Il-bieb tan-nagħaġ huwa jien

Ir-Raba’ Ħadd tal-Għid

Kolletta

O Alla ta’ dejjem li tista’ kollox, mexxina lejn ix-xirka tal-henjin fis-sema, biex aħna, il-merħla ċkejkna tiegħek, naslu fejn daħal qabilna r-Ragħaj qawwi tagħna, Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen.

Alla lil Ġesù għamlu Mulej u Kristu.
Atti 2, 14a.36-41

Qari mill-Ktieb tal-Atti tal-Appostli
Nhar Għid il-Ħamsin, Pietru flimkien mal-Ħdax qam u qal lil-Lhud b’leħen għoli: “Ħa jkun jaf fiż-żgur il-poplu kollu ta’ Iżrael li lil dan Ġesù, li intom sallabtuh, Alla għamlu Mulej u Messija”.

Dan il-kliem li semgħu laqtilhom qalbhom, u qalu lil Pietru u lill-appostli l-oħra: “L-aħwa, x’għandna nagħmlu aħna?”. U Pietru weġibhom: “Indmu, u jitgħammed kull wieħed minnkom fl-isem ta’ Ġesù Kristu għall-maħfra ta’ dnubietkom; u intom tirċievu d-don tal-Ispirtu s-Santu. Għax il-wegħda qiegħda għalikom u għal uliedkom u għal dawk kollha li huma fil-bogħod, dawk kollha li l-Mulej Alla tagħna sejħilhom”.

U b’ħafna kliem ieħor tahom xhieda u wissiehom billi qalilhom: “Salvaw lilkom infuskom minn dan in-nisel ħażin”. Għalhekk dawk li laqgħu kliemu tgħammdu u dakinhar ingħaqdu mad-dixxipli madwar tlitt elef ruħ.

Il-Kelma tal-Mulej.
R/. Irroddu ħajr lil Alla

Salm 22 (23), 1-3a. 3b-4. 5. 6.

R/. (1): Il-Mulej hu r-ragħaj tiegħi: xejn ma jonqosni
Jew R/. Hallelujah, hallelujah, hallelujah

Il-Mulej hu r-ragħaj tiegħi:
xejn ma jonqosni.
F’mergħat kollha ħdura jqegħedni,
ħdejn l-ilma, fejn nistrieħ, jeħodni.
Hemm hu jrejjaqni. R/.

Imexxini fit-triq tas-sewwa
minħabba l-isem tiegħu.
Imqar jekk nimxi f’wied mudlam,
ma nibżax mill-ħsara, għax inti miegħi.
Il-ħatar tiegħek u l-għasluġ tiegħek,
huma jwennsuni. R/.

Inti tħejji mejda għalija
quddiem l-għedewwa tiegħi.
Biż-żejt tidlikli rasi,
u l-kalċi tiegħi tfawwarli. R/.

Miegħi, iva, jimxu t-tjieba u l-ħniena
il-jiem kollha ta’ ħajti.
U ngħammar f’dar il-Mulej
sakemm indum ħaj! R/.

Intom erġajtu lura għand ir-ragħaj u l-għassies ta’ ruħkom.
1 Piet 2, 20b-25

Qari mill-Ewwel Ittra ta’ San Pietru Appostlu
Għeżież, jekk tagħmlu t-tajjeb
u ssofru t-tbatija bis-sabar, din tkun grazzja quddiem Alla.
Għal dan intom kontu msejħa,
għax Kristu wkoll bata għalikom
u ħallielkom eżempju,
biex timxu fuq il-passi tiegħu:
hu li ma kien għamel ebda dnub,
u ebda qerq ma nstab f’fommu,
meta għajruh ma weġibx bit-tagħjir,
meta bata ma heddidx
imma ħalla f’idejn l-Imħallef ġust.

Hu tgħabba bi dnubietna
sa fuq is-salib,
biex aħna mmutu għad-dnubiet,
u ngħixu għall-ġustizzja.

Bil-ġrieħi tiegħu intom fiqtu.
Intom kontu bħal nagħaġ mitlufa,
imma issa rġajtu lura għand ir-ragħaj
u l-għassies ta’ ruħkom.

Il-Kelma tal-Mulej
R/. Irroddu ħajr lil Alla

AKKLAMAZZJONI QABEL L-EVANĠELJU
Ġw 10, 14

Hallelujah. R/. Hallelujah
Jiena r-ragħaj it-tajjeb, jgħid il-Mulej;
jiena nagħraf in-nagħaġ tiegħi,
u n-nagħaġ tiegħi jagħrfu lili.
R/. Hallelujah.

Il-bieb tan-nagħaġ huwa jien.
Ġw 10, 1-10

Qari mill-Evanġelju skond San Ġwann
F’dak iż-żmien, Ġesù qal: “Tassew tassew ngħidilkom, min ma jidħolx fil-maqjel tan-nagħaġ mill-bieb imma jaqbeż ġewwa minn naħa oħra, dak hu ħalliel u brigant. Imma min jidħol mill-bieb hu r-ragħaj tan-nagħaġ.

Min ikun mal-bieb lilu jiftaħ, in-nagħaġ minn leħnu jisimgħu, u hu jsejjaħ in-nagħaġ tiegħu waħda waħda b’isimhom u joħroġhom barra. U meta joħroġ in-nagħaġ tiegħu, huwa jmur quddiemhom u n-nagħaġ jimxu warajh, għax jisimgħu leħnu. Imma wara wieħed barrani ma jimxux, anzi jaħarbu minnu, għax leħen barrani ma jafuhx”.

Din il-parabbola qalhielhom Ġesù, iżda huma ma fehmux x’ried jgħidilhom biha. Għalhekk Ġesù raġa’ qalilhom: “Tassew, tassew ngħidilkom li l-bieb tan-nagħaġ huwa jien. Dawk kollha li ġew sa issa qabli huma ħallelin u briganti. Iżda n-nagħaġ lilhom ma semgħuhomx. Jiena hu l-bieb; jekk xi ħadd jidħol ġewwa permezz tiegħi jsalva, u jidħol u joħroġ u jsib fejn jirgħa. Il-ħalliel ma jidħolx jekk mhux biex jisraq u joqtol u jeqred. Jiena ġejt biex ikollkom il-ħajja, u ħajja bil-kotra”.

Il-Kelma tal-Mulej.
R/. Tifħir lilek, Kristu.

Riflessjoni

Fir-rakkont tal-lum niltaqgħu ma’ Ġesù jgħallem (u jikkritika lill-Fariżej) permezz ta’ diversi parabboli żgħar magħqudin flimkien, u kif ukoll permezz ta’ tixbihat allegoriċi (mashal bil-Lhudi). Dan id-diskors jambjenta ruħu eżatt wara l-attakk ta’ Ġesù fuq il-mexxejja għomja ta’ żmienu, jiġifieri fuq il-Fariżej.  

L-istampa tan-nagħaġ, u l-figura tar-ragħaj li jieħu ħsiebhom, żgur li mhix stampa ġdida la għalina u lanqas għal dawk li kienu qed jisimgħu lil Ġesù. Ir-rakkont tal-lum nistgħu naqsmuh fi 3 partijiet: 
1. Ġesù jiddistingwi bejn ir-ragħaj veru u dak brigant; 
2. Ġesù jagħti l-karatteristiċi ta’ kif ikun ir-ragħaj veru; 
3. Ġesù jispjega t-tixbiha tal-bieb lid-dixxipli li ma fehmux. 

Fl-ewwel parti nsibu lil Ġesù li jqabbel ir-ragħaj veru ma’ dak li ġie biex jisraq. Kif jintgħaraf dan? Kif nindunaw min hu l-veru? Kif nagħrfuh lill-ħalliel? Ġesù jagħtina risposta sempliċi ħafna: skont minn fejn qed jgħaddi biex jidħol fil-maqjel, jekk jidħolx mill-bieb jew jekk jaqbiżx min naħa oħra. Lejn dan irridu nħarsu: jekk ir-ragħaj tagħna hux qed jagħżel il-bieb jew jekk hux qed jevita l-bieb.  

Fit-tieni parti nsibu lil Ġesù jagħtina tant dettalji sbieħ fuq ir-ragħaj veru: 
– jafna b’isimna u jsejħilna waħda waħda; 
– il-leħen tiegħu huwa familjari tant illi n-nagħaġ jagħrfu leħnu; 
– ma jħallix in-nagħaġ ġol-maqjel, imma joħroġhom barra waqt li jimxi quddiemhom. 

Fit-tielet u l-aħħar parti nsibu lil Ġesù nnifsu jispjega l-parabbola lid-dixxipli wara li dawn ma fehmuhx. Ġesù jidentifika lilu nnifsu mal-bieb. Permezz tiegħu nsibu fejn nirgħu. Permezz tiegħu jkollna l-ħajja, u l-ħajja bil-kotra.  

Talba

Mulej, jiena waħda min-nagħaġ tiegħek.  

Għinni nagħraf ragħaj minn ieħor. Għinni ninduna min hu dak li jidħol mill-bieb u min hu dak li jevita l-bieb. Aħfirli meta mxejt wara rgħajja oħra. Aħfirli meta għażilt lilhom flok lilek.  

Għinni nkun midħla ta’ leħnek ħalli meta tgħajjatli b’ismi nagħraf leħnek u nimxi warajk … għax għandek biss hemm il-milja tal-ferħ … għandek biss hemm is-salvazzjoni. Ammen. 

 

Ara l-Qari tal-Ħdud li għaddew