Is-Sitt Ħadd tal-Għid

Kolletta

O Alla li tista’ kollox, agħmel li niċċelebraw b’ħerqa kbira dawn il-ġranet ta’ ferħ li fihom qegħdin nagħtu ġieħ lill-Mulej li qam mill-imwiet, u agħtina li l-istess għemil tagħna jkun xhieda tal-ġrajja li qegħdin infakkru. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen.

Riflessjoni

Id-diskors tal-lum ikompli eżatt fuq id-diskors tal-bidwi, tad-dielja u tal-friegħi li qrajna l-ġimgħa l-oħra. Imma issa Ġesù ma jibqax jitkellem permezz ta’ tixbihat imma jirreferi direttament għalih innifsu bħala l-Iben li hu ħaġa waħda mal-Missier u li qed iħeġġiġna biex anke aħna jkollna l-istess intimità miegħu bħalma Hu għandu ma’ Missieru. 

Ir-rabta intima ta’ mħabba (u allura ta’ ubbiddjenza) bejn il-Missier, l-Iben u aħna hija bħal katina ta’ mħabba. Kull ħolqa mhix sempliċiment imwaħħla mal-oħra imma hija mdeffsa ġol-oħra. L-imħabba tal-Missier hija fl-Iben … kif l-imħabba tal-Iben hija fil-Missier u din sabet il-milja tagħha fl-ubbiddjenza sal-mewt tas-salib. Għax tassew, ma hemmx imħabba ikbar minn dik li wieħed jagħti ħajtu għal ħbiebu. 

F’dan id-diskors aħħari, Ġesù qed idewwaqna minn din l-istess imħabba. Il-ħolqa tiegħu hija mdeffsa ġol-ħolqa tagħna proprju permezz tal-imħabba li għaddielna b’ħajtu (u b’mewtu) stess mingħand il-Missier. U, bl-istess mod, il-ħolqa tagħna tibqa’ mdeffsa ġo tiegħu (u tal-Missier) permezz tal-istess imħabba li toffri lilha nnifisha b’ubbidjenza. Biex tassew aħna ninbidlu f’dak li nirċievu [l-Ewkaristija]. Hekk inġarrbu ġewwa fina l-ferħ sħiħ għax din l-unjoni ma tħalliniex qaddejja li ma nafux x’inhu jagħmel sidna, imma tibdilna fi ħbieb … jew aħjar tibdilna fil-maħbubin (philoi) ta’ Alla. L-imħabba, l-ubbidjenza u l-ferħ sħiħ huma wkoll imdeffsin ġo xulxin bħall-ħoloq f’katina. Jorbtuha flimkien għax huma l-oriġini u r-riżultat ta’ xulxin. Għalhekk hija katina waħda … rabta waħda. 

U, hekk kif ġejna maħbuba, Ġesù jikkmandana nħobbu: “Ħobbu lil xulxin kif ħabbejtkom jien” … bl-istess mod, bl-istess kejl, bl-istess għotja. Għax l-imħabba vera—dik li ġejja mill-Missier—issib il-milja tagħha fl-ubbidjenza tas-salib permezz tal-Iben, biex hekk aħna jkollna l-ferħ, u l-ferħ sħiħ.

Talba

Ġesù, bħalma tarbija fil-ġuf hija ħaġa waħda ma’ ommha, hekk jien nixtieq inkun ħaġa waħda miegħek. M’għażiltikx jien. Inti għażiltni u tibqa’ tagħżilni kuljum, avolja tafni sewwa u taf kemm faċilment nitbiegħed minnek. Il-ħolqa waħidha ma tagħmilx frott. U dan jien nafu sewwa għax ġarrabtu. Imma magħquda miegħek u mal-Missier qalbi ssib il-mistrieħ. 

Għini ħa nitgħallem inħobb bl-istess imħabba li doqt jien mingħandek. 

Għini ħalli din l-imħabba nsarrafha f’ubbidjenza, speċjalment meta ma nifhmekx.

Biex jiena u Inti nkunu l-maħbubin ta’ xulxin u nġarrab tassew il-ferħ tiegħek fija.

Ammen.