O Alla ta’ dejjem li tista’ kollox, int lilna l-bnedmin tajtna eżempju ta’ umiltà meta ridt li s-Salvatur tagħna jsir bniedem bħalna u jieħu l-mewt tas-salib; fil-ħniena tiegħek, agħtina li s-sabar tiegħu jkun ta’ tagħlima għall-ħajja. B’Ibnek Ġesù Kristu Sidna, li miegħek jgħix u jsaltan flimkien mal-Ispirtu s-Santu, Alla, għal dejjem ta’ dejjem. Ammen.
Ma ħbejtx wiċċi mit-tagħjir. Is 50, 4-7
Qari mill-Ktieb tal-Profeta Isaija
Sidi l-Mulej tani lsien ta’ wieħed jitgħallem, biex nagħraf ngħin lill-għajjien b’xi kelma. Ta’ kull filgħodu jqajjimli lil widinti, biex nisma’ bħal wieħed jitgħallem. Sidi l-Mulej fetaħli widinti, u jiena ma webbistx rasi, ma rġajtx lura. Tajt dahri lil dawk li kienu jsawtuni, ħaddejja lil dawk li kien jnittfuli lħiti; ma ħbejtx wiċċi mit-tagħjir u l-bżieq. Sidi l-Mulej jgħinni, għalhekk ma nitħawwadx; għalhekk għamilt wiċċi bħaż-żnied: jien naf li ma jkollix mniex nistħi.
Il-Kelma tal-Mulej. R/. Irroddu ħajr lil Alla
Salm 21 (22), 8-9.17-18a.19-20.23-24
R/. (2a): Alla tiegħi, Alla tiegħi, għaliex tlaqtni?
Dawk kollha li jarawni jidħku bija, jgħajbuni, iħarrku rashom u jgħidu: “F’idejn il-Mulej intelaq; ħa jeħilsu hu! Ħa jsalvah hu, la bih jitgħaxxaq!” R/.
Qabda klieb daru għalija; ġemgħa nies ħżiena rassewni. Taqqbuli idejja u riġlejja; nista’ ngħodd għadmi kollu. R/.
Inxandar ismek lil ħuti; infaħħrek f’nofs il-ġemgħa. Faħħru l-Mulej, intom li tibżgħu minnu; sebbħuh ilkoll, nisel Ġakobb! ibżgħu minnu lkoll, ulied Iżrael! R/.
Kristu ċekken lilu nnifsu; għalhekk Alla għollieh. Fil 2, 6-11
Qari mill-Ittra ta’ San Pawl Appostlu lill-Filippin
Ġesù Kristu li għad li kellu n-natura ta’ Alla, ma qagħadx ifittex tiegħu li hu daqs Alla, iżda xejjen lilu nnifsu billi ħa n-natura ta’ lsir, sar jixbah lill-bnedmin, u deher minn barra bħala bniedem; ċekken lilu nnifsu, billi obda sal-mewt, anzi sal-mewt tas-salib. Għalhekk Alla għollieh sas-smewwiet u żejnu bl-isem li hu fuq kull isem, biex fl-isem ta’ Ġesù – fis-sema, fl-art u f’qiegħ l-art – il-ħlejjaq kollha jinżlu għarkupptejhom, u kull ilsien jistqarr: “Ġesù Kristu hu l-Mulej”, għall-glorja ta’ Alla l-Missier.
Il-Kelma tal-Mulej. R/. Irroddu ħajr lil Alla.
AKKLAMAZZJONI QABEL L-EVANĠELJU Fil 2, 8-9
Glorja u tifħir lilek, Kristu! Minħabba fina Kristu obda sal-mewt, anzi sal-mewt tas-salib. Għalhekk Alla għollieh sas-smewwiet, u żejnu bl-isem li hu fuq kull isem. R/. Glorja u tifħir lilek, Kristu!
Imbierek is-Sultan li ġej f’isem il-Mulej! Lq 19, 28-40
Qari mill-Evanġelju skont San Luqa
F’dak iż-żmien, Ġesù qabad it-triq u beda tiela’ lejn Ġerusalemm, miexi quddiem l-oħrajn. U meta wasal qrib Betfaġe u Betanja, ħdejn l-għolja li jgħidulha taż-Żebbuġ, bagħat tnejn mid-dixxipli tiegħu u qalilhom: “Morru fir-raħal ta’ biswitna; kif taslu, issibu felu marbut li ħadd qatt għadu ma rikeb fuqu. Ħolluh u ġibuh. Jekk xi ħadd jistaqsikom: “Għalfejn qegħdin tħolluh?”, għidulu hekk: “Il-Mulej għandu bżonnu”.
Dawk li kienu mibgħuta marru u sabu kollox kif kien qalilhom. Huma u jħollu l-felu, is-sidien tiegħu qalulhom: “Għalfejn qegħdin tħolluh il-felu?”. U huma wieġbu: “Għax il-Mulej jeħtieġu”.
Imbagħad ġiebu l-felu lil Ġesù, qiegħdu l-imnatar tagħhom fuq il-felu, u rikkbu lil Ġesù fuqu. Huwa u għaddej, firxu l-imnatar tagħhom fit-triq. Xħin imbagħad kien qorob lejn in-niżla tal-Għolja taż-Żebbuġ, il-kotra kollha tad-dixxipli bdiet tfaħħar lil Alla b’għajjat ta’ ferħ u b’leħen għoli għall-għeġubijiet kollha li kienu raw, u bdew jgħidu:
“Imbierek is-Sultan li ġej f’isem il-Mulej! Sliem fis-sema, u glorja fl-ogħla tas-smewwiet!”
Xi wħud mill-fariżej li kienu qalb il-folla qalulu: “Mgħallem, ċanfarhom lid-dixxipli tiegħek!”. Iżda hu weġibhom u qal: “Ngħidilkom li, jekk jisktu huma, jgħajjat il-ġebel”.
L-Evanġelista Luqa jiddedika parti sostanzjali mill-Evanġelju tiegħu (sa minn kapitlu 9 vers 51) lil Ġesù miexi lejn Ġerusalemm, il-post fejn kellu jmut għalina. Ir-rakkont tal-lum huwa proprju it-tmiem ta’ din il-mixja lejn Ġerusalemm għax naqraw il-wasla tiegħu ġewwa din il-Belt Qaddisa. Ġerusalemm, il-post li b’rieda sħiħa kien ilu jterraq lejh—jipprietka, jgħallem, iwissi u jfejjaq matul it-triq. Ġerusalemm, il-belt li minnha kellu jittieħed mid-dinja biex jirritorna għand Dak li bagħtu.
Sa fl-aħħar wasal Ġerusalemm. Sa fl-aħħar dan il-vjaġġ ġie fi tmiemu. Id-determinazzjoni ta’ Ġesù li jwassal sal-aħħar ir-rieda tal-Missier tispikka kif naqraw li “Ġesù qabad it-triq u beda tiela’ lejn Ġerusalemm, miexi quddiem l-oħrajn.” Il-kotra kienet ilha tistennieh bi ħġarha. Kienet ilha tinġema’ fit-triqat sabiex tarah għaddej filwaqt li tgħajjat bil-ferħ u b’leħen għoli. Tassew:
laqgħuh u ferħu bih … iżda kliemu ma laqgħuhx;
firxu l-imnatar tagħhom fit-triqat minn fejn kellu jgħaddi … imma qalbhom ma kinitx mifruxa għalih;
laqgħu lil Dak li mar fosthom “f’isem il-Mulej” … imma l-kliem li qalilhom malajr nesewh.
Tant hu hekk illi ftit wara din il-ġrajja, nerġgħu niltaqgħu mal-istess folla … imma did-darba tgħajjat, “Sallbu, sallbu.
Dan kollu ma jistax ma jfakkarniex f’dak li għaddejna minnu f’Malta l-ġimgħa l-oħra.
Anke aħna, bħal Ġerusalemm, ilqajna fostna lill-Papa Franġisku li ġie fostna f’isem il-Mulej.
Anke aħna, bħal Ġerusalemm, inġbarna bi ħġarna fit-triqat li kellu jgħaddi minnhom sabiex imqar nilmħuh għaddej bi żbrixx.
Anke aħna, bħal Ġerusalemm, għajjatna u xejjirna l-bnadar sofor u bojod qalb bosta ċapċip.
Talba
Imma, Mulej, tħallix li bħall-ġemgħa f’Ġerusalemm jiena wkoll ma nilqax kliemek. X’jiswa li nilqa’ lilek u mbagħad ma nilqax kliemek? X’jiswa li nċapċaplek u noħodlok ir-ritratti jekk imbagħad ma nilqax dak li qed tgħidli fid-diskorsi li l-Papa għamel tul iż-żjara tiegħu Malta?
