Id-Dsatax-il Ħadd ta’ Matul is-Sena A

Kolletta

O Alla ta’ dejjem li tista’ kollox, aħna nagħmlu l-qalb u nsejħulek Missier; saħħaħ fina l-Ispirtu tal-ulied adottivi tiegħek, biex jistħoqqilna niksbu l-wirt li int wegħedtna. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen. 

Riflessjoni

Fir-rakkont tal-lum niltaqgħu ma’ Ġesù jimxi fuq l-ilma. L-istess rakkont insibuh fl-Evanġelji skont San Mark u San Ġwann, imma huwa biss San Mattew li jirrakkonta l-ġrajja fejn anke Pietru (mhux biss Ġesù) jimxi fuq l-ilma. Minkejja li Ġesù għadu kif tema’ ħamest elef ruħ, u minkejja li d-dixxipli għadhom kif raw dan il-miraklu jseħħ quddiem għajnejhom, l-episodju tal-lum bħal donnu jċanfar il-fidi tagħhom.  

Ħafna minnhom kienu sajjieda primi … kienu jafu x’joffri l-baħar meta jkollhom ir-riħ kontra tagħhom. Hekk kif raw lil xi ħadd riesaq lejhom miexi fuq il-baħar “twerwru … u qabdu jgħajtu bil-biża’ “ għax m’għarfuhx lill-Imgħallem, ħasbuh xi fantażma. San Mattew iżda jgħidilna li Ġesù “minnufih” għamlilhom il-qalb biex ma jibżgħux għax “Jiena Hu.” Kemm jieħu paċenzja bina l-Mulej!  

U hawn jidħol Pietru fix-xena. Pietru, li magħruf għall-mod ta’ kemm kien żbukkat, talab lil Ġesù jordnalu jmur ħdejh fuq l-ilma. U Ġesù jwieġbu b’kelma waħda, “Ejja.” Aħna mdorrijin nikkritikaw lil Pietru għal dak li jiġri ftit mumenti wara, imma ta’ min japprezza li, minkejja l-baħar qawwi, kien Pietru li kellu l-gazz joħroġ minn ġod-dgħajsa. Il-bqija baqgħu fid-dgħajsa, ħadd minnhom m’azzarda jixref siequ ’l barra mid-dgħajsa! Kien meta Pietru neħħa ħarstu minn fuq il-Mulej li ħabat jegħreq u beda jgħajjat biex il-Mulej isalvah. U għal darb’oħra San Mattew jagħtina dettall sabiħ: “Malajr Ġesù medd idu u qabdu.” Kemm jieħu paċenzja bina l-Mulej! Imma bħalma ċanfar lil Pietru għall-fidi żgħira tiegħu, hekk ukoll iċanfar lilna kull meta ħarsitna ndawwruha fuq ir-riħ qawwi flok fuqu.  

Interessanti li, sakemm Pietru kien miexi fuq l-ilma, il-Mulej ma waqqafx ir-riħ. Ir-riħ waqaf meta t-tnejn telgħu fid-dgħajsa. 

Il-Mulej ma jneħħilniex il-mewġ tal-ħajja imma Hu jibqa’ hemm quddiemna sabiex aħna nħarsu lejh waqt li nimxu u nitħabtu mal-mewġ.  

Il-Mulej ma jiskansaniex mit-tbatija imma jibqa’ magħna fl-istess tbatija u saħansitra joffrilna jdejh biex niddendlu magħha.  

Nimxu fuq l-ilma bla ma negħrqu dment li nixtħu ħarsitna fuqu u dment li niddendlu ma’ dik l-id li dejjem tistenniena niggranfaw magħha.

S’issa, flimkien mad-dixxipli, rajna tliet mirakli: 
– Ġesù jimxi fuq l-ilma; 
– Pietru jimxi fuq l-ilma (sakemm imbagħad iddubita); 
– it-tempesta u r-riħ waqfu. 

Imma San Mattew jirrakkonta l-ikbar miraklu proprju fl-aħħar vers: “Dawk li kienu fid-dgħajsa nxteħtu jqimuh u qalulu, ‘Tassew, int Bin Alla!’” Kienet l-ewwel darba li d-dixxipli stqarru li Ġesù huwa Bin Alla. 

Il-miraklu l-kbir iseħħ fil-qalb tal-bniedem meta jikkonverti, meta jibdel ir-rotta. 

Il-miraklu l-kbir iseħħ fis-skiet u l-moħbi meta ħarsitna ma tibqax fuq ir-riħ ta’ madwarna imma tistrieħ fuq Ġesù.  

Il-miraklu l-kbir iseħħ fil-konvinzjoni li ma nsalvawx bil-ħila tagħna imma meta niggranfaw ma’ id l-Imgħallem, speċjalment waqt  il-maltemp. 

Talba

Mulej, xi drabi jiena bħad-dixxipli … nibża’, nitwerwer, u ma nazzardax nixref riġli barra mid-dgħajsa. Ma nirriskjax u ma nafdakx. Xi drabi jiena bħal Pietru … żatat u naħseb li jirnexxili mingħajrek. Illum mhux ser nitolbok twaqqaf il-maltemp. Illum mhux ser nitolbok trażżan ir-riħ. Nitolbok biss tagħtini l-kuraġġ biex ħarsti ma naqlagħha qatt minn fuqek. Nitolbok biss id-dispożizzjoni interjuri biex nisimgħek tgħidli, “Tibżax” … nisimgħek tgħidli, “Ejja” … u nisimgħek ukoll tgħidli, “Għaliex iddubitajt?” Għax il-mistrieħ tiegħi ma nsibux meta tieqaf it-tempesta, imma nsibu meta nkun imdendla ma’ idek. Inti aqwa mill-ikbar tempesta. Inti dak li ssalvani. Nitolbok biex permezz tat-tempesta nagħrfek għal dak li Int, “Bin Alla,” bħalma għarfuk id-dixxipli fid-dgħajsa. Imbagħad ikun tassew seħħ il-miraklu l-kbir. 

Ammen