It-Tielet Riflessjoni dwar l-Adorazzjoni tal-Maġi, Ħal Għaxaq
Fanal għal riġlejja l-kelma tiegħek,
u dawl fil-mogħdija tiegħi.
Ħlift, u rrid inżomm kelmti,
li nħares id-digrieti ġusti tiegħek.
Ninsab imnikket għall-aħħar, Mulej;
agħtini l-ħajja skont il-kelma tiegħek.
Ilqa’, Mulej, il-qima ta’ fommi,
u għallimni d-digrieti tiegħek.
Salm 119, 105-108
Emvin Cremona fil-pittura tal-Adorazzjoni tal-Maġi ta’ Ħal Għaxaq joħloq kuntrast bejn l-umiltà tax-xena ċentrali u l-kburija tal-belt ta’ Ġerusalemm li tidher fl-isfond fil-għoli, fuq għolja. Id-dehra ta’ Ġerusalemm fil-bogħod hija pjuttost imdella, f’kuntrast mad-dawl nieżel għal fuq Kristu—dawl li jimla lill-Familja Mqaddsa u li jirrifletti wkoll fuq il-Maġi li fil-laqgħa tagħhom ma’ Ġesù huma wkoll jintlaqtu mid-dawl “divin”. F’din ix-xena, il-Maġi huma l-personifikazzjoni ta’ dak li jħabbar il-Profeta Isaija:
Il-poplu li kien miexi fid-dlam
ra dawl kbir;
in-nies li joqogħdu f’art id-dlam
dawl idda fuqhom.
Is 9, 1
Dan ma jgħoddx għas-Sultan Erodi u l-mexxejja ta’ Ġerusalemm li quddiem it-tħabbira tal-miġja tal-Messija taħt imneħirhom, ftit kilometri biss ’il bogħod, baqgħu indifferenti u ma ċċaqalqux—għajr meta Erodi pprova jeqred id-dawl bla ma rnexxielu. Dawn isiru l-personifikazzjoni ta’ dak li jgħid San Ġwann:
Id-dawl ġie fid-dinja, imma l-bnedmin ħabbew id-dlam aktar mid-dawl, għax l-għemil tagħhom kien ħażin.
Ġw 3, 19
Meta tħalli d-dawl jolqot l-eżistenza tiegħek, xejn ma jibqa’ l-istess. Iċaqalqek mill-kumdità tiegħek, tbiegħdek minn darek, imma tagħmlek wild Alla (ara Ġw 1, 12). Quddiem dan il-kuntrast bejn Betlehem u Ġerusalemm, għażel fejn tixtieq tgħix il-ħajja tiegħek, jekk hux għad-dell li jħallik fejn int jew għad-dawl li jesponik imma wkoll jimlik bl-imħabba.
