Is-Seba’ Ħadd ta’ L-Għid

Kolletta

O Alla li tista’ kollox, agħmel li b’ferħ qaddis inroddulek ħajr, għax Kristu Ibnek, bit-tlugħ tiegħu fis-sema, imexxina bla heda ’l quddiem fit-triq tagħna lejk, u jimliena bit-tama li aħna, il-ġisem tiegħu, għad naslu wkoll għal dik il-glorja li fiha daħal hu, ir-Ras tagħna, Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem. Ammen.

Riflessjoni

Bil-Misteru tal-Għid, Ġesù hu ddikjarat: Ġesù Kristu hu l-Mulej! (Filippin 2, 11)

Il-Mogħdija ta’ Ġesù mill-mewt għall-ħajja hi kompluta meta hu tela’ s-Sema u qagħad fuq il-lemin tal-Missier biex ikun jista’ jibgħat l-Ispirtu s-Santu fuq id-dixxipli tiegħu.

Qabel telaqhom, Ġesù ħalla struzzjonijiet ċari ħafna lill-Ħdax: “Fi ftit jiem oħra titgħammdu bl-Ispirtu s-Santu” (Atti 1, 5).

Mela kien jonqos xi ħaġa importanti ħafna fil-formazzjoni tagħhom. Ġew magħżula minn Ġesù, ġew mgħallmin minnu, kienu xhieda okulari ta’ kulma għamel, rawh diversi drabi u kielu miegħu wara li qam mill-mewt. Imma dan ma kienx biżżejjed. Kien jonqos ir-raġuni li minħabba fiha Ġesù għamel dil-ħidma kollha ta’ fidwa u salvazzjoni—il-miġja tal-Ispirtu ta’ Alla skont il-profeziji.

Ġesù għażilhom biex ikunu xhieda tiegħu mad-dinja kollha. S’hawn, ħafna minna nifhmuha u nippruvaw aħna wkoll inkunu xhieda fiċ-ċirkustanzi tagħna. Imma l-ebda sforz tal-bniedem mhu qatt biżżejjed biex isir ix-xogħol veru ta’ testimonjanza. Ġesù jkompli jinsisti: “Imma meta jiġi fuqkom l-Ispirtu s-Santu, intom tirċievu l-qawwa, u tkunu xhieda tiegħi f’Ġerusalemm, fil-Lhudija kollha u s-Samarija u sa truf l-art” (Atti 1, 8).

“Morru fid-dinja kollha, xandru l-Evanġelju lill-ħolqien kollu” – kulħadd imsejjaħ biex imur fid-dinja kollha? Le! Imma kulħadd hu msejjaħ biex imur, jiġifieri joħroġ mill-ambjent komdu tiegħu, u jxandar l-Evanġelju. Kif tista’ tagħmel dan? Żgur li mhux bl-isforzi tiegħek biss. Għandek bżonn l-Ispirtu s-Santu, għandek bżonn id-doni tiegħu. Bħalma l-Ħdax kellhom relazzjoni ma’ Ġesù li biddlithom minn jum għal ieħor, hekk int teħtieġ relazzjoni ma’ Ġesù li tbiddlek, tbiddillek il-valuri tiegħek, tbiddillek dak li inti tqis li hu l-iktar importanti f’ħajtek (il-prijoritajiet tiegħek). Din hi l-ħidma tal-Ispirtu fik.

“Min jemmen u jitgħammed” – Inti temmen u mgħammed. L-ewwel dixxipli ma kinux bħalna! Aħna l-ewwel jgħammduna, imbagħad nemmnu. Din il-mixja ta’ fidi mhix fakultattiva, jiġifieri ma nistax ngħaddi mingħajrha bħala dixxiplu tal-Mulej. U hawn Ġesù jiddeskrivi l-effetti ta’ min jemmen u jitgħammed: isalva, jkeċċi x-xjaten …Irrid nagħmilha l-mistoqsija: dawn l-effetti jidhru f’ħajti, nagħtihom importanza, jew qisu din il-kelma ta’ Ġesù qabel tela’ s-Sema ma tgħoddx għalija?

“Qagħad in-naħa tal-lemin ta’ Alla” – din l-istqarrija hi parti mill-Kredu tagħna. Fuq din il-verità, it-Testment il-Ġdid jibni l-ħidma ta’ Ġesù fis-Sema. Hemm, fuq il-lemin tal-Missier, il-Ħaruf ta’ Alla jinterċedi għalina bis-setgħa ta’ Demmu. L-interċessjoni ta’ Ġesù għandha skop wieħed li kien spjegah Ġesù nnifsu: permezz tiegħu biss tistgħu tmorru għand il-Missier. Għand min immur meta jkolli bżonn xi ħaġa verament importanti, għand Ġesù jew għand xi ħadd ieħor?