Tiegħu l-baħar, għax hu għamlu

 

Is-sejħa għat-tifħir ‘l Alla, illum il-Ġimgħa 8 ta’ Ottubru.

Salm 94 (95)
Ant. Roddu ħajr lill-Mulej, għax għal dejjem it-tjieba tiegħu.

Ejjew, ħa nfaħħru bl-hena l-Mulej,
ħa ngħajjtu bil-ferħ lill-blata tas-salvazzjoni tagħna!
Nersqu quddiemu b’għana ta’ radd il-ħajr,
ngħannulu b’għajat ta’ ferħ.

Ant. Roddu ħajr lill-Mulej, għax għal dejjem it-tjieba tiegħu.

Għax Alla kbir hu l-Mulej,
sultan kbir fuq l-allat kollha.
F’idejh huma qigħan l-art,
tiegħu huma qċaċet l-għoljiet.
Tiegħu l-baħar, għax hu għamlu;
tiegħu l-art, għax b’idejh saret.

Ant. Roddu ħajr lill-Mulej, għax għal dejjem it-tjieba tiegħu.

Ejjew inqimuh u ninxteħtu quddiemu,
għarkubbtejna quddiem il-Mulej li ħalaqna!
Għaliex hu Alla tagħna,
u aħna l-poplu tal-mergħa tiegħu u n-nagħaġ tiegħu.

Ant. Roddu ħajr lill-Mulej, għax għal dejjem it-tjieba tiegħu.

M’hux li kontu llum tisimgħu leħnu!
“La twebbsux qalbkom bħal f’Meriba,
bħal dakinhar f’Massa, fid-deżert,
meta ġarrbuni u ttantawni missirijietkom,
għalkemm raw dak li jien għamilt.

Ant. Roddu ħajr lill-Mulej, għax għal dejjem it-tjieba tiegħu.

Għal erbgħin sena domt nistmellu dan in-nisel;
u jien għedt: ‘Qalbu mħassra dan il-poplu,
u triqati ma jagħrfux.’
Għalhekk ħlift fl-għadab tiegħi:
Ma jidħlux fil-mistrieħ tiegħi!”

Ant. Roddu ħajr lill-Mulej, għax għal dejjem it-tjieba tiegħu.

Glorja lill-Missier,
u lill-Iben, u lill-Ispirtu s-Santu.
Kif kien mill-bidu, issa u dejjem,
U jibqa’ għal dejjem ta’ dejjem. Ammen.

Ant. Roddu ħajr lill-Mulej, għax għal dejjem it-tjieba tiegħu.

Kompli itlob billi żżur is-Salmi tal-ġurnata fuq https://brevjar.knisja.mt/

 

Ara salmi oħra