Tielet u Għoxrin Ħadd ta’ Matul is-Sena A

Kolletta

O Alla, inti tajtna l-fidwa u għamiltna wlied adottivi tiegħek; ħares bit-tjieba lejn l-ulied għeżież tiegħek, biex dawk kollha li jemmnu fi Kristu jkunu ħielsa tassew u jiksbu l-wirt ta’ dejjem. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen. 

Riflessjoni

Fir-rakkont tal-lum mill-Evanġelju ta’ San Mattew insibu pass pass ta’ kif għandna nikkoreġu lil xulxin fil-Knisja. Tajjeb ninnutaw li dawn l-istruzzjonijiet insibuhom eżatt wara l-parabbola tan-nagħġa l-mitlufa, fejn ir-ragħaj jagħmel minn kollox u saħansitra jitlaq id-disgħa u disgħin l-oħra sa ma jsib lil dik li tkun intilfitlu (Mt 18, 12-14). Kif nistgħu, aħna l-bnedmin, inkunu ta’ rgħajja twajba għal xulxin? Kif ġab ruħu l-Mulej man-nagħġa l-mitlufa? U allura kif għandna nġibu ruħna aħna ma’ xi ħadd li tilef it-triq?  

Ir-ragħaj b’liema attitudni fittixha lin-nagħġa li ntilfitlu? B’attitudni ta’ ħlewwa, ta’ mħabba, ta’ akkoljenza lura. Hija proprju b’din l-istess attitudni li aħna għandna nikkoreġu lil xulxin. Mhux b’disprezz jew b’ġudizzju jew b’superjorità. Illum nista’ nkun dak li nfittex, għada nista’ nkun dak li jfittxuni. Dan l-episodju f’San Mattew tant ifakkarni fl-ambjent li wieħed isib ġol-familja. L-omm (jew il-missier) tkun qed tonqos jekk tara lil xi wieħed minn uliedha jisfratta u tħalli l-affarijiet għaddejjin. Tinkwieta fuqu għax tħobbu u tridlu l-ġid, titlob għalih, u xi darba ssib l-okkażjoni t-tajba u tkellmu waħdu. B’delikatezza tispjegalu l-ħsara li qed jagħmel lilu nnifsu. Bi mħabba tispjegalu li dik l-attitudni mhux se tagħmlu persuna aħjar. Ma tmurx ixxandru ma’ sħabu. Imma tkellmu ras imb ras għax tridlu l-ġid. Ma toħodhiex bi kbira li, ta’ tifel li hu, jirribella. Allura titkellimha ma‘ żewġha biex flimkien jaslu. Jista’ jkun li l-missier jara l-affarijiet b’mod iktar oġġettiv. U jekk lanqas mill-missier ma jkun irid jisma’, titkellimha ma’ ħutu. Dawk tamparu, u allura jifhmuh iktar. Bejn l-aħwa jaf ikun hemm ftehim li jniffed il-qlub. Huma wkoll iħobbuh u ma jridulu xejn ħlief ġid.  
U x’jiġri jekk lanqas minn ħutu ma jkun irid jisma’? L-Evanġelju jgħidilna: “żommu b’wieħed pagan u pubblikan.” Xi tfisser din? Il-Mulej kien jiekol mal-pagani u l-pubblikani! Anzi, il-Mulej kien jagħżilhom u jsejħilhom hu: lil Żakkew, lil Marija Maddalena, u saħansitra lill-istess awtur ta’ dan ir-rakkont, Mattew innifsu. Kien il-Mulej stess li għajjatlu minn wara l-mejda tat-taxxi u qallu jmur warajh! Kif iġġib ruħha dik l-omm ma’ binha li ma jridx jisma’? Filwaqt li dak li hu ħażin tibqa’ ssejjaħlu ħażin, lil binha tibqa’ tħobbu u tindukrah għax hu binha. Minkejja d-dnub tiegħu, tibqa’ tħobbu u, bħar-ragħaj it-tajjeb, tibqa’ tfittxu … mhux għal seba’ darbiet, imma għal sebgħa u sebgħin darba. Naħseb li l-ġist tar-rakkont tal-lum proprju jinsab fl-aħħar vers: “fejn tnejn jew tlieta jkunu miġbura f’ismi hemm inkun jien f’nofshom.” Huwa Hu li jġib l-għaqda bejnietna. Hu li jsib il-mitlufa. Aħna biss għodda f’idejh. 

Talba

Illum dak li qed titlob minni mhux faċli. Għinni ma niġġudikax għax jiena nara biss l-istampa ta’ barra. Nissel fija sentimenti ta’ ħniena, mogħdrija u maħfra. Neħħi minni kull sens ta’ superjorità għax dan iwassal biss għall-firda. Għinni sabiex dak li naħseb, dak li ngħid u dak li nagħmel iservu ta’ għajnuna u mhux ta’ tfixkil fl-għalqa tiegħek. Fakkarni li Inti miegħi timxi b’paċenzja liema bħala … biex hekk jiena wkoll nimxi l-istess ma’ ħaddieħor. Ammen.