud fuq friexi, fik niftakar,
u naħseb fuqek fis-sahriet tal-lejl.
⁸Għax int kont għajnuna għalija,
għad-dell ta’ ġwenħajk ngħanni bil-ferħ.
⁹Miegħek tingħaqad ruħi,
int tweżinni bil-leminija tiegħek.Salm 63, 2-9