Ħamsa u Għoxrin Ħadd ta’ Matul is-Sena A

Kolletta

O Alla, int ġbart id-digrieti kollha tal-liġi mqaddsa fil-kmandament tal-imħabba tiegħek u tal-proxxmu; agħmel li aħna nħarsu l-preċetti tiegħek, biex jistħoqqilna naslu fil-ħajja ta’ dejjem. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen. 

Riflessjoni

Kemm l-Ewwel Qari u, iktar u iktar, b’mod narrattiv fl-Evanġelju, il-Mulej bla tidwir mal-kliem jurina biċ-ċar li l-mod tal-ħsieb uman tagħna huwa ferm ’il bogħod mill-mod ta’ ħsieb ta’ Alla: “Il-fehmiet tiegħi mhumiex fehmietkom, u t-triqat tiegħi mhumiex triqatkom,” iħabbrilna Isaija, li jibda l-profezija tiegħu billi jgħidilna fuq l-urġenza li hemm li nfittxu lill-Mulej sakemm nistgħu nsibuh għax, filwaqt li Alla m’għandux limiti ta’ żmien u spazju, aħna għandna u allura jeħtieġ li ma naħlux ħin, li ma nħallux għall-aħħar siegħa jekk jista’ jkun. 

B’danakollu, qisu fl-Evanġelju l-istorja tieħu żvolta oħra meta naraw lil tal-aħħar jiġu l-ewwel, u tal-ewwel jiġu l-aħħar. Il-biċċa hi ftit konfuża, imma bħalma t-triqat ta’ Alla u l-fehmiet tiegħu huma ferm ogħla minn tagħna daqs kemm huma ogħla s-smewwiet mill-art, hekk ukoll is-Saltna tiegħu, li hija msejħa “tas-Smewwiet,” timxi b’regoli differenti u kalkoli ekonomiċi u kummerċjali differenti mis-saltniet tad-dinja. 

Allura, kif se nippruvaw nagħmlu sens minn dawn li f’għajnejna jidhru kontradizzjonijiet? Għax, ngħiduha kif inhi, filwaqt li s-Sid tassew kellu dritt jagħti lil kulħadd l-istess ħlas u lil dawk tal-ewwel siegħa ma tagħhom xejn inqas minn dak li ftiehem magħhom, lanqas nistgħu nirraġunaw li l-Mulej donnu qed jippromwovi l-għażż jew li ma jimpurtax li l-ewwel naqilbu d-dinja u mbagħad fl-aħħar nippruvaw minn kollox sabiex indaħħlu saqajna l-Ġenna. 

Ġesù jgħid din il-parabbola wara l-laqgħa maż-żagħżugħ għani li tassew kien bniedem tajjeb imma ma setax jaċċetta l-ħaġa li kien għad jonqsu biex jikseb is-Saltna tas-Smewwiet: li jbigħ kollox u jimxi warajh, jiġifieri li jieqaf ipoġġi s-sigurtà tiegħu fiċ-ċertezza minnu nnifsu u f’dak li kellu u jerħi lilu nnifsu f’idejn il-Mulej li ma kellu xejn x’joffrilu fejn tidħol stabbiltà ekonomika u protezzjoni mill-attakki tal-ħażin. 

L-appostli wkoll jitgerfxu għax, bħal dawk tal-ewwel siegħa, huma kienu ħasbu li laħqu s-Sema b’idejhom meta ħallew kollox biex jimxu wara Ġesù, imma kienu għadhom ma ħallewx l-iktar ħaġa importanti wara daharhom: kienu għadhom ma ċedewx il-loġika tal-gwadann—“Aħna ħallejna kollox u ġejna warajk; issa x’se jmissna?” (Mt 19, 27) jistaqsi Pietru—sabiex il-mod ta’ ħsieb tagħhom jogħla ’l fuq u jimmira għal mod ta’ ħsieb ta’ Alla, għal-loġika tas-Saltna tas-Smewwiet. 

U dan jagħmel ħafna iktar sens f’kultura li tippromwovi l-produttività u l-effiċjenza, hekk li teskludi jew tqis bħala piż lil min m’għadux jew qatt ma jista’ jkun produttiv, u tippreferi l-magni għax iktar effiċjenti, jistgħu jibqgħu mixgħula erbgħa u għoxrin siegħa, u m’għandhomx emozzjonijiet; ekonomija li tistenna minna li nkunu l-ħin kollu disponibbli, bil-ħanut miftuħ, hekk li ma tħalliniex nieħdu nifs u nqattgħu ħin mal-familja, ħin fil-kwiet biex nistejqru, ħin ta’ talb sabiex l-impenn Nisrani tagħna jkun tassew immotivat mill-imħabba lejn Sid il-ħsad u mhux minn xi illużjoni li Alla jista’ jkollu d-dejn magħna. Mhux ta’ b’xejn li dan kollu jikkuntrasta bil-kbir mad-dinjità li jagħti Alla lil kull wieħed u waħda minna li nieħdu sehem fil-ħidma tiegħu biex isalva d-dinja, irrispettivament mill-kwantità li biha tilludi ruħha l-kilba għall-fama u l-poter li nsibu fil-qalb ta’ kull wieħed u waħda minna; irrispettivament jekk ikollux jibqa’ jiġri għalina sal-aħħar siegħa, għax Alla hu Sid ġeneruż li jaqbad mal-inqas tibna sabiex isalvana. 

Talba

Mulej Ġesù, din il-Kelma tiegħek toffrilna sfida biex la nintelqu u lanqas naħsbu li aħna nistgħu nsalvaw lilna nfusna. Din il-Kelma tisfidana biex nimmiraw fil-għoli u ma nikkuntentawx bl-inqas, filwaqt li titlob minna wkoll li nagħmlu wisa’ għal dawk tal-aħħar siegħa. Agħtina l-grazzja li tassew “inkissru” moħħna sabiex forsi xi darba t-toroq tagħna jagħqdu mat-toroq tiegħek u l-mod ta’ ħsieb tagħna joqrob dejjem iktar lejn il-fehma tiegħek li hija kollha mħabba għalina l-bnedmin.