titwarrabx mit-talb umli tiegħi

 

Talb ta’ nofs il-jum, l-Erbgħa 10 ta’ Lulju 2024
Salm 54 (55):2-15,17-24

(I) Kontra l-ħbieb ħżiena
Lil Ġesù bdew jaħkmuh il-biża’ u dwejjaq. (Mk 14:33) 

Agħti widen, o Alla, għat-talba tiegħi, *
titwarrabx mit-talb umli tiegħi.
Ismagħni u weġibni, *
m’għandix mistrieħ fid-dwejjaq tiegħi!
Nirtogħod bil-biża’ għall-ħoss tal-għedewwa, *
minħabba l-għajat tal-ħżiena; 

għax huma jġibu fuqi l-ħsarat, *
fl-għadab tagħhom jeħduha kontrija.
Qalbi tinfena ġewwa fija, *
biża’ tal-mewt waqa’ fuqi.
Biża’ u tregħid jiġu fuqi, *
u twerwir jaħkimni. 

U ngħid: “Mhux li kelli l-ġwienaħ bħal ħamiema, *
biex intir u mmur nistrieħ!
Kont ’il bogħod immur niġġerra, *
u fid-deżert insib fejn noqgħod.
Kont malajr insib fejn nistkenn *
mir-riħ qawwi u r-riefnu.” 

Eqridhom, Sidi, ħawdilhom kliemhom, *
għax dnewwa u ġlied fil-belt qiegħed nara.
Lejl u nhar jiġġerrew fuq il-ħitan tagħha, *
fiha m’hemmx ħlief ħsara u dwejjaq.
Il-ħerba tinsab ġo nofsha, *
moħqrija u qerq ma jwarrbux mill-misraħ tagħha. 

Glorja.

Ant. 2: Biża’ u tregħid jiġu fuqi; ismagħni u weġibni, Mulej.

Ant. 3: Lil Alla nsejjaħ, u l-Mulej isalvani.

Kompli itlob billi żżur is-Salmi tal-ġurnata fuq https://brevjar

 

Ara salmi oħra