Solennità ta’ Sidna Ġesù Kristu Sultan tal-Ħolqien Kollu

Kolletta

O Alla ta’ dejjem li tista’ kollox, int ridt iġġedded kollox f’Ibnek il-għażiż, is-Sultan tal-ħolqien kollu; fit-tjieba tiegħek, agħtina li l-ħlejjaq kollha, meħlusa mill-jasar tad-dnub, jaqdu lill-kobor tiegħek u jfaħħruk għal dejjem. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen. 

Riflessjoni

Il-profeta Eżekjel fl-Ewwel Qari, Salm 23 u l-Evanġelju skont San Mattew, it-tlieta li huma jindirizzawna lejn il-figuri tar-ragħaj u tan-nagħaġ.  

Il-profeta Eżekjel jispeċifika x’inhi l-ħidma tar-ragħaj: ifittex in-nagħaġ tiegħu, jieħu ħsiebhom, jaħseb fil-merħla tiegħu, isib ruħu f’nofs in-nagħaġ imxerrda, isalvahom minn kull fejn xterdu fiż-żmien is-sħab iswed. Kemm għandna għalxiex inkunu grati lejn Kristu r-Ragħaj tagħna li fil-ħajja tagħna ta’ kuljum juża s-sengħa ta’ ragħaj biex jieħu ħsiebna, l-aktar meta fil-ħajja tagħna nsibu ruħna taħt is-sħab iswed ta’ xi ċirkostanza jew gwaj li nkunu għaddejjin minnu.  

Il-Profeta jkompli billi juża verbi ta’ ħarsien li jwettaq ir-ragħaj: “nirgħa,” “inserraħhom,” “infittex il-mitlufa,” “irreġġa’ lura l-imxerrda.” Ir-ragħaj li jieħu l-irwol ta’ first aider jew anke ta’ tabib: “ninfaxxa l-ġrieħi tal-miġrugħa,” “inqawwi l-marida,” “inħares is-smina.” 

Kemm drabi fil-ħajja tagħna ħassejna lil Kristu jwettaq dawn il-ħilliet kollha. Kemm smajnieh jgħajtilna kull darba li morna ’l bogħod minnu. Kemm kien ta’ wens għalina meta kellna ġerħiet li nkunu ġarrabna minħabba xi realtà jew oħra f’ħajjitna, xi separazzjoni minn xi ħadd li ħabbejna, xi azzjoni ħażina li nkunu ġarrabna, nuqqas ta’ impjieg jew inkwiet fil-familja. Insomma, f’dak kollu li jweġġagħna fil-ħajja tagħna r-Ragħaj tagħna qiegħed hemm jgħassess fuqna u jdewwi kif jaf Hu biss il-ġrieħi tagħna.  

Il-profeta Eżekjel jaċċenna wkoll li r-Ragħaj tagħna, daqs kemm jieħu ħsieb din il-merħla, jagħmel ħaqq minnha billi jagħżel bejn nagħaġ u mogħoż u bdabad. Għaliex din id-distinzjoni, din l-għażla? In-nagħaġ huma annimali vulnerabbli li ma jafux jiddefendu lilhom infushom u li jiddependu fuq ir-ragħaj għall-ħarsien u l-kura tiegħu u biex jagħtihom direzzjoni. Il-mogħoż, min-naħa l-oħra, huma meqjusa bħala annimali ta’ ras iebsa, jafu jieħdu ħsieb tagħhom infushom u indipendenti. Il-kuntrast bejn it-tnejn hu ċar ħafna. 

Salm 23, li spiss jintuża fil-funerali, hu salm li jassigurana ħafna kemm jekk ħajjin u kemm jekk mejtin. Ir-Ragħaj taghna mhux biss jieħu ħsiebna u jagħtina assikurazzjoni f’ħajjitna, iżda anke meta jsejħilna biex nerġgħu lura “fid-dar tal-Missier,” kif kien talab il-qaddis Ġwanni Pawlu II, huwa u jgħaddi  minn din l-art għall-eternità. 

Fl-Evanġelju skont San Mattew, l-attenzjoni minn fuq ir-ragħaj tmur fuq in-nagħaġ u il-mogħoż. In-nagħaġ fuq il-lemin u l-mogħoż fuq ix-xellug. Hawnhekk naraw sensiela ta’ ‘paradossi, ta’ opposti. Ġesù r-Raghaj innifsu jieħu l-inizjattiva li jifred skont kif in-nagħaġ u l-mogħoż aġixxew fil-ħajja tagħhom mal-proxxmu tagħhom. Ġesù jara kif ġibna ruħna mal-proxxmu tagħna u jfakkarna li dak li nagħmlu mal-iżgħar wieħed inkunu qed nagħmluh miegħu.  

Dan il-ġudizzju m’għandniex għalfejn nistennew sal-aħħar ta’ ħajjitna biex jinqata’ fuqna. Il-Evanġelju skont San Mattew, kull darba li naqrawh u nimdeditawh, ifakkarna kif għandha tkun l-imġiba tagħna mal-proxxmu biex tkun togħġob lil Kristu. 

Jalla, meta nidhru quddiem ir-Ragħaj Divin u nsaqsuh, “Mulej, meta rajniek bil-ġuħ, bil-għatx, barrani, għeri, marid jew fil-ħabs?” Hu jkun jista’ jagħtina prova ta’ dak li nkunu għamilnieh f’ismu u daqs li kieku kien Hu. Jalla, it-tweġiba tar-Ragħaj tkun stedina biex nidħlu fil-ħajja ta’ dejjem,” u mhux, “Morru minn quddiemi!” 

Talba
Grazzi, Mulej, talli l-Kelma tiegħek qiegħda hemm biex tiftaħli qalbi u għajnejja għal-ħtiġijiet tal-proxxmu tiegħi. Mingħajr il-Kelma tiegħek u l-ħarsien ta’ Ragħaj ħhalek, jien bħan-nagħġa m’iniex kapaċi nasal jekk int ma turiniex it-triq li tohodni  ħdejn l-ilma fejn nistrieh. Uri, nitolbu,k o Ragħaj Divin, lill-mexxejja tad-dinja it-triq li twassal għall-paċi,  l-aktar fejn hemm il-gwerer u t-tbatija tal-innoċenti. Ammen.