It-Tielet Ħadd tar-Randan – Sena Ċ

Tista’ ssegwi l-qari kollu bil–Lingwa tas-Sinjali Maltija.

Kolletta

O Alla, kull ħniena u tjieba ġejja minnek; inti wrejtna illi s-sawm u t-talb u l-għoti ta’ karità lill-foqra jagħtuna l-qawwa kontra d-dnub; ħares, fit-tjieba tiegħek, lejn din l-istqarrija umli ta’ ħtijietna, biex aħna, li l-kuxjenza tagħna ttaqqalna, ikollna dejjem l-għajnuna tal-ħniena tiegħek. B’Ibnek Ġesù Kristu Sidna, li miegħek jgħix u jsaltan flimkien mal-Ispirtu s-Santu, Alla, għal dejjem ta’ dejjem. Ammen.

Riflessjoni

Huwa biss l-Evanġelista San Luqa li jirrakkonta dawn iż-żewġ ġrajjiet u l-parabbola tas-siġra tat-tin li għal tliet snin ma għamlitx frott. Luqa jippreżenthom fuq fomm Ġesù fi triqtu lejn Ġerusalemm. Fil-fatt Ġesù kien għadu kif spiċċa jitkellem eżatt fuq l-importanza li dawk ta’ madwaru—u allura aħna stess—nitgħallmu nfissru ż-żmien li għaddejjin minnu … u allura niġġudikaw aħna stess x’inhu s-sewwa.

Ġesù hawnhekk iġib fix-xejn it-twemmin żbaljat li kellhom il-Lhud ta’ żmienu: il-liġi tar-retribuzzjoni, jiġifieri t-twemmin li l-kastig/it-tbatija/id-diżgrazzji li wieħed iġarrab f’ħajtu huwa riżultat tad-dnub li hu stess kien wettaq. Ġesù proprju jieħu dan l-ispunt sabiex jiġbed l-attenzjoni ta’ dawk ta’ madwaru li:

• il-konsegwenza tad-dnub tagħna mhix kwistjoni tal-ħażen ta’ xi ħadd barra minna (bħalma kien il-ħażen ta’ Pilatu fir-rigward ta’ dawk il-Galilin);
• il-konsegwenza tad-dnub tagħna l-anqas mhi kwistjoni ta’ xi diżgrazzja (bħalma kienet id-diżgrazzja ta’ dawk it-tmintax-il ruħ li waqa’ fuqhom it-torri ta’ Silwam).

Imma l-konsegwenza tad-dnub tagħna hija deċiżjoni li nieħdu aħna stess … bil-ħsieb, bil-kliem u bl-għemil tagħna stess.

• Il-ġudizzju tagħna mhux suġġett għall-ħażen ta’ ħaddieħor.
• Il-ġudizzju tagħna mhux suġġett għal ċirkostanza li ma kellniex kontroll fuqha.

Imma l-ġudizzju tagħna huwa proprju marbut mad-deċiżjoni fina nfusna ta’ kemm se nibqgħu stinati fil-ħażen tagħna. Għal darbtejn Ġesù jtenni l-stess diskors: “Le, ngħidilkom, imma jekk ma tindmux, ilkoll tintilfu bħalhom.”

Xi tfisser “tindem”?

Tindem tfisser tbiddel ir-rotta … tbiddel id-direzzjoni—kultant saħansitra terġa’ lura u tibda mill-ġdid.

Huwa f’dan l-isfond li l-parabbola tas-siġra tat-tin tieħu t-tifsira tagħha. Is-siġra tat-tin tirrappreżenta lilna

• li minkejja l-okkażjonijiet li jiġu ppreżentati lilna nibqgħu nagħżlu li ma nagħtux il-frott mistenni minna;
• li minkejja ż-żmien li jiġi afdat lilna nibqgħu stinati li ma rridux nikkolaboraw mar-rieda ta’ Alla għalina.

Xi skop fiha siġra tat-tin li frott ma tagħtix? Xi skop fiha ħajjitna jekk nibqgħu niċħdu l-istess skop li għalih ġejna maħluqa?

Interessanti li r-rakkont ta’ Luqa jħallina bla konklużjoni. Ma nafux it-tmiem tal-parabbola. Jew aħjar: ma nafux kif żvolġa t-tmiem ta’ din is-siġra. Tgħid għax għad għandna ċ-ċans (speċjalment dan iċ-ċans li l-Knisja tagħtina permezz tar-Randan)

• li nagħtu l-frott mistenni minna?
• li ma nibqgħux stinati fid-dnub tagħna?
• li nikkolaboraw mal-istess rieda tas-Sinjur li għaliha ġejna maħluqa?
• li nibdlu r-rotta u ma nibqgħux inkiddu l-art?

It-tmiem tas-siġra tat-tin f’din il-parabbola mhux magħruf lilna … għax proprju l-konsegwenza tal-għażliet tagħna (il-ġudizzju) jiddependu minna … huma f’idejna!

Talba

Sinjur, inti ħawwiltni fl-għalqa u għal tliet snin sħaħ ġejt tfittex il-frott mingħandi u ma sibtx.

Tħallinix nibqa’ stinata fid-dnub tiegħi. Tħallinix nibqa’ b’qalbi magħluqa. Tħallinix nibqa’ niġġustifika dak li hu ħażin fija.

Inti tafni sewwa. Ħawwiltni u ħadt ħsiebi sa minn ċkuniti. Matul dan ir-Randan nissel fija sentimenti ta’ ndiema ħalli nibdel ir-rotta … ħalli meta terġa’ tiġi s-sena d-dieħla, issibli l-frott … u jien imbagħad inkun tassew ilħaqt l-iskop li Inti ħawwiltni għalih.

Ammen.