It-5 Ħadd tar-Randan Sena Ċ

Kolletta

Nitolbuk, Mulej Alla tagħna; agħtina l-għajnuna tiegħek biex, bil-ħeġġa kollha ta’ qlubna, ngħixu b’dik l-istess imħabba li wriena Ibnek meta kien mogħti għall-mewt għalina. Hu, li hu Alla u miegħek jgħix u jsaltan flimkien mal-Ispirtu s-Santu, Alla, għal dejjem ta’ dejjem. Ammen.

Riflessjoni

L-Evanġelju li tippreżentalna l-Knisja għal dan il-Ħames Ħadd tar-Randan jistedinna biex nagħrfu li aħna lkoll midinbin maħbuba minn Alla ħanin.

“Min fostkom hu bla dnub jitfgħalha hu l-ewwel ġebla” (v. 7). Id-dnub huwa dejjem dnub, kemm dak li hu pubbliku kif ukoll dak li hu mistur. Il-kittieba u l-Fariżej waqgħu għat-tentazzjoni li jużaw lil din il-mara li nqabdet fl-adulterju biex iġarrbu lil Ġesù quddiem il-poplu kollu (v. 2), “ħalli jkollhom fuqiex jixluh” (v. 6). Huma ppruvaw jonsbu lil Ġesù billi joħolqu sitwazzjoni ta’ konflitt bejn it-tagħlim tiegħu u l-Liġi li tahom Mosè: “Int, imma, xi tgħid?” (v. 5). Ġesù ma daħalx f’dibattitu magħhom, iżda wieġeb bis-silenzju, u wara skiet li jtarrax huwa xeħet raġġ ta’ dawl fuqhom ilkoll biex huma jagħrfu dak li kien hemm moħbi f’qalbhom: “Min fostkom hu bla dnub jitfgħalha hu l-ewwel ġebla” (v. 7).

Min minna hu bla dnub? Kemm-il darba ħsibna li jekk m’aħniex aħjar minn ħaddieħor għall-anqas m’aħniex agħar? Kemm-il darba aħna wkoll konna bil-ġebel f’idejna, lesti biex ingarawhom lejn l-oħrajn?

Fil-bidu ta’ dan ir-rakkont, ħdejn Ġesù kien hemm il-poplu kollu (v. 2), imbagħad ingħaqdu l-kittieba u l-Fariżej li ħadulu quddiemu lil mara li nqabdet fid-dnub. L-evanġelista jgħidilna li għal kelma ta’ Ġesù, “telqu wieħed wara l-ieħor, ibda mix-xjuħ, u baqa’ Ġesù waħdu mal-mara, wieqfa fin-nofs” (v. 9). Santu Wistin jgħidilna: “Baqgħu biss huma t-tnejn: il-miżerja u l-ħniena.” Ġesù jidħol fi djalogu mal-mara u jroddilha lura d-dinjità tagħha. Mhux biss, imma bl-imħabba u l-ħniena tiegħu, Ġesù jħassar ħtijietha u joffrilha ħajja ġdida: “‘Dawk fejnhom mara? Ħadd minnhom ma kkundannak?’ ‘Ħadd, Sinjur,’ qaltlu. ‘Mela anqas jien ma nikkundannak. Mur, u mil-lum ’il quddiem tidnibx iżjed.’” (v. 10-11).

Jekk irridu nkunu sinċieri magħna nfusna għandna nammettu li aħna lkoll midinbin. Dan ir-Randan ikun żmien tassew ta’ grazzja għalina jekk nerħu l-ġebel, u minflok ma naraw id-dnub tal-oħrajn inpoġġu ruħna fis-skiet ma’ Ġesù waħdu u nħalluh idawlilna l-kuxjenza tagħna. Ġesù jrid jeħlisna mill-miżerja tagħna biex ngħixu fl-imħabba u l-paċi tiegħu: “Mur, u mil-lum ’il quddiem tidnibx iżjed” (v. 11).

Talba

Minn qiegħ l-art insejjaħlek Mulej:

isma’, Sidi, il-leħen tiegħi!

Ħa jkunu widnejk miftuħa,

jiena u nitolbok bil-ħniena.

Jekk tal-ħtijiet int tagħti kas, Mulej,

Sidi, min jista’ jżomm sħiħ?

Imma għandek hemm il-maħfra,

biex hekk inqimuk fil-biża’ tiegħek.

Jien lill-Mulej nistenna,

ruħi f’kelmtu tittama. (Salm 130, 1-5)