Il-Ħames Ħadd ta’ Matul is-Sena Ċ

Kolletta

Fi tjubitek, Mulej, ħares dejjem il-familja tiegħek, u kun int l-għajnuna u l-qawwa tagħha, għax hi ma għandhiex tama oħra ħlief il-grazzja tiegħek. B’Ibnek Ġesù Kristu Sidna, li miegħek jgħix u jsaltan flimkien mal-Ispirtu s-Santu, Alla, għal dejjem ta’ dejjem. Ammen.

Riflessjoni

Iż-żmien Ordinarju jistedinna biex niċċelebraw is-sejħa li Ġesù jagħmlilna biex nimxu warajh. Il-Mulej Ġesù jsibna fejn inkunu, għaddejjin bil-ħajja tagħna ta’ kuljum, xi drabi meta nkunu għajjejna nitħabtu mal-mewġ tal-ħajja. Lil Xmun u sħabu s-sajjieda Ġesù sabhom f’xatt l-għadira ta’ Ġennesaret jaħslu x-xbiek wara lejl sħiħ jitħabtu għalxejn. Wara li tela’ fuq id-dgħajsa ta’ Xmun, Ġesù talbu jaqla’ kemxejn ’il barra mill-art biex ikun jista’ jgħallem lin-nies mid-dgħajsa tiegħu. Bħal fi żmien Ġesù, illum ukoll hawn l-għatx għall-Kelma li ssostni r-ruħ, tfarraġ, u tħeġġeġ il-qalb. Illum ukoll Ġesù għandu bżonn ta’ qlub ġenerużi li jkomplu jwasslu l-messaġġ tiegħu. Inti għandek post għalih fid-dgħajsa tiegħek? Lest/a li tinqata’ mill-istorbju tad-dinja biex tħallih jaħdem fik u jħejjik għall-missjoni li għandu għalik?

Tassew li meta nilqgħuh f’ħajjitna u nerħu t-tmun f’idejh, Ġesù jagħmel bina, magħna u fina ħwejjeġ kbar. Għal Xmun l-ewwel pass kien li jilqa’ lil Ġesù fid-dgħajsa tiegħu. Minn hemm ’il quddiem il-ġurnata tiegħu u saħansitra ħajtu kollha nbidlet mil-lejl għan-nhar. It-tieni pass ta’ Xmun kien li jobdi u jafda minkejja li dak li qallu biex jagħmel Ġesù deher li ma kienx qed jagħmel sens: “Imma, la qiegħed tgħid int, ħa nkala x-xbiek” (v. 5). Issa fuq id-dgħajsa miegħu Xmun għandu lil Ġesù, anzi issa Ġesù hu l-Imgħallem u Xmun id-dixxiplu u dan għamel id-differenza kollha. L-evanġelista jgħidilna, “Hekk għamlu, u qabdu kotra hekk kbira ta’ ħut li x-xbiek tagħhom kien għoddu nqasam” (v. 6). Tabilħaqq, meta niftħu qalbna għalih, il-Mulej Ġesù jimxi magħna b’fedeltà u jroddilna bl-abbundanza!

Quddiem il-qabda hekk kbira ta’ ħut, Xmun jagħraf iċ-ċokon u d-dgħjufija tiegħu, “Tbiegħed minni, Mulej, għaliex jiena raġel midneb!” (v. 8). Imma Ġesù jmissu bl-imħabba u l-ħniena tiegħu, “Tibżax: minn issa ’l quddiem tkun taqbad in-nies” (v. 10). Kemm jafdana Ġesù u kemm tagħmlilna kuraġġ din il-kelma tiegħu, “Tibżax: aqdef ’il barra fil-fond…” Kull nisrani għandu missjoni x’jaqdi, u minkejja li aħna midinbin Hu jsejħilna biex niġbdu l-qlub lejh permezz tal-Kelma tiegħu. Ġesù daħal fil-ħajja ta’ Xmun Pietru, Ġakbu u Ġwanni permezz tal-kotra kbira ta’ ħut li qabdu. Minn hemm huma telqu kulma kellhom, u marru warajh. Jista’ jkun li ilek tisma’ u tfittex biex titgħallem fuq Ġesù iżda għadek m’għamiltx l-esperjenza tiegħu. X’qed ixekklek milli timxi warajh bis-serjetà? Minn xiex għandek bżonn tinħeles biex tħaffef għal warajh? Kun ġeneruż/a, ilqa’ lil Ġesù fid-dgħajsa u tibżax taqdef ’il barra fil-fond … il-Mulej għandu missjoni għalik ukoll!

Talba

Int ma titgħaxxaqx b’sagrifiċċji u offerti;

imma widnejja inti ftaħtli;

ma tlabtnix vittmi tal-ħruq u tat-tpattija.

Mbagħad jien għedt: “Hawn jien, ġej.

Fil-bidu tal-ktieb hemm miktub fuqi

li nagħmel ir-rieda tiegħek.

Alla tiegħi, dan jogħġobni;

il-liġi tiegħek ġewwa qalbi.” (Salm 40, 7-9)