It-Tletin Ħadd ta’ Matul is-Sena B

Tista’ ssegwi l-qari kollu bil-Lingwa tas-Sinjali Maltija.

Lectio Divina

F’dan l-Evanġelju għandna litteralment il-fidi għamja ta’ bniedem f’Ġesù Kristu. Fidi għamja bħall-fiduċja ta’ tfajjel ċkejken iżomm idejn ommu, persważ instintivament li se tieħu ħsiebu. Għalkemm ir-rakkonti ta’ fejqan ta’ għomja nsibuh fit-tliet Evanġelji Sinottiċi b’ħafna similaritajiet, l-isem tal-għama—Bartimew, li tfisser bin Timew—isemmih biss San Mark. Il-fatt li jsemmih b’ismu jurina li kien magħruf.

L-għama jisraq ix-xena bl-esklamazzjoni: “Ġesù, bin David, ikollok ħniena minni!” Meta Bartimew beda jgħajjat u jitlob l-għajnuna ta’ Ġesù, ma ħax tweġiba immedjata. Agħar minn hekk, ħafna nies qalulu biex jiskot. Kien ikun faċli għalih li jaqta’ qalbu u jieqaf. Imma Bartimew kien konvint li Ġesù biss seta’ jsalvah. Allura injora l-oppożizzjoni tal-oħrajn u ma tax każ ta’ x’setgħu jgħidu fuqu. Jekk nixtiequ l-fejqan ta’ Kristu, irridu nfittxu lil Kristu anke meta nsibu oppożizzjoni jew ma jkollniex tweġiba immedjata. Jeħtieġ li ngħajtu iktar bil-qawwa, nitolbu iktar, nipperseveraw fit-tama tagħna fl-għajnuna tal-Mulej.

Għalkemm l-għama ma jarax lil Ġesù, Ġesù jagħmel minn kollox biex jarah. Għall-istedina ta’ Ġesù, Bartimew jimtela b’enerġija straordinarja: itajjar il-mantar, jaqbeż fuq riġlejh u jmur ħdejn Ġesù. L-għajnejn ma kinux meħtieġa biex jiltaqa’ ma’ Ġesù, imma d-disponibbiltà tal-qalb. Għalkemm nieqes mid-dawl, għalkemm qatt ma ra personalment lil Ġesù bħalma setgħu jarawh ħafna oħrajn, Bartimew żamm l-għajnejn tal-qalb tiegħu fissi fuq Ġesù. Kien nieqes mid-dawl fiċikament imma mhux spiritwalment, tant li hu ra lil Ġesù iktar ċar minn dawk li setgħu jarawh b’għajnejhom, inkluż il-kapijiet u l-imgħallmin tal-Lhud.

Aħna wkoll għandna nżommu l-ħarsa ta’ għajnejna fissi fuq Ġesù Kristu. Irridu narawh kif tassew hu—jiġifieri ħafna iktar minn sempliċiment personaġġ storiku. Irridu narawh bħala Alla (sovran) li sar bniedem (Bin David, Sultan). Ġesù biss jista’ jsalvana. Irridu nħarsu lejn Ġesù għall-fidi bħalma għamel Bartimew.

L-istess Bartimew jgħallimna l-kuraġġ li ninħtieġu biex nitolbu l-għajnuna ta’ xi ħadd meta jkollna bżonn. Jgħallimna l-importanza tal-perseveranza qawwija meta rresqu t-talb tagħna minkejja d-diffikultajiet li niltaqgħu magħhom fil-mixja tagħna. U bħal Bartimew, li wara l-fejqan ma telaqx lejn daru, inkomplu mixjin wara Ġesù nigglorifikawh.

Talba

Meta marsusin u mrekknin f’rokna b’ċirkostanzi tal-ħajja li jkunu jidhru ddisprati; meta nkunu rridu nieħdu deċiżjoni urġenti, immedjata, ta’ dak il-ħin, triq waħda, talba waħda hemm, karba sempliċi u ħierġa mill-qalb: Ġesù, bin David, ikollok ħniena minni!

Quddiem dak kollu li jagħmi l-qalb tagħna—in-nuqqas ta’ rikonoxxenza, is-suppervja, ir-rabta żejda ma’ oġġetti jew persuni, in-nuqqas ta’ sabar ma’ min jixtieq jiftaħ qalbu miegħi—bħal Bartimew aħna wkoll nitolbuk: Rabbuni, irrid li nara.