Fid-diqa tiegħi lil Sidi nfittex

 

Tifħir ta’ sbiħ il-jum, illum l-Erbgħa 26 ta’ Ottubru 2022.
Salm 76 (77)

Tifkira tal-għemejjel ta’ Alla
Aħna minn kullimkien nidhru magħfusin, iżda m’aħniex mgħattnin. (2 Kor 4,8) 

B’leħen qawwi ’l Alla nsejjaħ, *
insejjaħ ’l Alla biex jismagħni.
Fid-diqa tiegħi lil Sidi nfittex; †
ma negħjiex billejl nerfa’ idi u nitlob; *
ma tridx taf b’faraġ qalbi.
Niftakar f’Alla u nitniehed; *
jien u naħseb, tinfena qalbi. 

Inżomm miftuħa xfar għajnejja; *
jiena mħawwad u ma nistax nitkellem.
Naħseb fiż-żmien tal-imgħoddi, *
niftakar fis-snin ta’ qabel;
billejl nitħaddet f’qalbi, *
naħseb u nixtarr ġewwa fija. 

Tgħid għal dejjem se jwarrabna Sidna? *
Mhux se jibqa’ jurina mħabbtu?
Waqfet għal dejjem it-tjieba tiegħu? *
Mhux se jibqa’ jżomm kelmtu minn nisel għal ieħor?
Nesa Alla juri ħniena magħna? *
Jew ħeba ħnientu fl-għadab tiegħu? 

Ikolli ngħid: “Dan hu l-għali tiegħi: *
li Alla l-Għoli biddel għemil lemintu.”
Imbagħad niftakar f’għemilek, Mulej; *
naħseb fl-għeġubijiet li għamilt fl-imgħoddi.
Naħseb f’kulma int għamilt; *
nixtarr l-għemejjel kbar tiegħek. 

Qaddisa triqtek, o Alla! *
Liema alla hu kbir bħal Alla tagħna?
Int Alla li tagħmel ħwejjeġ tal-għaġeb, *
li turi qawwietek fost il-popli.
Bi driegħek fdejt il-poplu tiegħek, *
l-ulied ta’ Ġakobb u ta’ Ġużeppi. 

Rawk l-ilmijiet, o Alla, †
rawk l-ilmijiet u twerwru; *
u sa qiegħ il-baħar triegħed.
Mis-sħab niżlet ix-xita, u s-smewwiet triegħdu; *
leħħ ma’ kullimkien il-beraq tiegħek.
Il-ħsejjes tar-ragħad tiegħek waħda f’waħda, †
il-beraq dawwal id-dinja; *
triegħdet u theżhżet l-art. 

Triqtek fuq il-baħar, †
fuq l-ibħra l-kbar il-mixja tiegħek; *
u ħadd ma jsibhom il-passi tiegħek.
Mexxejt bħal merħla l-poplu tiegħek, *
b’id Mosè u Aron. 

Glorja.

Ant. 1: Qaddisa triqtek, o Alla! Liema alla hu kbir bħal Alla tagħna?

Ant. 2: Qalbi tifraħ fil-Mulej, li jbaxxi kif ukoll jgħolli.

Kompli itlob billi żżur is-Salmi tal-ġurnata fuq https://brevjar.knisja.mt/

 

Ara salmi oħra