Ieqaf, Mulej, mal-qaddejja tiegħek, u xerred dejjem tjubitek fuq kull min jitolbok; ġedded u ħares kulma jogħġob lilek f’dawk li, b’ġieħ tagħhom, jagħrfuk bħala ħallieq u mexxej. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.
Ammen.
X’se jmissu l-bniedem mit-taħbit u l-kedda li jkun ħa? Qoħ 1:2; 2:21-2
Qari mill-Ktieb ta’ Qoħelet
O frugħa tal-frugħat, jgħid Qoħèlet. O frugħa tal-frugħat! Kollox frugħa! Għax dan jiġri: wieħed, li jkun ħadem bl-għaqal u l-ħila u b’suċċess, ikollu jgħaddi sehmu lil ħaddieħor li xejn ma tħabat għalih. Dan ukoll frugħa u ħaġa mill-agħar. Għax x’se jmissu l-bniedem mit-taħbit u l-kedda li jkun ħa taħt ix-xemx? Għomru kollu jbati u jinħaqar bil-kedda u lanqas billejl ma jserraħ rasu. Dan ukoll hu frugħa!
Il-Kelma tal-Mulej. R/. Irroddu ħajr lil Alla
Salm 89(90):3-4,5-6,12-13,14,17
R/.(1): Mulej, int kont għalina kenn minn nisel għal nisel.
Int traġġa’ l-bnedmin lejn it-trab, u tgħidilhom: “Erġgħu lura, intom bnedmin!”. Elf sena huma għalik bħal jum tal-bieraħ li għadda, jew bħal sahra tal-lejl. R/.
Int taħsadhom, u jsiru bħal ħolma. Huma bħall-ħaxix li jinbet filgħodu; filgħodu jwarrad u jħaddar, filgħaxija jidbiel u jinxef. R/.
Għalhekk għallimna ngħoddu jiem ħajjitna, sabiex aħna nimxu bil-għaqal. Dur lejna, Mulej! Kemm se ddum? Ħenn għall-qaddejja tiegħek! R/.
Imliena kmieni bit-tjieba tiegħek, biex nifirħu u nithennew ħajjitna kollha. Ħa tkun fuqna l-grazzja ta’ Alla Sidna! Wettqilna inti x-xogħol ta’ jdejna, wettaq, iva, xogħol idejna. R/.
Fittxu l-ħwejjeġ tas-sema, fejn Kristu qiegħed fuq il-lemin ta’ Alla. Kol 3:1-5,9-11
Qari mill-Ittra ta’ San Pawl Appostlu lill-Kolossin
Ħuti, jekk intom irxuxtajtu ma’ Kristu, fittxu l-ħwejjeġ tas-sema, fejn Kristu qiegħed fuq il-lemin ta’ Alla. Aħsbu fil-ħwejjeġ tas-sema, mhux f’dawk tal-art. Għax intom mittu, imma ħajjitkom hi moħbija flimkien ma’ Kristu f’Alla. Meta jidher Kristu, li hu l-ħajja tagħkom, imbagħad intom ukoll tidhru flimkien miegħu fil-glorja. Mewtu ġo fikom dak kollu li hu tal-art: żína, faħx, ġibdiet, xewqat ħżiena, u r-regħba li hi idolatrija. Tigdbux lil xulxin, intom li nżajtu l-bniedem il-qadim bl-għemil kollu tiegħu, u lbistu l-bniedem il-ġdid, li jiġġedded dejjem skont ix-xbieha ta’ min ħalqu, u jikber fl-għerf. Fih ma hemmx Grieg jew Lhudi, ċirkonċiż jew mhux, Barbaru jew Skita, ilsir jew ħieles, iżda Kristu f’kollox u f’kulħadd.
Il-Kelma tal-Mulej. R/. Irroddu ħajr lil Alla.
Akklamazzjoni qabel l-Evanġelju Mt 5:3
Hallelujah. R/. Hallelujah. Henjin il-foqra fl-ispirtu, għax tagħhom hija s-Saltna tas-Smewwiet. R/. Hallelujah.
Il-ħwejjeġ li ħejjejt għalik, ta’ min ikunu? Lq 12:13-21
Qari mill-Evanġelju skont San Luqa
F’dak iż-żmien, xi ħadd mill-folla qal lil Ġesù: “Mgħallem, għid lil ħija jaqsam il-wirt miegħi”. Wieġbu Ġesù: “Ħabib, min qegħedni mħallef fuqkom, jew qabbadni nqassmilkom il-ġid bejnietkom?”. Imbagħad qal lin-nies: “Iftħu għajnejkom u ħarsu rwieħkom minn kull regħba, għax imqar jekk wieħed ikollu bir-radam, ħajtu ma tiddependix mill-ġid li jkollu”.
U qalilhom parabbola: “Wieħed raġel għani ġabar kotra ta’ frott mir-raba’ tiegħu. U beda jaħseb u jgħid bejnu u bejn ruħu: ‘X’se nagħmel? Għax dan il-frott kollu ma għandix fejn naħżnu! Ara x’nagħmel’, qal, “inħott l-imħażen li għandi u nibni oħrajn akbar, u naħżen fihom il-qamħ u l-ġid kollu li għandi. Imbagħad ngħid lili nnifsi: Ruħi, għandek ħażna kbira ta’ ġid għal bosta snin; mela strieħ, kul, ixrob, ixxala!’. Iżda qallu Alla: ‘Iblah li int! Dan il-lejl stess jitolbuk ruħek lura. U l-ħwejjeġ li ħejjejt għalik, ta’ min ikunu?’. Hekk jiġrilu min jiġma’ l-ġid għalih innifsu bla ma jistagħna quddiem Alla”.
Il-Kelma tal-Mulej. R/. Tifħir lilek, Kristu.
Riflessjoni
Kemm jirsisti u jitħabat il-bniedem biex iwettaq il-ħolm u x-xewqat ta’ ħajtu?
Kemm jistinka u jaħdem anke b’detriment għar-relazzjoni ma’ ta’ madwaru u mal-Mulej?
Fuq Facebook illum rajt ritratt ta’ ħabiba tiegħi li flimkien għaddejna sentejn ta’ formazzjoni. Ħadt xokk xħin qrajt li ħalliet din id-dinja ħabta u sabta.
Miskin hu il-bniedem li jaħseb li ser jibqa’ jgħix għal dejjem u jiggranfa mal-ġid ftit jew wisq daqs li kieku ser jieħdu miegħu wara mewtu.
Il-Ktieb ta’ Qoholet jgħidilna: “Kollox frugha!” Is-Salm jgħidilna: “Int treġġa’ l-bniedem lejn it-trab…”
San Pawl lill-Kolossin jiktbilhom: “Aħsbu fil-ħwejjeġ tas-sema mhux f’dawk tal-art.”
Fl-Evanġelju skont San Luqa, Ġesù jgħidilna: “Hekk jiġrilu min jiġma’ l-ġid għalih nnifsu bla ma jistagħna quddiem Alla.”
Nistagħna quddiem Alla kull darba li l-att konkrett tiegħi ta’ mħabba jmur favur min hu fil-bżonn. Jistagħnew quddiem Alla dawk kollha li daru b’dawk li kienu jew għadhom kwarantina u ħadu ħsieb iċemplulhom biex joffru l-għajnuna billi marru jaqduhom jew saħansitra ħadulhom l-ikel imsajjar wara biebhom.
Tistgħana quddiem Alla dik il-persuna li daret bil-ħabiba tagħha sal-aħħar nifs. Tistagħna quddiem Alla kull darba li tisma’ persuna mtaqqla b’xi saram f’ħajjitha u tħalliha tiftaħ qalbha sakemm tistrieħ. Tistagħna quddiem Alla kull darba li tħobb u taqdi senza interessi.
San Pawl lil Kolossin kitbilhom: “Aħsbu fil-ħwejjeġ tas-sema mhux dawk tal-art.” Kemm għandna x’jiddistrattana milli naħsbu fil-ħwejjeġ tas-sema! Aktar ma jkollna distrazzjonijiet aktar irridu niggranfaw mal-Mulej. U madwarna għandna eżempji lejn xiex inħarsu: reliġjużi u lajċi li qed jiddedikaw ħajjithom biex jassistu l-immigranti jew il-priġunieri; jew persuni morda li, minkejja l-mard tagħhom, b’kuraġġ jieqfu ma’ tant morda oħrajn bħalhom. Kemm kien hawn u għad hawn Maltin fostna li għarfu jpoġġu fil-prattika dan li qed jitlob Ġesù f’dan il-Evanġelju biex nistagħnew quddiem Alla u niftħu għajnejna u nħarsu ruħna minn kull regħba.
Talba
Mulej, agħtini d-dehen ħa nagħraf dak kollu li hu fieragħ fil-ħajja tiegħi. Fakkarni li jien maħluq għal ħajja ferm ogħla minn dak li offrietli d-dinja s’issa. Iftaħli qalbi u moħi biex naħseb fil-ħwejjeġ tas-sema li tant ifarrġuni. Agħtini l-grazzji li nfittex biex nistagħna quddiemek biss.
