Is-Seba’ Ħadd tal-Għid
Solennità tat-Tlugħ il-Mulej fis-Sema

Kolletta

O Alla li tista’ kollox, agħmel li b’ferħ qaddis irroddulek ħajr, għax Kristu Ibnek, bit-tlugħ tiegħu fis-sema, imexxina bla heda ’l quddiem fit-triq tagħna lejk, u jimliena bit-tama li aħna, il-ġisem tiegħu, għad naslu wkoll għal dik il-glorja li fiha daħal hu, ir-Ras tagħna, Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen.

Riflessjoni

Jekk ikollna nħarsu lejn l-Evanġelju li l-Knisja tagħżel għas-Solennità ta’ Tlugħ il-Mulej fis-sema, nindunaw li dawn huma l-aħħar ftit vrus li permezz tagħhom l-Evanġelista San Mattew. U, minkejja ż-żewġ reazzjonijiet tad-dixxipli quddiem Kristu Rxoxt li kienu għadhom ma rawx, kemm lil dawk li jemmnu imma jinżlu quddiem Ġesù bħal donnu biex jipprovaw jorbtuh fiss f’post partikolari ħalli ma jitilfuhx, u kif ukoll dawk li ddubitaw forsi għax ċ-ċiniċiżmu u l-pessimiżmu konsegwenza tat-trawma u d-disfatta tas-salib kienu għadhom qed jimmarkawhom; qalbhom kienet għadha mhijiex fil-paċi. Fl-istess ħin nafu li għall-istess aħbar jew esperjenza kulħadd jirreaġixxi bil-mod differenti u uniku tiegħu. 

Imma, sew dawk li emmnu tant li riedu jżommuh hemm magħhom għalihom biss, u sew l-oħrajn xi ftit iktar xettiċi imma fl-istess waqt miftuħin għall-esperjenza la xorta marru, lilhom kollha jagħtihom tliet ordnijiet, responsabbiltajiet, ħidmiet—kif insejħulhom ma tagħmilx differenza—li huma: “morru,” “agħmlu dixxipli,” u “għammduhom.” Dawn it-tliet kelmiet fl-imperattiv prattikament jiffurmaw il-ħidma kollha tal-Knisja u, għax tal-Knisja kollha, huma wkoll il-ħidmiet tagħna, sew jekk nippreferu li nżommu lil Ġesù għalina biss u sew xi minn daqqiet niddubitaw u nitħabtu mal-fidi tagħna. 

L-ewwel nett: “morru,” jiġifieri tibqgħux hawn imdawrin miegħi imma morru sibu lil bnedmin ħutkom li magħhom, bid-diffikultajiet kollha tagħkom pesonali, xorta waħda jeħtieġ twasslulhom l-esperjenza tal-laqgħa personali ma’ Kristu, li xi minn daqqiet hija qawwija u xi drabi oħra hi iktar siekta mis-skiet, ħlief għal dik il-wegħda li tidwi f’widnejna u li magħha niggranfaw. 

It-tieni: “agħmlu dixxipli,” jiġifieri mhux sempliċiment siru afu n-nies ta’ post fejn tmorru, għamlu ħbieb magħhom, imma kull fejn issibu ruħkom ir-relazzjonijiet li tibnu ma jeħlux biss mal-livell uman imma jkunu ħbiberiji li bil-ħlewwa u l-intimità tal-ħbieb taqsmu magħhom ir-relazzjoni tagħkom ta’ dixxipli ma’ Ġesù, mhux biex torbtuhom magħhkom donnhom impjegati jew korteġġani tagħkom, jew biex inżidu man-numru ta’ nies li jiġu l-knisja, imma għax konvinti li l-ħbiberija ma’ Ġesù hija l-isbaħ ħaġa li għandna f’ħajjitna u allura nixtiequ li l-ħbieb tagħna jkunu wkoll ħbieb ta’ Ġesù. 

U tal-aħħar: “għammduhom.” Ġeneralment din il-ħidma nħalluha f’idejn is-saċerdoti b’mod prattiku. Imma r-responsabbiltà tal-magħmudija, ta’ li tressaq lil xi ħadd għall-magħmudija, mhijiex tal-qassis imma, l-ewwel u qabel kollox, hi tal-ġenitur, tal-parrinu, tal-katekisti, imma wkoll tal-għalliema nsara, nanniet man-neputijiet, ħadtuha meta lqajtu n-nar tax-xemgħa  mixgħul mill-blandun u żżommuha ħajja, qawwija, u ma tintefiex. U kull darba li nagħmlu pass f’din id-direzzjoni, mhux se ngħid inkunu qed ngħammduhom mill-ġdid għax ma tistax, imma nkunu qegħdin inżommu jaqbad id-dawl ta’ Kristu fihom. 

Talba

Mulej, ninsabu fejn ninsabu fil-mixja tal-fidi tagħna, lanqas tant jimporta daqskemm li nħallu widnejna miftuħa sabiex jaħbat ma’ widnejna u jinżel f’qalbna d-diwi tal-aħħar kliem tiegħek, “jiena magħkom dejjem, sal-aħħar taż-żmien,” u nħallu dan il-kliem iqajjimna fuq saqajna sabiex immorri, nagħmlu dixxipli, u ngħammdu, inlaqqgħuhom mal-grazzja tiegħek Rxoxt, ħaj, sabiex ħajjithom tintmiss u jibdew huma wkoll jsimgħu dan il-kliem u jsir iċ-ċertezza tagħhom, jiġifieri li inti magħna, dejjem u kullimkien, sal-aħħar taż-żmien.