It-Tmienja u Għoxrin Ħadd ta’ Matul is-Sena A

Kolletta

Nitolbuk, Mulej, li l-grazzja tiegħek dejjem tqanqalna u tieqaf magħna, u tħeġġiġna biex inkunu l-ħin kollu medhija b’għemejjel tajba. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen. 

Riflessjoni

Il-Profeta Isaija jiddeskrivi b’dettall kbir l-ikla li jaf iħejji Alla għall-polpu tiegħu: Ikel fin, inbejjed ħelwa, laħam imsemmen bil-mudullun … Id-deskrizzjoni ta’ Isaija tibda u tispiċċa bil-kliem “fin” u “fini.” Alla hu dak il-missier li għal uliedu jagħti l-aqwa u l-aħjar. 

Imur oltre minn hekk: mhux jitma’ biss iżda jċarrat il-velu li jgħatti wiċċ il-popli, jeqred il-mewt, jixxotta d-dmugħ minn kull wiċċ, iħassar l-għajb. U dan kollu sar bis-saħħa u l-qawwa tal-Kelma tiegħu. Dan hu Alla li fih ittamajna, li ġie jsalvana, li jqanqal fina l-ferħ u l-hena għax id il-Mulej niżlet fuq din il-muntanja. 

Fis-Salm 22 naqraw: “Ngħammar f’dar il-Mulej sakemm indum ħaj.” Min minna ma jridx jgħammar f’dar fejn dak li ddeskriva tant tajjeb il-Profeta Isaija qed jiġi offrut lili u lilek b’tant abbundanza, fejn il-Mulej ma jimpurtahx biss mill-ħtiġijiet fiżiċi iżda wkoll minn dawk emozzjonali u psikoloġiċi? 

Hu l-veru ragħaj li jimpurtah min-nagħaġ tiegħu u ma joqgħodx bi kwietu qabel ma jeħodna fejn l-ilma frisk fejn hemm hu jserraħna u jrejjaqna. 

San Pawl lill-Filippin ikellimhom dwar il-paradoss—kelma li tgħallimt minn Patri William Axiaq O.F.M. Cap. waqt kors dwar il-Bibbja. Il-paradoss ta’ San Pawl kien li kien jaf jgħix f’kull ċirkustanza li kienet toffrilu l-ħajja, kemm jekk xaba u sew jekk ġuħ, kemm jekk ġid u kemm jekk għaks. Imma San Pawl jagħmilha ċara ħafna magħna li dan waħdu ma setgħax jagħmlu jekk mhux bis-saħħa ta’ Alla li kien iqawwih fid-dgħufija tiegħu. 

San Pawl jerġa’ jfakkarna f’kemm Alla jieħu ħsiebna billi jirreferi għal Alla bħala dak li jipprovdilna kull ġid fil-ħtieġijiet tagħna, u dan dejjem skont l-għana tal-glorja fi Kristu Ġesù.  

San Mattew jerġa’ jirreferina għall-abbundanza tal-festa tat-tieġ ta’ bin is-sultan. Ilkoll kemm aħna xi darba jew oħra konna xhieda tal-abbundanza waqt festin ta’ tieġ li nkunu mistiedna għalih. San Mattew jirreferi għal tliet stediniet li s-sultan jagħmel lill-mistednin li mhux biss irifjutaw u injoraw din lis-stedina talli waslu saħansitra biex joqtlu lil dawk il-qaddejja li waslulhom l-istedina. 

Tgħid aħna wkoll xi drabi nieħdu dan l-atteġġjament? L-istedina tal-qari tal-lum hi li aħna nkunu grati kull darba li Alla jersaq lejna biex iġedded ir-relazzjoni tiegħu magħna permezz tas-Sagramenti, tal-festin li jseħħ f’kull Ewkaristija, kemm dik fost il-ġimgħa u b’mod speċjali dik tal-Ħadd, u ta’ ħajja ta’ talb u komunikazzjoni miftuħa miegħu. 

Talba
Mulej, iftaħli għajnejja u s-sensi tiegħi għall-abbundanza ta’ mħabbtek għall-umanità kollha f’dan iż-żmien kiefer ta’ gwerer, fosthom fl-Art Imqaddsa. Dawwal l-imħuħ ta’ min jirrikorri għall-armi biex mingħalih iġib il-paċi billi jiddomina nazzjon fuq ieħor. Ammen.