Henjin l-imnikkta

Ir-Raba’ Ħadd matul is-Sena A

Kolletta

Mulej Alla tagħna, agħtina li nqimu lilek b’ruħna kollha, u li nħobbu lil kulħadd bi mħabba spiritwali. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen.

Ammen.

Inħalli f’nofsok poplu umli u mċekken.
Sof 2:3; 3:12-13

Qari mill-Ktieb tal-Profeta Sofonija

Fittxu lill-Mulej ilkoll,
intom, l-umli tal-art,
li tagħmlu ordnijietu,
fittxu l-ġustizzja, fittxu l-umiltà;
biex forsi f’jum il-korla tal-Mulej
ikollkom fejn tistkennu.

“U nħalli f’nofsok poplu umli u mċekken”.
U f’isem il-Mulej ifittxu l-kenn
dawk li jifdal minn Iżrael.
Ma jagħmlux ħażen, ma jgħidux kliem b’ieħor,
u lsien qarrieq ma jibqax iżjed f’fommhom,
hekk li joqogħdu jirgħu u jistrieħu
bla ma jbeżżagħhom ħadd.

Il-Kelma tal-Mulej.
R/. Irroddu ħajr lil Alla

Salm 145(146):7,8-9a,9bc-10

R/. (Mt 5:3): Henjin il-foqra fl-ispirtu.

Il-Mulej jagħmel ħaqq lill-maħqurin,
u jagħti l-ħobż lill-imġewħin.
Il-Mulej jeħles lill-imjassrin. R/.

Il-Mulej jiftaħ għajnejn l-għomja;
il-Mulej jerfa’ lill-milwijin;
il-Mulej iħobb lill-ġusti;
il-Mulej iħares lill-barranin. R/.

Hu jżomm lill-iltim u lill-armla,
imma lill-ħżiena jħarbtilhom triqathom.
Il-Mulej isaltan għal dejjem;
Alla tiegħek, Sijon, minn nisel għal nisel. R/.

Alla għażel il-ħwejjeġ dgħajfa tad-dinja.
1 Kor 1:26-31

Qari mill-Ewwel Ittra ta’ San Pawl Appostlu lill-Korintin

Ħuti, qisu s-sejħa tagħkom: għax mhumiex ħafna fostkom li huma għorrief skond il-qies tad-dinja; mhumiex ħafna s-setgħana, mhumiex ħafna n-nobbli.

Imma Alla għażel in-nies boloh għad-dinja biex iħawwad l-għorrief; għażel id-dgħajfa tad-dinja biex iħawwad il-qawwija; għażel il-mistmerra mid-dinja, u n-nies li ma huma xejn, biex iġib fix-xejn lil dawk li huma xi ħaġa. Hekk ebda bniedem ma jkun jista’ jiftaħar quddiem Alla.

Minnu li intom tinsabu fi Kristu Ġesù li sar għalina l-għerf mingħand Alla, ġustizzja, qdusija u fidwa, biex bħalma hu miktub, min jiftaħar, ħa jiftaħar fil-Mulej.

Il-Kelma tal-Mulej.
R/. Irroddu ħajr lil Alla.

Akklamazzjoni qabel l-Evanġelju
ara Mt 5:12a

Hallelujah. R/. Hallelujah.
Ifirħu u thennew,
għax ħlaskom kbir fis-smewwiet.
R. Hallelujah.

Henjin l-imnikkta
Mt 5:1-12a

Qari mill-Evanġelju skond San Mattew

F’dak iż-żmien, kif ra l-folol, Ġesù tala’ fuq il-muntanja, qagħad bilqiegħda, u resqu lejh id-dixxipli tiegħu. Fetaħ fommu u qabad jgħallimhom u jgħid:

“Henjin il-foqra fl-ispirtu,
għax tagħhom hija s-Saltna tas-Smewwiet.
Henjin l-imnikkta,
għax huma jkunu mfarrġa.
Henjin ta’ qalbhom ħelwa,
għax huma jkollhom b’wirthom l-art.
Henjin dawk li huma bil-ġuħ u bl-għatx tal-ġustizzja,
għax huma jkunu mxebbgħin.
Henjin dawk li jħennu,
għax huma jsibu ħniena.
Henjin dawk li huma safja f’qalbhom,
għax huma jaraw lil Alla.
Henjin dawk li jġibu l-paċi,
għax huma jissejħu wlied Alla.
Henjin dawk li huma ppersegwitati minħabba s-sewwa,
għax tagħhom hija s-Saltna tas-Smewwiet.
Henjin intom, meta jgħajrukom u jippersegwitawkom
u jaqilgħu kull xorta ta’ ħażen u gideb kontra tagħkom minħabba fija.
Ifirħu u thennew, għax ħlaskom kbir fis-smewwiet”.

Il-Kelma tal-Mulej.
R/. Tifħir lilek, Kristu.

Riflessjoni

Kull nisrani huwa msejjaħ biex jgħix fid-dinja imma ma jkunx tad-dinja. Ħafna drabi jkollu jitħabat kontra l-kurrent. Mhux ta’ b’xejn li Ġesù sejjaħ dixxipli sabiex jagħmilhom ‘sajjieda tal-bnedmin’ biex jgħinuh isalva lil dawk li jkunu nġarru mal-kurrent. Biex jagħmel dan id-dixxiplu jeħtieġ li joqgħod f’riġlejn l-Imgħallem jisimgħu b’qalb miftuħa u jħalli l-kelma tiegħu tagħmel l-għeruq f’qalbu. Proprju din hi x-xena li jpinġilna l-Evanġelista llum: “Ġesù tala’ fuq il-muntanja, qagħad bilqiegħda, u resqu lejh id-dixxipli tiegħu. Fetaħ fommu u qabad jgħallimhom …” (v. 1-2).

Il-vjaġġ tad-dixxiplu li jilqa’ s-sejħa biex jimxi wara Ġesù jibda bil-konverżjoni, u jkompli fit-triq imfassla fuq il-Beatitudnijiet, it-triq tal-imħabba lejn Alla u lejn il-proxxmu, it-triq li jgħallimna Ġesù u li twassal għall-hena tassew. Nistgħu ngħidu li l-karatteristiċi li jitkellem dwarhom Ġesù f’dan id-diskors joħorġu l-personalità tiegħu, u, għalhekk, kull dixxiplu li jimpenja ruħu biex jgħix ta’ nisrani għandu jiktibhom f’qalbu u jagħmel minn kollox biex iħaddanhom.

Il-fqir fl-ispirtu huwa hieni għax mhuwiex marbut mal-ġid materjali jew imkabbar bih innifsu iżda sempliċi u umli, lest li jagħti kollox bl-imħabba. Il-fqir fl-ispirtu ma jqis li għandu xejn tiegħu, fl-istess ħin għandu kollox għax għandu lil Kristu jsaltan f’qalbu. It-tama tal-bniedem hieni hija f’Alla anke fin-niket u t-tbatija. Huwa jitnikket meta jara l-ħażen, iħoss l-uġigħ u juri solidarjetà mal-batut. Is-Saltna tas-Smewwiet nibnuha bil-ħlewwa u bl-umiltà. Il-bniedem ta’ qalbu ħelwa mhuwiex dgħajjef jew beżżiegħ imma b’saħħtu quddiem l-isfidi tal-ħajja. Ma jweġibx bil-vjolenza għall-vjolenza jew inġustizzja imma dejjem ifittex li jġib il-paċi. Ġesù jsejjaħ hieni lil dak li jfittex li sseħħ il-ġustizzja, jaħdem għall-paċi u juri ħniena ma’ min jiżbalja jew jinsab fil-bżonn. Hieni l-bniedem li għandu ’l Kristu jgħix fih u jħalli l-kelma tiegħu ssaffilu qalbu. Huwa sinċier f’dak kollu li jagħmel, u jagħmel kollox bl-imħabba bħal Kristu. Il-bniedem tas-Saltna jeħtieġ li jkun kuraġġuż biex ma jibżax jagħmel dak li hu tajjeb anke meta ta’ madwaru jidħqu bih jew jarawh differenti minnhom.

It-taqbida tan-nisrani hija dejjem bejn is-Saltna tas-Smewwiet u d-dinja li tgħożż il-poter, il-flus, is-suċċess, id-divertiment. Dak li jitlob minna l-Mulej nistgħu ngħixuh biss bl-Ispirtu Qaddis tiegħu li jgħammar fina. Tajjeb li fl-aħħar ta’ kull jum narblu lilna nfusna biex naraw x’għażliet qegħdin nagħmlu fil-ħajja tagħna. Il-Beatitudnijiet huma t-triq tal-ħajja; henjin aħna jekk ngħixuhom!

Talba

Kemm hi għażiża t-tjieba tiegħek, o Alla!

Għad-dell ta’ ġwenħajk jistkennu wlied il-bnedmin.

Jixbgħu bil-ġid tad-dar tiegħek,

tisqihom ix-xmara tal-hena tiegħek.

Għax għandek hemm l-għajn tal-ħajja,

fid-dawl tiegħek naraw id-dawl.

Żomm it-tjieba tiegħek ma’ min jagħrfek,

il-ġustizzja tiegħek ma’ min hu qalbu safja.

(Salm 36, 8-11)

 

Ara l-Qari tal-Ħdud li għaddew