Sbatax-il Ħadd taż-Żmien ta’ Matul is-Sena

Kolletta

O Alla, li tħares lil min jittama fik, mingħajrek xejn ma jiswa, xejn ma hu qaddis; kattar fuqna l-ħniena tiegħek, u kun int li taħkem fuqna u tmexxina, ħalli ninqdew tajjeb bil-ġid li jgħaddi hekk li nagħrfu norbtu ruħna minn issa mal-ġid li jibqa’ għal dejjem. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen. 

Riflessjoni

Il-Liturġija tal-Kelma llum iddur madwar l-għerf. Il-għerf mhumiex knowledge, imma hu wisdom. L-umli biss jistgħu jakkwista dan il-għerf li jiġi biss minn Alla. Ġaladarba jibda jakkwistah, jagħraf x’inhu l-aqwa teżor ta’ ħajtu. 

Dan l-għerf  jurik kemm int aljenat b’elf ħaġa fil-ħajja; jurik li hemm bżonn tad- dixxerniment għaliex permezz ta’ dan  jibda jitnaddaf il-moħħ, il-qalb u l-persuna sħiħa tal-bniedem.  B’hekk jista’ jibda  jakkwista dik is-serenità li Alla biss jaf jagħti meta l-bniedem fis-skiet tiegħu jilqa’ l-grazzja ta’ Alla.   

Fis-skiet ta’ qalbu l-bniedem jibda jirrealizza li għandu bżonn jirranġa l-prijoritajiet ta’ ħajtu: Jibda jagħraf dak li hu tassew essenzjali qalb affarijiet oħra. Jibda jagħraf li mal-medda taż-żmien akkumula fih u madwaru ħafna memorji li mhux kollha jistgħu jagħtuh il-paċi. Immela hemm bżonn li jiddixxerni, li jagħżel, li jiddistakka ruħu minn xi affarijiet, li jbiddel oħrajn, u li jaċċetta dak li ma jistax ibiddel għaliex dan qiegħed hemm sabiex jgħinu jimmatura u jitqaddes. Huwa dan l-għerf qaddis li  jwassal lill-bniedem sabiex isib it-teżor veru ta’ ħajtu.  

Dan l-għerf ta’ Alla jaf jonġorr, jorqom, inaddaf il-ġewwini tal-bniedem kemm-il darba dan jiftaħ il-bibien ta’ ħajtu beraħ għal Ġesù Kristu u jagħmlu l-prijorità assoluta tiegħu, it-teżor moħbi fil-għalqa ta’ ħajtu mgħixa f’soċjetà li tistinka tfittex it-teżori kullimkien minbarra f’Ġesù Kristu.  

– Għaliex tibża’ mis-skiet li jġibek wiċċ imb wiċċ mal-verità ta’ ħajtek? 
– Taf li fejn hemm it-teżor tiegħek hemm tinsab qalbek. Insaqsik, fejn hi qalbek, fuq xiex tistrieħ?  
– Għaliex iżżomm ruħek hekk aljenat b’ħafna affarijiet, meta taf li dawn ma jagħtukx dak li għalih hemm għatx klubi fil-ġewwieni tiegħek?  
– Għaliex tibża’ tinżel għarkupptejk u titlob lil Alla jgħinnek tnaddaf ħajtek, speċjalment il-memorja tiegħek?   
– Għaliex tibża’ titlob lil Alla jgħinnek taċċetta dak li ilek taħrab minnu f’ħajtek? Emmen, u  aċċettah. L-importanti li tibqa’ żżomm lil Ġesù Kristu l-prijorità tiegħek f’ħajtek, u tiegħu biss tkun dixxiplu.  

Talba

Mulej, iftaħli qalbi, moħħi, il-ħajja kollha tiegħi sabiex naċċetta l-għerf tiegħek. Jiġru ħafna affarijiet f’ħajti li ma nifhimhomx, imma nemmen li fl-imħabba tiegħek, dawn huma mumenti ta’ grazzji kbar. Għinni negħleb il-bosta biżgħat li jxekkluni milli nħallik tkun il-prijorità assoluta f’ħajti. Ammen.