Kieku San Pawl kellu jikteb ittra lill-Maltin, żgur li kien ikollu jtenni dak li qal lill-Filippin: “alla tagħhom hu żaqqhom” (Fil 3, 19). Tiskanta kif kull staġun liturġiku għandu l-ikel u, fuq kollox, il-ħelu marbut miegħu. Niftiehmu: din hi ħaġa li nsibuha f’diversi kulturi, l-aktar dawk Mediterranji. Imma fuq żewġ blatiet imdaqqsa fejn il-marda nazzjonali hija d-dijabete, tiskanta kif, forsi għax konna maħkumin minn ħafna, laqqatna wkoll xi ftit mingħand kulħadd fejn jidħol ikel u ħelu. Saħansitra għal dan iż-żmien tas-sena, barra l-Borża ta’ San Martin, għandna wkoll l-għadam tal-mejtin, li la huwa niexfa u lanqas imnawra, imma li żgur jisparixxu iktar malajr minn kemm idum biex jiddekomponi mqar l-iżgħar għadma jew qarquċa!
Donnu t-togħma tal-figolli nsibuha tant—l-iktar dawk magħmulin id-dar—li lanqas nifilħu nistennew sena sħiħa mingħajrhom. Hawn min sar jiffriżahom biex fiż-żmien tal-għaks jagħmlu tajjeb għall-abbundanza li kważi ddardrek fi Żmien l-Għid, l-iktar jekk tkun għamilt Randan ma tikolx ħelu. Imma l-għadam tal-mejtin wara kollox huma figolli wkoll: flok forma ta’ ħaruf (jew elf forma oħra bla tifsira) għandhom il-forma ta’ għadma.
Imma din ir-rabta bejn l-Għid il-Kbir u l-Għid tal-Imwiet iffossillizzata fl-għadam u l-figolli mhijiex sempliċiment koinċidenza ħelwa, iżda għandha għeruq teoloġiċi iktar profondi li jmissu l-qalba tal-fidi tagħna. Imqassmin b’mod kważi ekwu tul ix-xhur tas-sena, dawn iż-żewġ ċelebrazzjonijiet ifakkruna fit-twemmin tagħna li nistqarru kull nhar ta’ Ħadd fil-Kredu: barra li nistqarru l-fidi fil-qawmien ta’ Ġesù, skont l-Iskrittura, wara l-passjoni ħarxa u l-mewta kiefra fuq is-salib għas-saħħa tagħna, nistqarru wkoll li nemmnu fil-qawmien mill-imwiet. U din mhijiex stqarrija każwali, biex il-kompożituri jkollhom moviment ieħor x’jimmużikaw. Din hija parti essenzjali mill-għana ferrieħi tagħna fl-Għid, u dan għaliex, bħalma Kristu miet u rxoxta bl-istess ġisem imma gglorifikat, hekk aħna wkoll fi tmiem iż-żmien se nissieħbu f’din il-glorja u t-tgawdija ta’ Alla għal dejjem fil-persuna sħiħa tagħna, magħmula mhux biss minn ruħ imma wkoll minn ġisem.
Ħadd ma jista’ jgħid eżatt x’se jkun fadal minn ġismu sa dak il-jum li l-meta tiegħu hi mistura, u żgur li nixtiequ ġisem xi ftit aħjar u inqas imnawwar minn dak li għandna bħalissa. Imma, iva, lilna wkoll se tmissna l-istess xorti ta’ Kristu. Anzi, Kristu proprju għalhekk sar bniedem: biex jieħu fuqu dak li hu tagħna ħalli hekk aħna jkollna sehem minn dak li hu tiegħu
Għaldaqstant, filwaqt li tajjeb inżommu l-qies fil-ħlewwiet u nħallu l-pjan ta’ Alla jseħħ bla ma ngħaġġlu żżejjed il-wasla tas-siegħa tal-mewt tagħna, tajjeb li, ma’ kull gidma ta’ għadma li ngawdu f’dan iż-żmien, niftakru fl-għeżież tagħna u nirrikkmandawhom lill-Mulej biex ma jdumx ma jdewwaqhom il-benna tal-preżenza tiegħu … u, għaliex le, infakkru lilna nfusna fit-tama kollha ħlewwa li fiha aħna ngħixu.