Ċekken lilu nnifsu; għalhekk Alla għollieh sas-smewwiet

Festa tal-Eżaltazzjoni tas-Salib Imqaddes

Kolletta

Nitolbu. O Alla, int ridt li Ibnek il-waħdieni jieħu l-mewt tas-salib biex isalva l-bnedmin; agħmel li, kif għarafna l-misteru tiegħu fuq l-art, hekk jistħoqqilna niksbu fis-sema l-frott tal-fidwa li tana Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen.

Meta xi ħadd kien jisfa’ migdum, kien iħares lejh u jfiq.
Numri 21:4b-9

Qari mill-Ktieb tan-Numri

F’dak iż-żmien,
x’ħin refgħu il-kamp
u telqu minn ħdejn il-muntanja Ħor,
l-Iżraelin għaddew mat-triq tal-Baħar tal-Qasab
biex jeħduha bid-dawra mal-art ta’ Edom,
imma l-poplu ddejjaq jimxi,
u beda jgerger kontra Alla u kontra Mosè:
«Għala tellajtuna mill-Eġittu biex immutu fid-deżert? M’hawnx ħobż u lanqas ilma; aħna xbajna b’dan l-ikel ħafif.»

U l-Mulej bagħat sriep velenużi f’nofs il-poplu
u bdew jigdmuhom;
u mietu ħafna mill-poplu ta’ Iżrael.
U l-poplu mar għand Mosè, u qalulu:
«Dnibna għax tkellimna kontra l-Mulej
u kontra tiegħek.
Itlob lill-Mulej ħa jwarrab is-sriep minn fostna.»
U Mosè mar jitlob għall-poplu.

U l-Mulej kellem lil Mosè u qallu:
«Agħmel serp tal-bronż velenuż,
u arbulah bħal stendard;
u kull min jingidem u jħares lejh ifiq u jgħix.»
U Mosè għamel serp tal-bronż,
u arbulah bħal stendard.
U ġara li kull min kien jigdmu s-serp
kien iħares lejn is-serp tal-bronż,
u kien ifiq u jgħix.

Il-Kelma tal-Mulej.
R/. Irroddu ħajr lil Alla.

Salm 77, 1-2, 34-38

R/. Tinsewx l-għemejjel kbar ta’ Alla.

Poplu tiegħi, agħtu widen għal-liġi tiegħi,
iftħu widnejkom għal kliem fommi.
Niftaħ fommi biex inxandar kliem l-għerf;
nitkellem fuq ħwejjeġ moħbija mill-qedem. R/.

Kienu jfittxuh meta kien jeqridhom,
kienu jindmu u jfittxu lill Alla bil-ħerqa;
kienu jiftakru li Alla l-blata tagħhom,
Alla l-Għoli l-feddej tagħhom. R/.

Imma kienu jqarrqu bih bi kliemhom,
kienu jigdbulu bi lsienhom.
Għax qalbhom ma kinitx sewwa miegħu,
ma kinux fidili mal-patt tiegħu.R/.

Iżda hu kien iħenn u jaħfrilhom il-ħtija,
ma kienx jasal biex jeqridhom;
ħafna drabi kien iżomm il-korla,
ma kienx jixgħel qilltu kollha. R/.

Ċekken lilu nnifsu; għalhekk Alla għollieh sas-smewwiet.
Fil 2:6-11

Qari mit-Tieni Ittra ta’ San Pawl Appostlu lil Filippin

Ġesù Kristu li kellu n-natura ta’ Alla,
ma qagħadx ifittex tiegħu li hu daqs Alla,
iżda xejjen lilu nnifsu billi ħa n-natura ta’ lsir;
sar jixbah lill-bnedmin,
u deher minn barra bħala bniedem;
ċekken lilu nnifsu,
billi obda sal-mewt,
anzi sal-mewt tas-salib.
Għalhekk Alla għollieh sas-smewwiet
u żejnu bl-Isem li hu fuq kull isem,
biex fl-isem ta’ Ġesù fis-sema, fl-art u f’qiegħ l-art –
il-ħlejjaq kollha jinżlu għarrkubbtejhom,
u kull ilsien jistqarr:
«Ġesù Kristu hu l-Mulej, għall-glorja ta’ Alla l-Missier.»

Il-Kelma tal-Mulej.
R/. Irroddu ħajr lil Alla.

Akklamazzjoni qabel l-Evanġelju

Hallelujah. R/. Hallelujah.
Nadurawk, Kristu, u nberkuk,
għax b’salibek fdejt lid-dinja.
R. Hallelujah.

Jinħtieġ li Bin il-bniedem ikun merfugħ.
Ġw 3:13-17

Qari mill-Evanġelju skont San Ġwann

F’dak iż-żmien, Ġesù qal lil Nikodemu:
«Ħadd ma tela’ s-sema ħlief Bin il-bniedem,
li niżel mis-sema.
U kif Mosè rafa’ s-serp fid-deżert,
hekk jeħtieġ li jkun merfugħ Bin il-bniedem,
biex kull min jemmen fih ikollu l-ħajja ta’ dejjem.
Għax Alla hekk ħabb lid-dinja
li ta lil Ibnu l-waħdieni,
biex kull min jemmen fih ma jintilifx,
iżda jkollu l-ħajja ta’ dejjem.»
Għax Alla ma bagħatx lil Ibnu fid-dinja
biex jagħmel ħaqq mid-dinja,
imma biex id-dinja ssalva permezz tiegħu.»

Il-Kelma tal-Mulej
R/. Tifħir lilek Kristu.

Riflessjoni

Għall-festa tal-Eżaltazzjoni tas-Salib Imqaddes, il-Knisja tippreżentalna s-silta mill-Evanġelju skont San Ġwann li tkellimna dwar l-imħabba ta’ Alla għad-dinja, kollha kemm hi. Tabilħaqq, is-Salib huwa simbolu ta’ tbatija. Iżda, għalina l-Insara, is-Salib huwa simbolu tal-imħabba ta’ Alla: “Għax Alla hekk ħabb lid-dinja li ta lil Ibnu l-waħdieni, biex kull min jemmen fih ma jintilifx, iżda jkollu l-ħajja ta’ dejjem” (v.16). B’dan il-kliem, l-Evanġelista jinsisti li r-raġuni tal-inkarnazzjoni u l-mewt ta’ Sidna Ġesù Kristu hija l-imħabba, u proprju dan li qed niċċelebraw illum: ix-xhieda ta’ mħabba li Ġesù wera lejna meta ta ħajtu għalina fuq is-Salib Imqaddes. 

Il-festa tal-Eżaltazzjoni tas-Salib tfakkarna fl-umiltà, fiċ-ċokon, u fl-ubbidjenza, li wasslu lil Ġesù sat-tron tas-Salib. Il-Mulej Ġesù m’għażilx is-salib bħala skop fih innifsu, iżda, biex iwettaq ir-rieda talMissier, “obda sal-mewt, anzi sal-mewt tas-salib” (Fil 2, 8). Minn fuq is-salib, Sidna Ġesù Kristu ta ħajtu biex jiksbilna tama u ħajja ġdida. Minn fuq l-istess salib Sidna Ġesù Kristu kien merfugħ ’l fuq fil-glorja tal-Missier. 

U aħna kif inħarsu lejn is-salib, li, irridu jew ma rridux jiġi fuqna fil-ħajja? Tassew li s-Salib spiss jitfagħna fid-dlam, u xi drabi nħossuna abbandunati. Iżda, is-Salib jista’ jkun għalina grazzja, mezz li jgħinna nissaffew mill-imħabba tagħna nfusna biex noħorġu fid-deher ix-xbiha ta’ Alla li hemm fina. Dan nagħmluh meta nilqgħu s-salib bil-fidi u s-sabar, u nagħrfu ngħaqqdu t-tbatija tagħna ma’ ta’ Kristu. 

Il-festa tal-Eżaltazzjoni tas-Salib tħeġġiġna sabiex naduraw u nżommu ħarsitna fuq Kristu, merfugħ ’l fuq, “biex kull min jemmen fih ikollu l-ħajja ta’ dejjem” (v.15). Kif jgħidilna San Pawl: “Il-predikazzjoni tas-salib hija bluha għal dawk li jintilfu; imma għal dawk li jsalvaw, għalina, hi l-qawwa ta’ Alla” (1 Kor 1, 18). 

Talba

Ħa nkabbrek, Alla tiegħi, sultan, 

u nbierek ismek għal dejjem ta’ dejjem. 

Kuljum irrid inbierkek, 

u nfaħħar ismek għal dejjem ta’ dejjem. 

Tifħir il-Mulej ixandar fommi; 

u jbierek kulħadd l-isem qaddis tiegħu 

għal dejjem ta’ dejjem! (Salm 145, 1-2. 21)

 

Ara l-Qari tal-Ħdud li għaddew