Hekk kif qed inqarrbu tmiem il-Ġublew Ordinarju tas-sena 2025, se nagħtu ħarsa ħafifa lejn xi aspetti jew elementi tat-tama, partikularment kif jidhru fil-Maġisteru tal-Knisja. Wieħed mill-aspetti tat-tama Nisranija hu bla dubju l-element eskatoloġiku—tal-aħħar—jiġifieri l-mewt, il-ġudizzju, u l-konsegwenza ta’ dan il-ġudizzju li prattikament infassluh aħna stess f’ħajjitna. Il-mod Nisrani ta’ kif nifhmu dan kollu m’għandux l-għeruq tiegħu fil-biża’ imma fit-tama—tama mhux biss fis-salvazzjoni individwali imma fit-tiġdid ta’ kollox fi Kristu. U din it-tama tista’ tilħaq il-milja tagħha f’Alla, fejn il-ġustizzja u l-ħniena huma perfetti u allura ma jmorrux kontra xulxin u ma joħolqux ‘kunflitt’. Dan jikkuntrasta mal-programmi purament umani li ma jistgħu qatt iwaqqfu dinja perfetta mingħajr ma jeliminaw il-libertà. Għall-kuntrarju, it-tama fil-ġudizzju fil-ġejjieni tista’ twettaq ix-xewqat l-iktar profondi tal-bniedem waqt li tixpruna l-konverżjoni tal-qalb f’din il-ħajja stess.

Hawnhekk ta’ min niftakru fl-ispjegazzjoni li l-Papa Benedittu XVI jinkludi fl-enċiklika Spe Salvi dwar il-purgatorju, li jifforma parti essenzjali mit-tama Nisranija proprju għax il-purgatorju huwa dak il-“post,” biex ngħidu hekk, jew stat fejn il-bniedem jingħatalu ċans, anke wara mewtu, li jsaffi t-tamiet tiegħu. Benedittu XVI jikteb hekk:

Xi teoloġi ta’ daż-żmien huma tal-opinjoni li n-nar li jaħraq u fl-istess ħin isalva huwa Kristu nnifsu, l-Imħallef u s-Salvatur. Il-laqgħa miegħu hija l-att deċiżiv tal-Ġudizzju. Quddiem ħarstu tiġi fix-xejn kull ħaġa falza. Hija l-laqgħa miegħu li, hi u taħraqna, tbiddilna u teħlisna biex tagħmilna tabilħaqq aħna nfusna. Dak li nbena f’ħajjitna jista’ mbagħad jidher bħal tiben niexef, kliem fieragħ, u kollox jaqa’. Iżda fin-niket ta’ din il-laqgħa, li fiha l-imniġġes u l-ħażin tal-eżistenza tagħna jidhru ċari quddiemna, tinsab is-salvazzjoni. Il-ħarsa tiegħu, il-mess ta’ qalbu jfejjaqna permezz ta’ bidla tabilħaqq ta’ wġigħ “bħallikieku bin-nar”. B’danakollu, huwa wġigħ hieni, li fih is-setgħa qaddisa ta’ mħabbtu tinfidna bħal fjamma, u fl-aħħar tħallina nkunu għal kollox aħna nfusna u b’hekk insiru kollna ta’ Alla.

Benedittu XVI, Enċiklika dwar it-Tama Nisranija, Spe Salvi (Novembru 30, 2007), par. 47.

U din it-tama ta’ salvazzjoni hija essenzjalment tama għall-oħrajn. Hu hekk biss li tassew issir tama għalija nnifsi wkoll. “Bħala Nsara ma għandna qatt nistaqsu biss: kif se nsalva lili nnifsi? Jeħtieġ nistaqsu wkoll: x’nista’ nagħmel biex l-oħrajn isalvaw u titla’ għalihom ukoll il-kewkba tat-tama? Imbagħad inkun għamilt kulma stajt nagħmel anki għas-salvazzjoni tiegħi personali” (par. 48).

Din hi t-tama li jeħtieġ ikollna, anzi t-tama li bħala ħlejjaq xbieha ta’ Kristu jrid ikollna: dik it-tama li ssir dik il-ħabba tal-qamħ li tmut biex tagħti l-ħajja. Ukoll jekk fil-mument tal-mewt, tad-diffikultà, tal-iebes tal-ħajja, ma tħoss xejn minn din it-tama, xorta waħda hemm qiegħda, moħbija, siekta, imma hemm, u, skont ma jqanqalna l-Ispirtu, it-tama ssir kelma li tidwi fil-vojt ta’ din id-dinja sabiex Alla jkun jista’ jimla kollox.