L-‘avventuri’ ta’ San Ġużepp, tal-Knisja, u tiegħek
L-Ewwel Riflessjoni dwar il-Pittura ta’ San Ġużepp Patrun tal-Knisja Universali, fil-Knisja Parrokkjali tal-Kalkara
Il-Knisja kienet fis-sliem fil-Lhudija u l-Galilija u s-Samarija kollha; kienet dejjem tikber u timxi ’l quddiem bil-biża’ tal-Mulej, u tiżdied fl-għadd bl-għajnuna tal-Ispirtu s-Santu.
Atti tal-Appostli 9, 31
Matul dawn il-ġranet ta’ April, il-memorja tal-anzjani tagħna żgur tmur għall-ħerba li kienet saret matul April tal-1942 mill-attakki tal-Luftwaffe waqt it-Tieni Gwerra Dinjija. Kien l-iktar xahar iebes għall-Malta, kemm minħabba fil-kwantità eżorbitanti ta’ attakki—li mmeritawlna l-George Cross għall-qlubija murija—u kif ukoll għax f’dawn l-attakki diversi knejjes qrib żoni militari sefgħu mġarrfa. Din ukoll kienet ix-xorti tal-Knisja Parrokkjali tal-Kalkara fi Triq ir-Rinella ddedikata lill-Patroċinju ta’ San Ġużepp. Minkejja li prattikament intilef kollox, ħlief dak li kien merfugħ fil-kampnar, il-pitturi ġew salvati kollha għax Mons. Mikiel Gonzi—iben dan ir-raħal—ħadhom miegħu Għawdex, fejn kien isqof tad-djoċesi.
Fost il-pitturi li skansaw il-qerda kien hemm il-pittura titulari, xogħol Giuseppe Calì li jġib id-data tal-1898. Meta ġiet mibnija l-Knisja Parrokkjali l-ġdida wara l-gwerra, din il-pittura reġgħet sabet postha bħala kwadru titulari.
Fil-ġimgħat li ġejjin se nkunu qegħdin nieħdu spunti għar-riflessjoni minn din il-pittura proprju għax, meta fis-seklu dsatax, bdiet tiżdied id-devozzjoni lejn San Ġużepp, kien proprju fit-Tielet Ħadd tal-Għid—u wara fl-Erbgħa ta’ qabel it-Tielet Ħadd—li kienet tiġi ċċelebrata l-festa tal-Patroċinju ta’ San Ġużepp. Kien Piju IX li, wara li daħħal din il-festa fil-kalendarju universali, ħatar lil San Ġużepp bħala Patrun tal-Knisja Universali nhar it-8 ta’ Diċembru 1870.
Però hemm raġuni oħra għalfejn se npoġġu quddiemna dan il-kapulavur. Matul Żmien l-Għid fil-quddies naqraw l-‘avventuri’ tal-Knisja tal-bidu riżultat tal-laqgħa ma’ Kristu Rxoxt. Minkejja li Calì għandu kwadru ieħor bl-istess suġġett fil-Knisja Parrokkjali tal-Għargħur—fejn l-enfasi hi fuq it-titlu ta’ ġieħ lil Ġużeppi, akkumpanjat minn Ġesù u Marija—il-kwadru li nsibu l-Kalkara jirrappreżenta xena allegorika li, kif se naraw, tiftaħ tieqa’ fuq l-‘avventuri’ tal-Knisja matul is-sekli … ‘avventuri’ li tpoġġew taħt il-ħarsa paterna ta’ Ġużeppi li kien jaf xi jfissru l-‘avventuri’ mal-Mulej!
Forsi qabel ma nibdew dan il-vjaġġ, tajjeb tieqaf ftit u tiftakar fl-‘avventuri’ tiegħek bħala Nisrani u fi ħdan komunità. Forsi wkoll l-‘avventura’ tiegħek tixbah xi ftit lil ta’ din il-pittura minħabba l-Gwerra. U ftakar mhux b’nostalġija li tħalli togħma qarsa dwar il-preżent u l-futur, imma ftakar b’dik in-nostalġija li, mela le, iġġelben xi demgħa minn għajnejna—sew jekk ta’ niket u sew jekk ta’ ferħ—imma tagħti qawwa lill-preżent u timla bit-tama l-ħarsa lejn il-ġejjien.
Ċelebrazzjoni fil-Familja tal-Mixegħla tax-Xemgħa tal-Avvent
Fid-dar, f’post xieraq, titħejja l-kuruna tal-Avvent: erba’ xemgħat f’forma ta’ ċirku, imżejnin b’xi weraq aħdar. Għalkemm mhux bilfors, tajjeb li dawn ix-xemgħat ikunu tlieta ta’ kulur vjola, u waħda ta’ kulur roża.
Kull nhar ta’ Sibt filgħaxija jew matul il-jum tal-Ħadd, meta l-familja tkun miġbura kollha d-dar, isir dan ir-rit li fih, kull darba tinxtgħel xemgħa, hekk li minn darba għal oħra, id-dawl jiżdied: dan ifisser li Ġesù, li hu d-Dawl, qiegħed dejjem joqrob. Il-ġenituri jistgħu jagħtu din it-tifsira sempliċi lil uliedhom, biex ikunu jistgħu jgħixu aħjar dan il-mument ta’ talb.
Matul ir-rit, wieħed mill-ġenituri jmexxi t-talb. Ġenitur ieħor, jew wieħed mill-ulied, jaqraw is-silta mill-Bibbja.
Tajjeb li kull membru tal-familja jkollu l-fuljett tat-talb.
Bidu
Meta tinġabar il-familja, ilkoll jagħmlu s-sinjal tas-salib: Fl-isem tal-Missier u tal-Iben u tal-Ispirtu s-Santu. R/. Ammen.
Imbagħad wieħed mill-ġenituri jgħid: Infaħħru lil Alla li jibgħat lill-anġli jagħtu aħbarijiet tajba, hekk li permezz tagħhom sirna nafu bit-twelid tal-Messija. R/. Imbierek Alla għal dejjem.
Il-ġenitur jintroduċi ċ-ċelebrazzjoni billi jgħid: Inkomplu l-mixja tal-Avvent fil-familja tagħna. Dalwaqt jasal il-Milied, u llum nixgħelu r-raba’ xemgħa. Ejjew niftħu widnejna biex nisimgħu l-kant tal-anġli li qed iħabbru l-miġja ta’ Ġesù.
Qari mill-Ktieb tal-profeta Isaija (52,8-9)
Ismagħha l-għajta! L-għassiesa tiegħek għollew leħenhom, lkoll flimkien jgħajtu bil-ferħ, għax raw b’għajnejhom lill-Mulej rieġa’ lura f’Sijon. Intom, ħerbiet ta’ Ġerusalemm, għajtu lkoll bil-ferħ, għax farraġ il-Mulej il-poplu tiegħu, feda lil Ġerusalemm.
Il-Kelma tal-Mulej. R/. Irroddu ħajr lil Alla.
Responsorju Glorja ’l Alla fil-għoli tas-sema. R/. U paċi fl-art lill-bnedmin li hu jħobb.
Mixgħela tar-raba’ xemgħa
Xi ħadd mit-tfal jixgħel ir-raba’ xemgħa,waqt li l-membri l-oħra tal-familja jgħidu flimkien: Din ix-xemgħa se tixgħel fid-dar, għax Ġesù ġej dalwaqt fuq din l-art! Żdied id-dawl, żdied il-ferħ u s-sliem, għax Ġesù ġej biex jagħti l-ħelsien.
Il-ġenitur, wara li tinxtgħel ix-xemgħa, jgħid:
Nitolbu. O Alla li tista’ kollox, agħmel li l-Iben tiegħek li sar bniedem idawwal lill-qalb tagħna, idawwal lill-familja tagħna, biex isaltnu fostna l-ferħ u l-paċi. Bi Kristu Sidna. R/. Ammen.
Il-ġenitur jagħlaq ir-rit billi jgħid: Il-Mulej Alla jberikna u jħarisna fl-imħabba tiegħu. R/. Ammen.
O Alla, inti taf b’liema fedeltà l-poplu tiegħek qiegħed jistenna l-festa tal-Milied; agħtina, Sawwab f’ruħna, Mulej il-grazzja tiegħek, biex aħna li, bit-tħabbira ta’ l-Anġlu, għarafna li Kristu Ibnek sar bniedem, bil-passjoni u l-mewt tiegħu naslu fis-sebħ tal-qawmien mill-imwiet. B’Ibnek Ġesù Kristu Sidna, li miegħek jgħix u jsaltan flimkien ma’ l-Ispirtu s-Santu, Alla, għal dejjem ta’ dejjem.
Ċelebrazzjoni fil-Familja tal-Mixegħla tax-Xemgħa tal-Avvent
Fid-dar, f’post xieraq, titħejja l-kuruna tal-Avvent: erba’ xemgħat f’forma ta’ ċirku, imżejnin b’xi weraq aħdar. Għalkemm mhux bilfors, tajjeb li dawn ix-xemgħat ikunu tlieta ta’ kulur vjola, u waħda ta’ kulur roża.
Kull nhar ta’ Sibt filgħaxija jew matul il-jum tal-Ħadd, meta l-familja tkun miġbura kollha d-dar, isir dan ir-rit li fih, kull darba tinxtgħel xemgħa, hekk li minn darba għal oħra, id-dawl jiżdied: dan ifisser li Ġesù, li hu d-Dawl, qiegħed dejjem joqrob. Il-ġenituri jistgħu jagħtu din it-tifsira sempliċi lil uliedhom, biex ikunu jistgħu jgħixu aħjar dan il-mument ta’ talb.
Matul ir-rit, wieħed mill-ġenituri jmexxi t-talb. Ġenitur ieħor, jew wieħed mill-ulied, jaqraw is-silta mill-Bibbja.
Tajjeb li kull membru tal-familja jkollu l-fuljett tat-talb.
Bidu
Meta tinġabar il-familja, ilkoll jagħmlu s-sinjal tas-salib: Fl-isem tal-Missier u tal-Iben u tal-Ispirtu s-Santu. R/. Ammen.
Imbagħad wieħed mill-ġenituri jgħid:
Infaħħru lil Alla li ġej biex isalva lill-ġnus kollha u biex jagħti lid-dinja kollha l-ferħ tassew. R/. Imbierek Alla għal dejjem.
Il-ġenitur jintroduċi ċ-ċelebrazzjoni billi jgħid: Inkomplu l-mixja tal-Avvent fil-familja tagħna. Imiss nixgħelu t-tielet xemgħa: ix-xemgħa tar-rgħajja u tal-ferħ. Waqt li nħarsu lejn ir-rgħajja, nitħejjew biex nirċievu l-aħbar ta’ ferħ kbir, l-aħbar tat-twelid tas-Salvatur tagħna.
Qari mill-ittra ta’ San Pawl lir-Rumani (13,11-12)
Waslet is-siegħa li intom tqumu min-ngħas, għax is-salvazzjoni tagħna hi eqreb minn meta bdejna nemmnu. Il-lejl għoddu għadda, u qorob il-jum. Inwarrbu mela l-għemil tad-dlam u nilbsu l-armi tad-dawl.
Il-Kelma tal-Mulej. R/. Irroddu ħajr lil Alla.
Responsorju Il-Mulej hu fil-qrib: ma jiddawwarx. R/. Hu jħabbar is-sliem lill-ġnus kollha.
Mixgħela tat-tielet xemgħa
Xi ħadd mit-tfal jixgħel it-tieni xemgħa, waqt li l-membri l-oħra tal-familja jgħidu flimkien:
Din ix-xemgħa se tixgħel fid-dar, għax Ġesù ġej dalwaqt fuq din l-art! Se nisimgħu bħar-rgħajja l-aħbar, li Ġesù jinsab fqajjar fil-għar.
Il-ġenitur, wara li tinxtgħel ix-xemgħa, jgħid:
Nitolbu. Alla, Missier tagħna, qajjimna min-ngħas u għenna nkunu lesti, biex nilqgħu l-aħbar ta’ ferħ tat-twelid tas-Salvatur, u ngħixu fil-hena tiegħek. Bi Kristu Sidna. R/. Ammen.
Il-ġenitur jagħlaq ir-rit billi jgħid: Il-Mulej Alla jberikna u jħarisna fl-imħabba tiegħu. R/. Ammen.
O Alla, inti taf b’liema fedeltà l-poplu tiegħek qiegħed jistenna l-festa tal-Milied; agħtina, nitolbuk, li jseħħilna naslu għall-hena bla qjies li nġarrbu fit-twelid ta’ Sidna, u li b’qalb ferħana niċċelebrawh dejjem b’solennità qaddisa. B’Ibnek Ġesù Kristu Sidna, li miegħek jgħix u jsaltan flimkien mal-Ispirtu s-Santu, Alla, għal dejjem ta’ dejjem. Ammen.
Ċelebrazzjoni fil-Familja tal-Mixegħla tax-Xemgħa tal-Avvent
Fid-dar, f’post xieraq, titħejja l-kuruna tal-Avvent: erba’ xemgħat f’forma ta’ ċirku, imżejnin b’xi weraq aħdar. Għalkemm mhux bilfors, tajjeb li dawn ix-xemgħat ikunu tlieta ta’ kulur vjola, u waħda ta’ kulur roża.
Kull nhar ta’ Sibt filgħaxija jew matul il-jum tal-Ħadd, meta l-familja tkun miġbura kollha d-dar, isir dan ir-rit li fih, kull darba tinxtgħel xemgħa, hekk li minn darba għal oħra, id-dawl jiżdied: dan ifisser li Ġesù, li hu d-Dawl, qiegħed dejjem joqrob. Il-ġenituri jistgħu jagħtu din it-tifsira sempliċi lil uliedhom, biex ikunu jistgħu jgħixu aħjar dan il-mument ta’ talb.
Matul ir-rit, wieħed mill-ġenituri jmexxi t-talb. Ġenitur ieħor, jew wieħed mill-ulied, jaqraw is-silta mill-Bibbja.
Tajjeb li kull membru tal-familja jkollu l-fuljett tat-talb.
Bidu
Meta tinġabar il-familja, ilkoll jagħmlu s-sinjal tas-salib: Fl-isem tal-Missier u tal-Iben u tal-Ispirtu s-Santu. R/. Ammen.
Imbagħad wieħed mill-ġenituri jgħid: Infaħħru lil Alla li għażel dak li fid-dinja hu dgħajjef u lill-belt ċkejkna ta’ Betlehem għamilha l-benniena tal-Messija. R/. Imbierek Alla għal dejjem.
Il-ġenitur jintroduċi ċ-ċelebrazzjoni billi jgħid: Inkomplu l-mixja tal-Avvent fil-familja tagħna. Illum se nixgħelu t-tieni xemgħa li se tfakkarna fil-belt ċkejkna fejn twieled is-Salvatur tagħna, u se tgħinna naraw kif il-ħelsien li ġab Ġesù huwa għad-dinja kollha.
Qari mill-Ktieb tal-profeta Mikea (5,1)
U int, Betlehem ta’ Efrata, ċkejkna fost il-familji ta’ Ġuda, minnek għad joħroġli dak li jkun prinċep f’Iżrael; hu għandu l-bidu tiegħu mill-qedem, sa minn dejjem ta’ dejjem.
Il-Kelma tal-Mulej. R/. Irroddu ħajr lil Alla.
Responsorju Minn Betlehem għad joħroġ ir-ragħaj ta’ Iżrael. R/. Hu jħabbar is-sliem lill-ġnus kollha.
Mixgħela tat-tieni xemgħa
Xi ħadd mit-tfal jixgħel it-tieni xemgħa, waqt li l-membri l-oħra tal-familja jgħidu flimkien:
Din ix-xemgħa se tixgħel fid-dar, għax Ġesù ġej dalwaqt fuq din l-art! Fil-grotta ta’ Betlem, fis-skiet, se jimla ’l kulħadd bil-barkiet.
Il-ġenitur, wara li tinxtgħel ix-xemgħa, jgħid:
Nitolbu. Missier ħanin, it-triqat tiegħek mhumiex it-triqat tagħna, għinna nimxu warajk, biex nilqgħu kuljum lil Ġesù, u agħmel li kull bniedem jirċievi s-salvazzjoni tiegħek. Bi Kristu Sidna. R/. Ammen.
Il-ġenitur jagħlaq ir-rit billi jgħid: Il-Mulej Alla jberikna u jħarisna fl-imħabba tiegħu. R/. Ammen.
O Alla ħanin li tista’ kollox, agħmel li xejn fid-dinja ma jfixkilna aħna u nħaffu biex niltaqgħu ma’ Ibnek, iżda agħtina l-għerf tas-sema biex nissieħbu mal-istess Ibnek Ġesù Kristu Sidna, li hu Alla u miegħek jgħix u jsaltan flimkien mal-Ispirtu s-Santu, Alla, għal dejjem ta’ dejjem.
Ċelebrazzjoni fil-Familja tal-Mixegħla tax-Xemgħa tal-Avvent
Fid-dar, f’post xieraq, titħejja l-kuruna tal-Avvent: erba’ xemgħat f’forma ta’ ċirku, imżejnin b’xi weraq aħdar. Għalkemm mhux bilfors, tajjeb li dawn ix-xemgħat ikunu tlieta ta’ kulur vjola, u waħda ta’ kulur roża.
Kull nhar ta’ Sibt filgħaxija jew matul il-jum tal-Ħadd, meta l-familja tkun miġbura kollha d-dar, isir dan ir-rit li fih, kull darba tinxtgħel xemgħa, hekk li minn darba għal oħra, id-dawl jiżdied: dan ifisser li Ġesù, li hu d-Dawl, qiegħed dejjem joqrob. Il-ġenituri jistgħu jagħtu din it-tifsira sempliċi lil uliedhom, biex ikunu jistgħu jgħixu aħjar dan il-mument ta’ talb.
Matul ir-rit, wieħed mill-ġenituri jmexxi t-talb. Ġenitur ieħor, jew wieħed mill-ulied, jaqraw is-silta mill-Bibbja.
Tajjeb li kull membru tal-familja jkollu l-fuljett tat-talb.
Bidu Meta tinġabar il-familja, ilkoll jagħmlu s-sinjal tas-salib: Fl-isem tal-Missier u tal-Iben u tal-Ispirtu s-Santu. R/. Ammen.
Imbagħad wieħed mill-ġenituri jgħid: Infaħħru lil Alla li ħafna drabi ried jagħti l-ħbiberija tiegħu lill-bnedmin u permezz tal-profeti għallimhom jistennew u jittamaw fis-salvazzjoni. R/. Imbierek Alla għal dejjem.
Il-ġenitur jintroduċi ċ-ċelebrazzjoni billi jgħid: Se nibdew iż-żmien tal-Avvent, anke fil-familja tagħna. Matul dan iż-żmien il-Mulej jistedinna nħejju t-triq għal Ġesù li ġej biex jifdina. Nixgħelu l-ewwel xemgħa li se ddawwal din il-mixja. Din ix-xemgħa trid tfakkarna fix-xandir tal-profeti li ħabbru bil-ferħ il-miġja ta’ Ġesù s-Salvatur, l-Għimmanu-El, Alla magħna.
Qari mill-Ktieb tal-profeta Isaija (7,13-14)
Isimgħu, mela, dar David: mhux biżżejjed għalikom li tkiddu lill-bnedmin, biex issa se tkiddu lil Alla tiegħi? Għalhekk is-sinjal jagħtihulkom Sidi stess: Araw, ix-xebba titqal u tiled iben, u ssemmih Għimmanu-el.
Il-Kelma tal-Mulej. R/. Irroddu ħajr lil Alla.
Responsorju Il-profeti kienu ħabbruh. R/. Is-Salvatur se jitwieled mill-Verġni Marija.
Mixgħela tal-ewwel xemgħa Xi ħadd mit-tfal jixgħel l-ewwel xemgħa, waqt li l-membri l-oħra tal-familja jgħidu flimkien: Din ix-xemgħa se tixgħel fid-dar, għax Ġesù ġej dalwaqt fuq din l-art! Il-profeti ħabbruh ilu żmien, huwa ġej biex jagħtina l-ħelsien!
Il-ġenitur, wara li tinxtgħel ix-xemgħa, jgħid: Nitolbu. O Mulej, li bgħatt lill-profeti biex iħabbru l-miġja ta’ Kristu Ibnek, dawwal fuqna d-dija tiegħek, sabiex, imdawlin mill-Kelma tiegħek, nimxu lejk b’qalb ġeneruża u fidila. Bi Kristu Sidna. R/. Ammen.
Il-ġenitur jagħlaq ir-rit billi jgħid: Il-Mulej Alla jberikna u jħarisna fl-imħabba tiegħu. R/. Ammen.
O Alla li tista’ kollox, qanqal fil-fidili tiegħek ir-rieda li, bis-saħħa ta’ għemejjel tajba, joħorġu jiltaqgħu ma’ Kristu Ibnek li ġej, biex jissieħbu miegħu fil-leminija tiegħu u jistħoqqilhom jiksbu s-saltna tas-sema. B’Ibnek Ġesù Kristu Sidna, li miegħek jgħix u jsaltan flimkien mal-Ispirtu s-Santu, Alla, għal dejjem ta’ dejjem.
