It-Tielet Ħadd tal-Avvent Sena A

Kolletta

O Alla, inti taf b’liema fedeltà l-poplu tiegħek qiegħed jistenna l-festa tal-Milied; agħtina, nitolbuk, li jseħħilna naslu għall-hena bla qjies li nġarrbu fit-twelid ta’ Sidna, u li b’qalb ferħana niċċelebrawh dejjem b’solennità qaddisa. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen.

Riflessjoni

“Morru agħtu lil Ġwanni l-aħbar ta’ dak li qegħdin tisimgħu u taraw.”

L-esperjenza ta’ Ġesù mhijiex immaġinarja jew fittizja jew astratta.

L-esperjenza ta’ Ġesù hi tanġibbli: taqa’ taħt is-sensi; tista’ tismagħha u taraha!

B’hekk ix-xhieda ta’ dawk iż-żewġ dixxipli kienet ta’ min joqgħod fuqha: għax huma stess raw u semgħu.

X’raw u semgħu?

Ġesù qalilhom: “l-għomja jaraw, iz-zopop jimxu, il-lebbrużi jfiqu, it-torox jisimgħu, il-mejtin iqumu, l-Evanġelju jixxandar lill-foqra.”

Illum, tajjeb li nistaqsu lilna nfusna, aħna ta’ xiex aħna xhieda? Nistgħu ngħidu l-istess bħalma qal Ġesù? Jew faqqarna x-xhieda tagħna?

X’nistgħu ngħidu lis-soċjetà ta’ żmienna biex nikkonvinċuha li Ġesù hu l-Messija, is-Salvatur, il-Mibgħut mill-Missier?

Ġesù kompla jgħidilhom, “Hieni hu min ma jitfixkilx minħabba fija.”

Aħna li nemmnu fih, aħna nitfixklu minħabba fih?

Ninsabu f’dan il-vjaġġ tal-Avvent. U tajjeb li nistħarrġu x’qed jiġri f’ruħna bħalissa. Dan hu ż-żmien liturġiku li fih aħna niftakru li l-wegħdiet ta’ Alla dwar il-miġja tal-Messija seħħew f’Ġesù u, fl-istess ħin, nistennew li l-wegħdiet ta’ Alla dwar it-tieni miġja tas-Salvatur iseħħu wkoll. Dawn ġa bdew iseħħu minn mindu d-dixxipli ta’ Ġesù tgħammdu l-ewwel darba bl-Ispirtu s-Santu nhar Pentekoste.

Il-wegħdiet ta’ Alla huma qawwija u jagħtuna kuraġġ. Fl-Ewwel Qari llum nisimgħu dil-wegħda: “Agħmlu l-ħila, la tibżgħux! Araw, Alla tagħkom ġej jitħallas; il-ħlas ta’ Alla wasal; Hu stess ġej biex isalvakom.”

Hekk għamel! Ġesù ġie u salvana. U għandu jerġa’ jiġi fil-glorja. Ejjew inkunu bħaż-żewġ dixxipli u nxandru l-għemejjel ta’ Ġesù u nixhdu li hu ħaj fostna!

Talba

Missier, grazzi li tajtna lil Ġesù bħala l-Messija li jfejjaqna, li jeħlisna, li jsalvana. Nitolbuk, f’Isem Ġesù, li tkeċċi l-biża’ tagħna u timliena bil-kuraġġ tal-Ispirtu s-Santu biex nagħtu xhieda tal-għemejjel kbar ta’ ħniena tiegħek fi żminijietna.

Ammen

It-Tieni Ħadd tal-Avvent Sena A

Kolletta

O Alla ħanin li tista’ kollox, agħmel li xejn fid-dinja ma jfixkilna aħna u nħaffu biex niltaqgħu ma’ Ibnek, iżda agħtina l-għerf tas-sema biex nissieħbu mal-istess Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen.

Riflessjoni

Il-Liturġija tal-Kelma f’dan it-Tieni Ħadd tal-Avvent tippreżentalna lil Ġwanni l-Battista bil-għan li tiffoka fuq l-ministeru tiegħu li jsejjaħ lill-poplu għall-indiema sabiex ikunu mħejjija għall-miġja tal-Messija. Anke fl-Ewwel Qari, minkejja li l-viżjoni hi kemmxejn kontrastanti, xorta waħda Isaija bħal Ġwanni l-Battista jħabbar il-miġja ta’ mibgħut li se jpoġġi kollox f’postu.

L-Ewwel Qari jippreżentalna l-mibgħut ta’ Alla mimli bl-ispirtu tal-Mulej hekk li hu għal kollox trasformat minnu, hekk li l-ġudizzju tiegħu mhuwiex influwenzat mill-antipatiji u l-simpatiji li bihom nimxu aħna imma mill-verità, hekk li l-istess kelma tiegħu ssawwat lil xi wħud bit-tama li tressaqhom lejn it-triq tas-sewwa (kif anke jagħmel Ġwanni fl-Evanġelju meta jagħti ħasla lill-Fariżej li marru jitgħammdu għandu), imma l-istess kelma tiegħu tgħolli lill-fqajrin u tagħtihom dinjità.

Ġwanni fl-Evanġelju isejjaħ għall-indiema bi tħejjija għall-magħmudija li sseħħ bl-Ispirtu s-Santu u bin-nar, li hija l-istess grazzja li biha se jkun mimli l-mibgħut ta’ Alla fil-Profeta Isaija—kif forsi stajtu tinnutaw, issemmew dawk li nirreferu għalihom bħala d-doni tal-Ispirtu s-Santu li jaslu għandna fis-sagrament tal-Griżma tal-Isqof li jerġa’ jġedded fina l-grazzja tal-magħmudija, imma din id-darba biex inkunu xhieda ta’ dak li qiegħed jibgħatna. Isaija jmur ukoll pass lil hinn u jfisser permezz ta’ xbihat assurdi kif se tkun is-saltna l-ġdida ta’ dan il-mibgħut ta’ Alla, bil-lupu jibda jgħix mal-ħaruf, u l-leopard mal-gidi.

Niftakar, kien hemm soċju tal-MUSEUM li, biex jinki lil soċju ieħor ftit iktar skrupluż, kien jgħidlu li Isaija kien fis-sakra meta kiteb dal-kliem. Kienet ċajta, imma forsi wkoll ċajta vera għax għandna ħabta kif niskru u nedhew b’miljun oġġett li permezz tiegħu nippruvaw naljenaw ruħna ħalli ninsew—ninsew il-problemi tagħna, il-problemi tax-xogħol u tal-familja, il-problemi tad-dinja—hekk li bħal donnu ningħalqu f’bozza sabiex kemm jista’ jkun ma jaffetwana xejn, bħal meta wieħed jisker u jitlef il-kuntatt mar-realtà hekk li kważi kważi jidħol f’realtà oħra. Min ġieli siker, forsi jista’ jifhimni aħjar!

Imma l-Kelma ta’ Alla llum turina li s-soluzzjoni mhijiex is-sokor jew affarijiet oħra li nużawhom bħala morfina biex immewtu l-uġiegħ flok nikkonfrontawh u nħalluh jintmiss mill-grazzja ta’ Alla, jew dawk l-affarijiet li nħalluhom jillupjawna biex inessuna dak li proprju hemm bżonn niftakru iktar dwaru għax hemmhekk l-iktar li neħtiġuha l-indiema u l-maħfra ta’ Alla. Is-soluzzjoni hija li nħallu z-zokk niexef tar-ruħ tagħna jerġa’ jieħu l-ħajja u minnu tinbet rimja, kif ifisser Isaija, u li Ġwanni jwissi li hemm il-qtugħ lest jekk dan ma jseħħx: li l-mibgħut, il-Messija, se jiġi jfittex il-frott ta’ din ir-rimja biex jaħsdu sabiex jimla l-imħażen bil-qamħ—jibni s-Saltna tiegħu ukoll bl-isforzi ċkejkna tagħna li nagħmlu kuljum, jum iktar mill-ġurnata ta’ qabel, jekk jista’ jkun, u, jekk le, ma jimpurtax, erġa’ pprova.

Il-viżjoni tad-dinja ta’ Isaija hija wisq tal-ħolm biex narawha vera, u l-viżjoni ta’ Ġwanni hi wisq ħarxa hekk li faċli narmuha mill-ewwel għax mhijiex politikament korretta. Allura kif se nibqgħu? Fejn se mmorru? Fejn se nsibu kenn u qawwa?

Fit-Tieni Qari, San Pawl lir-Rumani jiktbilhom: “bis-sabar u bil-faraġ li tagħtina l-Iskrittura, aħna jkollna t-tama.” Dan il-kliem irid jagħmilna konxji dwar is-serjetà ta’ dak li qed nitkellmu dwaru fejn tidħol il-ħajja Nisranija—u diġà qed jidher ċar li fi żminijietna stess se jkollna nieqfu sod għal dak li nemmnu fih—imma huwa wkoll kliem li jfarraġna, li jrawwimna fis-sabar għax jeħtieġ nistennew u nistinkaw sakemm il-ġustizzja vera sseħħ, u fit-tama li ma naqtgħux qalbna li l-hena mwiegħed se jasal xi darba, ukoll jekk għalissa se jkollna nissikkaw ruħna jew se nsibu ruħna f’battalji ħorox.

Talba

Mulej, onqox f’qalbi l-kelma “Tama” sabiex bħalek noħlom u nemmen li l-impossibbli jistgħu jsiru realtà jekk, sa fejn hu fil-limitu tagħna nħabirku ħalli niffurmaw dinja aħjar, fejn m’hemmx iktar vittmi u assassini, fejn m’hemmx iktar ħallelin u dawk li jiġu misruqa, fejn m’hemmx iktar biża’—sew biża’ mill-ħżiena u sew biża’ mill-id setgħana tiegħek. Ħa tkun it-tama tagħna stess ir-rimja li permezz tagħha inti jiftaħ it-triq għal ħajja ġdida u mġedda li twassal għas-Saltna tiegħek.

Ammen

L-Ewwel Ħadd tal-Avvent

Kolletta

O Alla ta’ dejjem li tista’ kollox, int ridt iġġedded kollox f’Ibnek il-għażiż, is-Sultan tal-ħolqien kollu; fit-tjieba tiegħek, agħtina li l-ħlejjaq kollha, meħlusa mill-jasar tad-dnub, jaqdu O Alla li tista’ kollox, qanqal fil-fidili tiegħek ir-rieda li, bis-saħħa ta’ għemejjel tajba, joħorġu jiltaqgħu ma’ Kristu Ibnek li ġej, biex jissieħbu miegħu fil-leminija tiegħu u jistħoqqilhom jiksbu s-saltna tas-sema. B’Ibnek Ġesù Kristu Sidna, li hu Alla, u li miegħek jgħix u jsaltan flimkien mal-Ispirtu s-Santu, għal dejjem ta’ dejjem.

Ammen.

Riflessjoni

Meta taqra l-Ewwel Qari u l-Evanġelju tal-lum, l-Ewwel Ħadd tal-Avvent u tas-Sena Liturġika tal-Knisja, tidħol fid-dubju jekk aħniex nitkellmu dwar l-istess realtà: Minn banda, Isaija fl-Ewwel Qari jħabbar ġejjieni kollu tama, fejn ix-xwabel jinbidlu f’sikek tal-moħriet, bħal donnu l-epilogu tal-musical Les Miserables, meta l-miżerabbli kollha, hi x’inhi l-miżerja tagħhom, ikantaw flimkien b’vuċi waħda:

We will walk behind the ploughshare
We will put away the sword
The chain will be broken
And all men will have their reward

… kważi kważi l-ħolma idillika li, minkejja kollox, xorta tibqa’ tafda fit-tjubija tal-umanità u tal-ħolqien għax ma titlifx il-fiduċja tagħha fit-tjubija tal-Ħallieq u tas-Saltna tiegħu.

Mill-banda l-oħra, fl-Evanġelju, it-tonn ta’ Ġesù hu iktar serju u gravi għax ifakkar li t-tranżizzjoni, il-passaġġ, minn dan il-wied tad-dmugħ għall-ġnien tal-Mulej mhijiex ħaġa sempliċi u awtomatika imma jeħtieġ li nkunu ppreparati: mhux fis-sens ta’ testmenti magħluqa u bagalji lesti, imma fis-sens ta’ taqbida li titħabat biex ma tħallix id-dilluvju tal-kurrenti tad-dinja li qegħdin ngħixu fiha jġorruna magħhom u jgħarrquna, fejn il-prioritajiet tal-ħajja ta’ kuljum jieħdu post il-prijoritajiet tal-ħajja sħiħa, fejn ninvestu f’dak li jħalli biss qliegħ għal żmien qasir flok investiment f’dak li jibqa’, fejn ir-relazzjonijiet tagħna flok jiftħuna iktar għal xulxin b’ġenwinità jkunu biss possessivi u manipulattivi.

Il-passaġġ minn dawn iż-żewġ trufijiet, li t-tnejn huma reali u importanti, insibuh fit-Tieni Qari meta, fl-ittra tiegħu lir-Rumani, San Pawl jikteb: “waslet is-siegħa li intom tqumu min-ngħas,” u, iktar ’il quddiem, jistqarr is-sigriet tal-ħajja nisranija li skopra hu u li jagħmel id-differenza kollha, “ilbsu lil Sidna Ġesù Kristu.” Forsi xi ftit differenti min-nota lirika li tagħlaq biha Les Miserables, is-Saltna ta’ Alla, kemm hawn fuq l-art u kif ukoll fis-sema, m’għandhiex standarti jekk mhux is-salib, m’hemmx bnadar jew uniformijiet, imma hemm libsa li lkoll nirċievu u jeħtieġ nilbsuha. Nilbsuha biex l-għera tagħna, id-dgħufija umana tagħna limitata kif inhi, ma tibqax ta’ għajb, ta’ mistħija, imma tikseb mill-ġdid id-dinjità tagħha li kellha fil-bidu tal-ħolqien għax tinħeles mill-mod ħażin ta’ kif inħarsu u nużaw il-ġisem tagħna u ta’ ħaddieħor; tinħeles mill-ktajjen tal-jasar, hu x’inhu; tinħeles mill-ispirtu ta’ dominanza u ħakma, kemm ta’ ħaddieħor fuqna u kif ukoll tagħna fuq ħaddieħor, anke jekk biss b’modi sottili imma iktar u iktar insidjużi.

Fuq kollox, hija l-libsa li tagħmilna lkoll nixbhu lil Kristu bil-mod uniku tagħna, u l-isfida kontinwa tal-ħajja nisranija hija din: F’ċirkostanzi dejjem jinbidlu, bil-persuna u l-personalità tiegħi li dejjem jinbidlu kemm biż-żmien u kif ukoll bl-esperjenzi li l-ħajja tgħaddina minnhom, ħżiena u tajbin, kif jien se nsir iżjed nixbah lil Ġesù u ngħin lil ta’ madwari jsiru iktar jixbhu lil Ġesù? Kif se naħdem biex il-Knisja u s-soċjetà ikunu iktar jixbhu l-ideal tal-Evanġelju, li mhuwiex manifest politiku imma hu viżjoni differenti ta’ kif inħarsu lejn l-istess realtajiet u mmexxuhom ’il quddiem?

Talba

Mulej Ġesù​, aħna u nibdew sena liturġika oħra li, bħalma s-sena tkejjel iż-żmien li tieħu l-pjaneta tagħna biex iddur max-xemx, hekk ukoll din tagħna hija sena li tkejjel id-dawran tagħna bħala Knisja, bħala poplu, madwarek ix-Xemx tal-ġustizzja, iftħilna qalbna biex nilqgħu l-istedina u nqumu min-ngħas, mit-telqa li xi kultant taħkimna, sabiex inġeddu fina l-impenn tal-magħmudija li nilbsu lilek fil-faċċati differenti tiegħek li se niltaqgħu magħhom Ħadd wara Ħadd fil-Liturġija.

Ammen