L-Ewwel Riflessjoni dwar l-Arazz tat-Tħabbira tal-Mulej, Kon-Katidral ta’ San Ġwann

O Marija, Verġni u mbierka,

ilqa’ fil-ġuf safi tiegħek

il-Verb t’Alla, mibgħut lilna

mill-Missier biex isalvana.

Liturġija tas-Sigħat, Innu tal-Għasar, Ferja Privileġġata tal-Avvent

F’dan ix-xahar iddedikat lit-talba tar-Rużarju, se nitfgħu l-ħarsa tagħna fuq l-arazz tal-Kon-Katidral ta’ San Ġwann li jirrappreżenta x-xena tat-Tħabbira tal-Mulej, proprju l-Ewwel Misteru tal-Ferħ tal-istess talba.

Il-parti tax-xena fejn iseħħ id-djalogu bejn Marija u l-Anġlu hija mfassla fuq pittura oħra ta’ Peter Paul Rubens li llum tinsab fil-Mużew Rubenshuis f’Antwerp, il-Belġju. Għal raġuni mhux magħrufa, Rubens pitter l-ewwel nofs ta’ din l-opra aktarx għas-sena 1610. Kien imbagħad bejn l-1627 u l-1628 li lesta dan ix-xogħol u mmodifika l-figura ta’ Marija.

F’dan l-arazz tintuża ikonografija pjuttost tipika għar-rappreżentazzjonijiet ta’ din ix-xena tant fundamentali fl-Evanġelju skont San Luqa li fiha Alla jsir bniedem bl-“Iva” ta’ Marija. Naraw lil Marija taħt mant ħamrani—simbolu ta’ regalità—u għarkupptejha fuq ġinokjatur li fuqu hemm ktieb miftuħ—wieħed jassumi li huwa simbolu tal-Kelma ta’ Alla. Għaldaqstant, nistgħu ngħidu li fil-ħsieb tal-artist Marija kienet qed titlob u timmedita l-Kelma ta’ Alla meta rċeviet iż-żjara tal-Anġlu. Il-fiat tagħha kienet il-pont bejn il-Kelma li Alla wassal lill-poplu l-magħżul, b’mod partikolari bil-Profeti li fi kliemhom il-Lhud għarfu t-tħabbira ta’ Sultan mill-familja rjali ta’ David li permezz tiegħu l-poplu jinħeles u jsir għajn ta’ salvazzjoni għall-umanità kollha, u mill-banda l-oħra l-Kelma definittiva ta’ Alla li twassal dawn il-profeziji u l-istennija għall-milja tagħhom u li sseħħ bil-qawwa tal-Ispirtu s-Santu li jidher nieżel fuqha f’raġġ ta’ dawl mis-sema.

Din il-pożizzjoni ta’ talb ta’ Marija taqbel ħafna mal-mod kif San Luqa fl-Evanġelju tiegħu jirrakkuntalna diversi episodji li fihom Ġesù talab jew kien qiegħed jitlob. Kemm it-talb ta’ Marija u, iktar u iktar, dak ta’ Kristu mhuwiex talb magħluq fih innifsu imma l-intimità profonda tfur f’għajn ta’ grazzja għall-umanità kollha: minn Marija għax flimkien mal-poplu ta’ Iżrael kienet titlob u tistenna l-miġja tal-Messija u laqgħetu fi ħdanha meta wasal; minn Ġesù għax id-djalogu tal-Kelma magħmula laħam mal-Missier sal-mewt, minkejja l-piż ta’ dnub l-umanità li jiftaħ abbiss bejniethom, kien jiftaħ wisa’ fejn il-fidwa setgħet isseħħ u l-istess Spirtu li bil-qawwa tiegħu seħħet l-inkarnazzjoni issa jkompli jqaddes l-umanità permezz tas-Sagramenti.

Inti u titlob ir-Rużarju forsi iktar ta’ spiss matul dan ix-xahar, ħalli din l-attitudni ta’ qalb miftuħa li tagħmel wisa’ kemm għal Alla u kif ukoll għall-umanità tikkaratterizza l-qalb tiegħek ukoll sabiex, mar-ritmu ta’ Sliema waħda wara l-oħra, nerġgħu noħolqu dan il-wisa’ biex Alla jkun preżenti fid-dinja.

L-Ewwel Riflessjoni dwar l-Adorazzjoni tal-Maġi, Kon-Katidral ta’ San Ġwann, il-Belt Valletta

Jiena hu t-Triq, il-Verità u l-Ħajja. Ħadd ma jmur għand il-Missier jekk mhux permezz tiegħi.

Ġwanni 14, 6

F’dan iż-żmien liturġikament xi ftit stramb fejn, min-naħa l-waħda, b’għaġla kbira se nagħlqu ż-Żmien tal-Milied (minkejja li xorta għadna bit-togħma tal-ħlewwiet u l-festini f’ħalqna) u, mill-banda l-oħra, qegħdin nibku t-telfa tal-Papa Emeritu Benedittu XVI. Sabiex inkunu nistgħu nipproċessaw din it-telfa bla ma ninjorawha, filwaqt li l-ħarsa tagħna tibqa’ fuq Alla li wera ruħu lilna bħala bniedem fil-persuna ta’ Ġesù Kristu, se nħallu l-pittura tal-Adorazzjoni tal-Maġi li nsibu fil-Kon-Katidral, xogħol ta’ Stefano Erardi, tmexxi l-ewwel passi tagħna matul din is-sena ċivili li għadna kemm bdejna, b’attenzjoni partikolari għal dak li hu sabiħ u li għandu l-qawwa jerfa’ l-ħsieb tagħna ’l fuq u jipponta lejn dak li hu s-Sbuħija nnifisha.

Stefano Erardi, bħal ħafna artisti matul is-sekli, f’din il-pittura jirrappreżenta lill-Maġi bħala rġiel ta’ etajiet differenti: iż-żagħżugħ Afrikan, ir-raġel adult bi lħitu u xagħru kannella, kważi faqsi, u l-anzjan qargħi bi ftit xagħar griż u daqna qotnija.

Meta fl-20 ta’ Lulju 1864 infetaħ ir-relikwarju fejn huma miżmuma l-fdalijiet tal-Maġi fil-Katidral ta’ Kolonja, barra reżina tfuħ u faxex qodma magħmulin minn materjal fin ħafna, instabu wkoll fdalijiet ta’ għadam uman li, bil-għajnuna ta’ diversi esperti, ġew organizzati u ffurmati fi tliet skeletri kważi kompluti. U, b’mod partikolari mill-forma tal-kranju, seta’ jiġi stabbilit li skeletru minnhom kien jappartjeni għal żagħżugħ, ieħor għal raġel adult u ieħor għal raġel anzjan.

Għalkemm l-oriġini eżatta ta’ dawk l-iġsma mhijiex magħrufa, ħlief għad-dettalji storiċi dokumentati li se nidlu aktar fil-fond fuqhom fir-riflessjoni li jmiss, jidher ċar li r-rappreżentazzjoni artistika tat-tliet maġi fi stadji differenti tal-ħajja umana tagħhom għandha kemm bażi xjentifika u kif ukoll antropoloġika għax jiġi inkorporat l-bniedem sħiħ fl-istadji kollha tiegħu. Hija wkoll mistoqsija ta’ antropoloġija Nisranija fis-sens li, bħalma l-avventura tal-ħajja bioloġika għandha l-istadji tagħha, hekk ukoll l-avventura tal-mixja wara Ġesù għandha l-istaġuni tagħha. U, f’kull wieħed minn dawn l-istaġuni, il-bniedem irid jitħabat u jsegwi l-Kewkba vera, li hi Kristu, skont lejn fejn qiegħda tieħdu u għal liema għażliet trid twasslu sabiex hekk sa fl-aħħar jasal f’Ġerusalemm tas-Sema li “biex iddawwalha għandha l-glorja ta’ Alla, u l-musbieħ tagħha l-Ħaruf” (Apok 21, 23).

Fit-testment spiritwali tiegħu, il-Papa Emeritu Benedittu XVI iħares lura bi gratitudni lejn il-ħajja tiegħu—xhieda ta’ raġel li fih ix-xjuħija ma saritx imrar frott it-toqol tal-mard u n-nuqqas ta’ saħħa, imma ħalla t-tbatija ġiet mibdula fi gratitudni li tħares lura u tapprezza l-imħabba ta’ Alla f’kull stadju tal-ħajja, anke fil-mumenti diffiċli u ta’ sfida. Lejn l-aħħar jagħmel referenza għall-ħafna ideat jew ideoloġiji teoloġiċi li hu rahom iqumu u jikkrollaw matul is-snin, u jistqarr:

Rajt u nara kif mit-tagħqid tal-ipoteżijiet ħarġet u toħroġ mill-ġdid ir-raġonevolezza tal-fidi. Ġesù Kristu hu tassew it-triq, il-verità u l-ħajja—u l-Knisja, bin-nuqqasijiet kollha tagħha, hi tassew l-ġisem Tiegħu.

Benedittu XVI, Testment Spiritwali, 29 ta’ Ġunju 2006

F’liema stadju ta’ ħajtek wasalt? Hu liema hu l-istaġun ta’ ħajtek, ħalli l-għarfien tal-Mulej bħala “t-Triq, il-Verità u l-Ħajja” iqawwik fil-mixja tiegħek warajh fi ħdan u flimkien ma’ komunità ta’ nies ta’ kull età u imperfetti bħalek. Ħalli d-diżappunti tiegħek jinbidlu f’barka. Ħalli l-fallimenti tiegħek jinbidlu fi grazzja. Ħalli l-imrar jinbidel f’radd il-ħajr.

Is-Sitt Riflessjoni dwar il-pitturi tal-Koppla tal-Bażilika Kolleġġjata ta’ Santa Elena, Birkirkara

Lilu ħabbru l-profeti kollha fix-xandir tagħhom,

l-Omm verġni rabbietu bl-akbar għożża.

Ġwanni ħabbru b’tifħir meta qorob u wrieh meta wasal.

Hu qiegħed jagħtina li bil-ferħ nitħejjew għall-misteru tat-twelid tiegħu,

biex isibna nishru u nitolbu, u nithennew fit-tifħir tiegħu.

Missal Ruman, It-Tieni Prefazju tal-Avvent

Hekk kif tgħolli l-ħarsa ’l fuq, lejn il-koppla tal-Bażilika ta’ Santa Elena, fuq il-lemin tal-figura imponenti ta’ Kristu, fuq nett, fl-istess livell fejn hemm l-appostli, tista’ tilmaħ lil Ġwanni l-Battista, lil Marija u lil Ġużeppi. Dawn it-tliet figuri huma ċentrali għar-Raba’ Ħadd tal-Avvent għax, fuq ċiklu ta’ tliet snin, naqraw il-ħolma ta’ Ġużeppi, it-tħabbira tal-Anġlu Garijel lil Marija, u l-laqgħa bejn Marija u Eliżabetta li f’ġufhom kienu qed iġorru lil Ġesù u lil Ġwanni rispettivament.

Dawn it-tliet figuri huma bħal fus bejn it-Testment il-Qadim u t-Testment il-Ġdid għax huwa proprju permezz tagħhom li l-Messija mwiegħed jitwieled u jintwera lill-poplu tal-wegħda. It-tlieta li huma wkoll qegħdin iħarsu f’direzzjoni differenti, skont is-sehem tagħhom fil-misteru ta’ Alla li jsir bniedem. Ġwanni l-Għammiedi, bl-istandart f’idu ix-xellugija li jġib il-kliem “Ecce Agnus Dei” (Dan hu l-Ħaruf ta’ Alla), qiegħed iħares ’il fuq, iktar milli tasal il-pittura, bħal donnu lejn ix-xena tas-smewwiet miftuħa, id-dehra tal-Ispirtu s-Santu taħt forma ta’ ħamiema, u l-leħen tal-Missier jgħid, “Inti Ibni l-għażiż; fik sibt l-għaxqa tiegħi” (Lq 3, 22).

Ġużeppi qiegħed iħares bi drittu, lejn il-figura ta’ Kristu fil-glorja tiegħu, jikkontempla lil dak li salva l-poplu tiegħu minn dnubiethom (ara Mt 1, 21). Mill-banda l-oħra, Marija għandha l-ħarsa tagħha ’l isfel. Għandha wkoll idejha miftuħin ’l isfel, bħal donnhom ta’ omm li qed tiġġebbed biex taqbad it-tarbija tagħha. Din il-qagħda ta’ Marija inklinata quddiem Kristu u lejn dawk li daħlu fil-glorja hija espressjoni tas-sehem li Kristu ta lil Ommu fil-misteru tal-fidwa, jiġifieri dik li tkun Omm il-Feddej u Omm il-mifdijin kollha.

Filwaqt li joffrilek id-don tas-salvazzjoni, lilek ukoll jagħtik sehem fis-salvazzjoni tad-dinja. Agħraf din ir-realtà doppja tiegħek u, fid-dawl tal-qagħda tiegħek fil-Knisja u fis-soċjetà, ipprova ifhem ftit iktar kif din il-missjoni ta’ salvazzjoni tista’ tkompli twettaqha llum.

Ħajr lil Daniel Cilia għar-ritratti.